ਰੋਮ, 8 ਮਾਰਚ (ਪੋਸਟ ਬਿਊਰੋ)- ਭਾਰਤੀ ਮਹਿਲਾ ਪਹਿਲਵਾਨ ਵਿਨੇਸ਼ ਫੋਗਟ ਨੇ ਮਾਟਿਓ ਪੈਲੀਕੋਨ ਰੈਂਕਿੰਗ ਕੁਸ਼ਤੀ ਸੀਰੀਜ਼ ਵਿੱਚ ਜਿੱਤ ਦਰਜ ਕਰਕੇ ਲਗਾਤਾਰ ਦੂਸਰੇ ਹਫ਼ਤੇ ਦੂਸਰਾ ਸੋਨ ਤਗਮਾ ਜਿੱਤਿਆ। ਉਸ ਨੇ ਇਸ ਜਿੱਤ ਦੇ ਨਾਲ ਹੀ ਆਪਣੇ ਵਜ਼ਨ ਵਰਗ ਵਿੱਚ ਫਿਰ ਤੋਂ ਨੰਬਰ-1 ਰੈਂਕਿੰਗ ਹਾਸਲ ਕੀਤੀ ਹੈ।
ਵਿਸ਼ਵ ਚੈਂਪੀਅਨਸ਼ਿਪ ਦੀ ਕਾਂਸੀ ਤਗਮਾ ਜੇਤੂ ਵਿਨੇਸ਼ ਟੋਕਿਓ ਉਲੰਪਿਕ ਖੇਡਾਂ ਲਈ ਕੁਆਲੀਫਾਈ ਕਰਨ ਵਾਲੀ ਇਕੋ ਇੱਕ ਭਾਰਤੀ ਮਹਿਲਾ ਪਹਿਲਵਾਨ ਹੈ। ਉਸ ਨੇ 53 ਕਿੱਲੋਗ੍ਰਾਮ ਫਾਈਨਲ ਵਿੱਚ ਕੈਨੇਡਾ ਦੀ ਡਾਇਨਾ ਮੈਰੀ ਹੈਲਨ ਵੀਕਰ ਨੂੰ 4-0 ਨਾਲ ਹਰਾਇਆ। ਵਿਨੇਸ਼ (26) ਨੇ ਆਪਣੇ ਸਾਰੇ ਅੰਕ ਪਹਿਲੇ ਪੀਰੀਅਡ ਵਿੱਚ ਹਾਸਲ ਕਰ ਲਏ ਅਤੇ ਦੂਸਰੇ ਪੀਰੀਅਡ ਵਿੱਚ ਆਪਣੀ ਲੀਡ ਕਾਇਮ ਰੱਖ ਕੇ ਸੋਨ ਤਗਮਾ ਜਿੱਤਿਆ। ਵਿਨੇਸ਼ ਨੇ ਪਿਛਲੇ ਹਫ਼ਤੇ ਕੀਵ ਵਿੱਚ ਸੋਨ ਤਗਮਾ ਜਿੱਤਿਆ ਸੀ ਤੇ ਇਸ ਨਾਲ ਉਸ ਨੂੰ ਵਿਸ਼ਵਾਸ ਹੋ ਗਿਆ ਕਿ ਉਲੰਪਿਕ ਲਈ ਉਸ ਦੀਆਂ ਤਿਆਰੀਆਂ ਸਹੀ ਚੱਲ ਰਹੀਆਂ ਹਨ। ਇਸ ਭਾਰਤੀ ਪਹਿਲਵਾਨ ਨੇ ਮੁਕਾਬਲੇ ਵਿੱਚ ਵਿਸ਼ਵ ਦੀ ਨੰਬਰ ਤਿੰਨ ਪਹਿਲਵਾਨ ਵਜੋਂ ਪ੍ਰਵੇਸ਼ ਕੀਤਾ ਸੀ, ਪਰ 14 ਪੁਆਇੰਟ ਜਿੱਤ ਕੇ ਦੁਬਾਰਾ ਵਿਸ਼ਵ ਨੰਬਰ-1 ਬਣ ਗਈ। ਕੈਨੇਡਾ ਦੀ ਪਹਿਲਵਾਨ ਪਹਿਲਾਂ 40ਵੇਂ ਨੰਬਰ ਉੱਤੇ ਸੀ, ਪਰ ਹੁਣ ਉਹ ਵਿਨੇਸ਼ ਦੇ ਬਾਅਦ ਨੰਬਰ-2 ਬਣ ਗਈ ਹੈ।