ਓਟਵਾ, 9 ਮਾਰਚ (ਪੋਸਟ ਬਿਊਰੋ) : ਐਨਡੀਪੀ ਦੇ ਹਾਊਸ ਲੀਡਰ ਪੀਟਰ ਜੂਲੀਅਨ ਨੇ ਫੈਡਰਲ ਕੰਜ਼ਰਵੇਟਿਵਾਂ ਉੱਤੇ ਨਜ਼ਲਾ ਝਾੜਦਿਆਂ ਆਖਿਆ ਕਿ ਗਲਤ ਨੀਤੀਆਂ ਕਾਰਨ ਲਿਬਰਲਾਂ ਨੂੰ ਕੋਵਿਡ-19 ਮਹਾਂਮਾਰੀ ਦਰਮਿਆਨ ਚੋਣਾਂ ਕਰਵਾਉਣ ਦਾ ਰਾਹ ਮਿਲ ਜਾਵੇਗਾ।
ਹਾਊਸ ਆਫ ਕਾਮਨਜ਼ ਵਿੱਚ ਆਈ ਖੜੋਤ ਨੂੰ ਤੋੜਨ ਦੀ ਜੂਲੀਅਨ ਦੀ ਕੋਸਿ਼ਸ਼ ਨੂੰ ਕੰਜ਼ਰਵੇਟਿਵਾਂ ਨੇ ਅਧਵਾਟੇ ਹੀ ਰੋਕ ਦਿੱਤਾ ਸੀ ਤੇ ਉਸ ਤੋਂ ਬਾਅਦ ਹੀ ਉਨ੍ਹਾਂ ਵੱਲੋਂ ਇਹ ਨੁਕਤਾਚੀਨੀ ਕੀਤੀ ਗਈ। ਜੂਲੀਅਨ ਚਾਹੁੰਦੇ ਸਨ ਹਾਊਸ ਆਫ ਕਾਮਨਜ਼ ਵਿੱਚ ਸੋਮਵਾਰ ਰਾਤ ਨੂੰ ਸਿਟਿੰਗ ਥੋੜ੍ਹੀ ਦੇਰ ਹੋਰ ਚੱਲੇ ਤਾਂ ਕਿ ਬਿੱਲ ਸੀ-5 ਉੱਤੇ ਫਾਈਨਲ ਬਹਿਸ ਹੋ ਸਕੇ। ਇਹ ਬਿੱਲ ਸੱਚ ਤੇ ਸੁਲ੍ਹਾ ਸਬੰਧੀ ਨੈਸ਼ਨਲ ਡੇਅ ਕਾਇਮ ਕਰਨ ਲਈ ਲਿਆਂਦਾ ਗਿਆ ਹੈ।
ਕੰਜ਼ਰਵੇਟਿਵਾਂ ਨੇ ਇਸ ਬਿੱਲ ਉੱਤੇ ਸਾਂਝੀ ਰਜ਼ਾਮੰਦੀ ਤੋਂ ਇਨਕਾਰ ਕਰ ਦਿੱਤਾ। ਇਸੇ ਤਰ੍ਹਾਂ ਹੀ ਕੰਜ਼ਰਵੇਟਿਵਾਂ ਵੱਲੋਂ ਪਿਛਲੇ ਮਹੀਨੇ ਵੀ ਤਿੰਨ ਵਾਰੀ ਕੀਤਾ ਗਿਆ ਜਦੋਂ ਘੱਟ ਗਿਣਤੀ ਲਿਬਰਲ ਸਰਕਾਰ ਨੇ ਬਿੱਲ ਸੀ-7, ਜੋ ਕਿ ਮੌਤ ਵਿੱਚ ਮੈਡੀਕਲ ਸਹਿਯੋਗ ਸਬੰਧੀ ਲਿਆਂਦਾ ਗਿਆ, ਲਈ ਵੀ ਲੰਮਾਂ ਸਮਾਂ ਚੱਲਣ ਵਾਲੀ ਬਹਿਸ ਕਰਵਾਉਣ ਵਿੱਚ ਵਿਘਨ ਪਾਇਆ।ਇਸ ਤੋਂ ਇਲਾਵਾ ਐਮਰਜੰਸੀ ਪੈਨਡੈਮਿਕ ਏਡ ਬਾਰੇ ਬਿੱਲਜ਼ ਤੇ ਮਹਾਂਮਾਰੀ ਦੌਰਾਨ ਸੁਰੱਖਿਅਤ ਚੋਣਾਂ ਕਰਵਾਉਣ ਸਬੰਧੀ ਮਾਪਦੰਡਾਂ ਵਾਲੇ ਬਿੱਲਾਂ ਵਿੱਚ ਤਿਕੜਮ ਲੜਾ ਕੇ ਦੇਰ ਕਰਵਾਈ।
