ਚੰਡੀਗੜ੍ਹ, 6 ਮਾਰਚ (ਪੋਸਟ ਬਿਊਰੋ)- ਹਰਿਆਣਾ ਵਿਧਾਨ ਸਭਾ ਦੇ ਬਜਟ ਸੈਸ਼ਨ ਦੇ ਪਹਿਲੇ ਦਿਨ ਸਾਬਕਾ ਮੁੱਖ ਮੰਤਰੀ ਭੁਪਿੰਦਰ ਸਿੰਘ ਹੁੱਡਾ ਨੇ ਮੌਜੂਦਾ ਮਨੋਹਰ ਲਾਲ ਖੱਟਰ ਸਰਕਾਰ ਵਿਰੁੱਧ ਬੇਭਰੋਸਗੀ ਮਤਾ ਪੇਸ਼ ਕਰ ਦਿੱਤਾਅਤੇ ਸਪੀਕਰ ਗਿਆਨ ਚੰਦ ਗੁਪਤਾ ਨੇ ਇਸ ਉੱਤੇ ਬਹਿਸ ਲਈ 10 ਮਾਰਚ ਤੈਅ ਕਰ ਦਿੱਤੀ ਹੈ।
ਵਰਨਣ ਯੋਗ ਹੈ ਕਿ ਹਰਿਆਣਾ ਦੀ 90 ਮੈਂਬਰੀ ਵਿਧਾਨਸਭਾ ਵਿੱਚ ਇਸ ਵੇਲੇ 88 ਮੈਂਬਰ ਹਨ। ਪਿਛਲੇ ਦਿਨੀਂ ਇਨੈਲੋ ਪਾਰਟੀ ਦੇ ਅਭੈ ਸਿੰਘ ਚੌਟਾਲਾ ਵੱਲੋਂ ਅਸਤੀਫਾ ਦੇ ਜਾਣ ਅਤੇ ਕਾਂਗਰਸ ਵਿਧਾਇਕ ਪ੍ਰਦੀਪ ਚੌਧਰੀ ਨੂੰ ਇੱਕ ਕੇਸ ਵਿੱਚ ਸਜਾ ਸੁਣਾਏ ਜਾਣ ਨਾਲ ਉਨ੍ਹਾਂ ਦੀ ਵਿਧਾਨ ਸਭਾ ਮੈਂਬਰੀ ਰੱਦ ਹੋ ਚੁੱਕੀ ਹੈ। ਬਾਕੀ 88 ਮੈਂਬਰਾਂ ਵਿੱਚ ਭਾਜਪਾ ਦੇ 40 ਵਿਧਾਇਕ ਹਨ ਅਤੇ ਉਸ ਜਨਨਾਇਕ ਜਨਤਾ ਪਾਰਟੀ(ਜੇ ਜੇ ਪੀ) ਦੇ 10 ਵਿਧਾਇਕਾਂ ਦੇ ਨਾਲ ਆਜ਼ਾਦ ਜਿੱਤੇ ਸੱਤ ਵਿਧਾਇਕਾਂ ਵਿੱਚੋਂ ਪੰਜ ਵੀ ਉਸ ਦੇ ਨਾਲ ਹੋਣ ਕਰ ਕੇ ਸਰਕਾਰ ਪੱਖੀ ਵਿਧਾਇਕਾਂ ਦੀ ਗਿਣਤੀ 55 ਬਣ ਜਾਂਦੀ ਹੈ। ਦੂਜੇ ਪਾਸੇ ਕਾਂਗਰਸ ਦੇ 30 ਵਿਧਾਇਕ ਤੇ ਹਰਿਆਣਾ ਲੋਕਹਿਤ ਪਾਰਟੀ ਦਾਇੱਕ ਵਿਧਾਇਕ ਹੈ। ਬੇਭਰੋਸਗੀ ਮਤੇ ਬਾਰੇ ਪੈ੍ਰਸ ਕਾਨਫਰੰਸ ਵਿੱਚ ਸਾਬਕਾ ਮੁੱਖ ਮੰਤਰੀ ਭੁਪਿੰਦਰ ਸਿੰਘ ਹੁੱਡਾ, ਬੀਬੀ ਬੱਤਰਾ, ਗੀਤਾ ਭੁੱਕਲ ਤੇ ਹੋਰ ਵਿਧਾਇਕਾਂ ਨੇ ਕਿਹਾ ਕਿ ਕਿਸਾਨੀ, ਪੈਟਰੋਲ, ਡੀਜਲ ਅਤੇ ਰਸੋਈ ਗੈਸ ਦੀਆਂ ਵਧ ਰਹੀਆਂ ਕੀਮਤਾਂ ਤੋਂ ਇਲਾਵਾ ਹੋਰ ਮਹਿੰਗਾਈ ਵਧਣ ਦੇ ਕਾਰਨ ਵਿਧਾਇਕਾਂ ਵਿੱਚ ਰੋਸ ਹੈ ਤੇ ਰੋਜ਼ਾਨਾ ਕਈ ਵਿਧਾਇਕਾਂ ਵੱਲੋਂ ਸਰਕਾਰ ਵਿਰੋਧੀ ਬਿਆਨ ਆ ਰਹੇ ਹਨ, ਜਿਸ ਕਰ ਕੇ ਕਾਂਗਰਸ ਪਾਰਟੀ ਬੇਭਰੋਸਗੀ ਮਤਾ ਲਿਆ ਕੇ ਸਰਕਾਰ ਦਾ ਪਰਦਾਫਾਸ਼ ਕਰੇਗੀ।