* ਰੀਆ ਚੱਕਰਵਰਤੀ ਤੇ ਉਸ ਦੇ ਭਰਾ ਸਣੇ 32 ਦੋਸ਼ੀਆਂ ਦੇ ਨਾਂਅ ਸ਼ਾਮਲ
ਮੁੰਬਈ, 6 ਮਾਰਚ (ਪੋਸਟ ਬਿਊਰੋ)- ਨਾਰਕੋਟਿਕਸ ਕੰਟਰੋਲ ਬਿਊਰੋ (ਐਨ ਸੀ ਬੀ) ਨੇ ਫਿਲਮ ਸਟਾਰ ਸੁਸ਼ਾਂਤ ਸਿੰਘ ਰਾਜਪੂਤ ਦੀ ਖ਼ੁਦਕੁਸ਼ੀ ਨਾਲ ਸਬੰਧਿਤ ਡਰੱਗ ਕੇਸ ਵਿੱਚ ਕੱਲ੍ਹ ਦੋਸ਼ ਪੱਤਰ ਦਾਖ਼ਲ ਕਰ ਦਿੱਤਾ ਹੈ।
ਕਰੀਬ 12 ਹਜ਼ਾਰ ਸਫਿਆਂ ਦੇ ਇਸ ਦੋਸ਼ ਪੱਤਰ ਵਿੱਚ ਬਾਲੀਵੁੱਡ ਅਦਾਕਾਰਾ ਰੀਆ ਚੱਕਰਵਰਤੀ ਅਤੇ ਉਸਦੇ ਭਰਾ ਸ਼ੋਵਿਕ ਸਮੇਤ 33 ਲੋਕਾਂ ਦੇ ਨਾਂਅ ਦੋਸ਼ੀਆਂਵਜੋਂ ਸ਼ਾਮਲ ਹਨ। ਦੋਸ਼ੀਆਂ ਵਿੱਚ ਕਿਸੇ ਵੱਡੀ ਫਿਲਮੀ ਹਸਤੀ ਦਾ ਨਾਂਅ ਨਹੀਂ ਹੈ। ਇਨ੍ਹਾਂ ਵਿੱਚੋਂ ਪੰਜ ਦੋਸ਼ੀ ਫ਼ਰਾਰ ਦੱਸੇ ਗਏ ਹਨ। ਦੋਸ਼ ਪੱਤਰ ਵਿੱਚ 200 ਗਵਾਹਾਂ ਦਾ ਜ਼ਿਕਰ ਹੈ। ਐਨ ਸੀ ਬੀ ਨੇ ਇਸ ਦੀ ਜਾਂਚ ਕਰਦੇ ਸਮੇਂ ਬਾਲੀਵੁੱਡ ਅਦਾਕਾਰਾ ਦੀਪਿਕਾ ਪਾਦੂਕੋਣ, ਸਾਰਾ ਅਲੀ ਖ਼ਾਨ ਅਤੇ ਸ਼ਰਧਾ ਕਪੂਰ ਤੋਂ ਵੀ ਪੁੱਛ-ਗਿੱਛ ਕੀਤੀ ਸੀ, ਪਰ ਦੋਸ਼ ਪੱਤਰ ਵਿੱਚ ਇਨ੍ਹਾਂ ਦੇ ਬਿਆਨਾਂ ਦਾ ਜ਼ਿਕਰ ਕੀਤਾ ਹੈ, ਦੋਸ਼ੀ ਨਹੀਂ ਬਣਾਇਆ। ਵਰਨਣ ਯੋਗ ਹੈ ਕਿ ਨਾਰਕੋਟਿਕ ਡਰੱਗ ਐਂਡ ਸਾਈਕੋਟ੍ਰੋਪਿਕ ਸਬਸਟਾਂਸਜ਼ (ਐਨ ਡੀ ਪੀ ਐਸ) ਐਕਟ ਹੇਠ ਬਣਾਈ ਵਿਸ਼ੇਸ਼ ਅਦਾਲਤ ਅੱਗੇ ਦਾਇਰ ਕੀਤੇ 11700 ਸਫਿਆਂ ਵਾਲੇ ਦੋਸ਼ ਪੱਤਰ ਵਿੱਚ ਡਰੱਗ ਦੀ ਬਰਾਮਦਗੀ, ਸਬੂਤ ਅਤੇ ਅੱਜ ਤੱਕ ਕੀਤੀ ਗਈ ਜਾਂਚ ਸ਼ਾਮਲ ਹੈ। ਇਸ ਸਬੰਧੀ ਐਨ ਸੀ ਬੀ ਨੇ ਦੱਸਿਆ ਕਿ ਇਸ ਕੇਸ ਵਿੱਚ ਸਾਰੇ 33 ਦੋਸ਼ੀਆਂ ਵਿੱਚੋਂ ਅੱਠ ਅਜੇ ਵੀ ਜੇਲ੍ਹ ਵਿੱਚ ਹਨ, ਜਦਕਿ ਰੀਆ ਤੇ ਸ਼ੋਵਿਕ ਸਮੇਤ ਬਾਕੀ ਸਾਰੇ ਜ਼ਮਾਨਤ ਉੱਤੇ ਹਨ।