ਜੂਲੀਅਨ ਨੇ ਆਖਿਆ ਕਿ ਕੰਜ਼ਰਵੇਟਿਵਾਂ ਨੇ ਸਰਕਾਰ ਦੇ ਲੈਜਿਸਲੇਟਿਵ ਏਜੰਡਾ ਨੂੰ ਰੋਕਣ ਲਈ ਪੂਰੀ ਰਣਨੀਤੀ ਬਣਾਈ ਹੋਈ ਹੈ ਤੇ ਫਿਰ ਇਸ ਨਾਲ ਕੋਈ ਫਰਕ ਨਹੀਂ ਪੈਂਦਾ ਕਿ ਉਹ ਕੋਈ ਵੀ ਬਿੱਲ ਲਿਆਉਣ ਟੋਰੀਜ਼ ਵੱਲੋਂ ਉਸ ਦਾ ਰਾਹ ਰੋਕਿਆ ਹੀ ਜਾਂਦਾ ਹੈ। ਇਸ ਰਣਨੀਤੀ ਨਾਲ ਲਿਬਰਲ ਇਹ ਆਖਦੇ ਹੋਏ ਚੋਣਾਂ ਕਰਵਾਉਣ ਲਈ ਬਾਜਿੱਦ ਹੋਣਗੇ ਕਿ ਲੋਕਾਂ ਦੀ ਭਲਾਈ ਦੇ ਕੰਮ ਕਰਵਾਉਣ ਲਈ ਉਨ੍ਹਾਂ ਨੂੰ ਬਹੁਗਿਣਤੀ ਹਾਸਲ ਕਰਨ ਲਈ ਚੋਣਾਂ ਕਰਵਾਉਣੀਆਂ ਹੀ ਪੈਣਗੀਆਂ।
ਜੂਲੀਅਨ ਨੇ ਇੱਕ ਇੰਟਰਵਿਊ ਵਿੱਚ ਆਖਿਆ ਕਿ ਇਹ ਕੋਈ ਸਮਾਰਟ ਪਹੁੰਚ ਨਹੀਂ ਹੈ। ਉਨ੍ਹਾਂ ਆਖਿਆ ਕਿ ਕੰਜ਼ਰਵੇਟਿਵ ਹਾਊਸ ਲੀਡਰ ਗੇਰਾਰਡ ਡੈਲਟੈਲ ਨੇ ਇੱਕ ਬਿਆਨ ਜਾਰੀ ਕਰਕੇ ਆਖਿਆ ਕਿ ਸਰਕਾਰ ਨੂੰ ਹਾਊਸ ਆਫ ਕਾਮਨਜ਼ ਵਿੱਚ ਵਿਰੋਧੀ ਪਾਰਟੀਆਂ ਨਾਲ ਉਸਾਰੂ ਢੰਗ ਨਾਲ ਕੰਮ ਕਰਨਾ ਚਾਹੀਦਾ ਹੈ। ਉਨ੍ਹਾਂ ਇਹ ਵੀ ਆਖਿਆ ਕਿ ਉਨ੍ਹਾਂ ਦੀ ਪਾਰਟੀ ਮਹਾਂਮਾਰੀ ਦੌਰਾਨ ਚੋਣਾਂ ਨਹੀਂ ਕਰਵਾਉਣਾ ਚਾਹੁੰਦੀ।
ਜੂਲੀਅਨ ਨੇ ਨਾ ਸਿਰਫ ਹਾਊਸ ਆਫ ਕਾਮਨਜ਼ ਦੇ ਕੰਮਕਾਜ ਵਿੱਚ ਅੜਿੱਕੇ ਡਾਹੁਣ ਲਈ ਕੰਜ਼ਰਵੇਟਿਵਾਂ ਨੂੰ ਜਿ਼ੰਮੇਵਾਰ ਦੱਸਿਆ ਸਗੋਂ ਉਨ੍ਹਾਂ ਪਿੱਛੇ ਜਿਹੇ ਇਹ ਦੋਸ਼ ਵੀ ਲਾਇਆ ਸੀ ਕਿ ਲਿਬਰਲ ਜਾਣਬੁੱਝ ਕੇ ਕੁੱਝ ਅਹਿਮ ਕਾਨੂੰਨਾਂ ਨੂੰ ਰੋਕ ਕੇ ਰੱਖ ਰਹੇ ਹਨ।ਉਨ੍ਹਾਂ ਵਿਰੋਧੀ ਪਾਰਟੀਆਂ ਉੱਤੇ ਇਹ ਦੋਸ਼ ਵੀ ਲਾਇਆ ਕਿ ਅਹਿਮ ਬਿੱਲਾਂ ਦੀ ਇੱਧਰ ਉੱਧਰ ਸੁੱਟ ਥੱਲ ਕੀਤੀ ਜਾ ਰਹੀ ਹੈ।