ਓਟਵਾ, 5 ਮਾਰਚ (ਪੋਸਟ ਬਿਊਰੋ) : ਕੈਨੇਡਾ ਦੀਆਂ ਮਿਊਂਸਪੈਲਿਟੀਜ਼ ਵੱਲੋਂ ਫੈਡਰਲ ਸਰਕਾਰ ਤੋਂ ਇਹ ਮੰਗ ਕੀਤੀ ਜਾ ਰਹੀ ਹੈ ਕਿ ਸਿਟੀਜ਼ ਤੇ ਹਾਊਸਿੰਗ ਮੁਹੱਈਆ ਕਰਵਾਉਣ ਵਾਲਿਆਂ ਨੂੰ ਆਉਣ ਵਾਲੇ ਬਜਟ ਵਿੱਚ 7 ਬਿਲੀਅਨ ਡਾਲਰ ਦਿੱਤੇ ਜਾਣ ਤਾਂ ਕਿ ਉਹ ਗੈਰ ਵਰਤੋਂ ਵਿੱਚ ਆਉਣ ਵਾਲੀਆਂ ਪ੍ਰੌਪਰਟੀਜ਼ ਨੂੰ ਖਰੀਦ ਸਕਣ ਤੇ ਜਲਦ ਤੋਂ ਜਲਦ ਉਨ੍ਹਾਂ ਨੂੰ ਕਿਫਾਇਤੀ ਹਾਊਸਿੰਗ ਵਿੱਚ ਤਬਦੀਲ ਕਰ ਸਕਣ।
ਫੈਡਰੇਸ਼ਨ ਆਫ ਕੈਨੇਡੀਅਨ ਮਿਊਂਸਪੈਲਿਟੀਜ਼ (ਐਫਸੀਐਮ) ਦੇ ਅੰਦਾਜ਼ੇ ਮੁਤਾਬਕ ਇਸ ਪੈਸੇ ਨਾਲ ਅਰਬਨ ਤੇ ਰੂਰਲ ਕਮਿਊਨਿਟੀਜ਼ ਵਿੱਚ 24000 ਸਥਾਈ ਕਿਫਾਇਤੀ ਹਾਊਸਿੰਗ ਯੂਨਿਟਸ ਤਿਆਰ ਕੀਤੀਆਂ ਜਾ ਸਕਦੀਆਂ ਹਨ। ਇਹ ਰਕਮ ਲਿਬਰਲਾਂ ਵੱਲੋਂ ਪਿਛਲੇ ਸਾਲ ਲਾਂਚ ਕੀਤੇ ਗਏ ਰੈਪਿਡ ਹਾਊਸਿੰਗ ਪ੍ਰੋਗਰਾਮ ਲਈ ਐਲਾਨੀ ਰਕਮ ਦਾ ਸੱਤ ਗੁਣਾਂ ਹੈ। ਉਸ ਸਮੇਂ ਸਰਕਾਰ ਨੇ ਛੇ ਮਹੀਨਿਆਂ ਦੇ ਅਰਸੇ ਲਈ ਇੱਕ ਬਿਲੀਅਨ ਡਾਲਰ ਦੀ ਰਕਮ ਰੱਖੀ ਸੀ।  
ਲਿਬਰਲਾਂ ਦੇ ਅੰਦਾਜ਼ੇ ਮੁਤਾਬਕ ਕਿਰਾਏ ਦੀਆਂ ਇਮਾਰਤਾਂ, ਮੋਟਲਜ਼ ਤੇ ਹੋਟਲਜ਼ ਨੂੰ ਤੇਜੀ ਨਾਲ ਕਿਫਾਇਤੀ ਰਿਹਾਇਸੀ ਯੂਨਿਟਸ ਵਿੱਚ ਤਬਦੀਲ ਕਰਨ ਲਈ ਸਿਟੀਜ਼ ਦੀ ਮਦਦ ਲਈ ਪ੍ਰਸਤਾਵਿਤ ਇਸ ਰਕਮ ਨਾਲ ਇਸ ਸਾਲ ਬਸੰਤ ਤੱਕ 3,000 ਯੂਨਿਟਸ ਤਿਆਰ ਕੀਤੀਆਂ ਜਾ ਸਕਦੀਆਂ ਹਨ।ਐਫਸੀਐਮ ਦੇ ਪ੍ਰੈਜ਼ੀਡੈਂਟ ਗਾਰਥ ਫਜਿਜੈਂੱਲ ਦਾ ਕਹਿਣਾ ਹੈ ਕਿ ਲਿਬਰਲਾਂ ਨੂੰ ਉਸੇ ਗੱਲ ਉੱਤੇ ਪੈਸਾ ਲਾਉਣਾ ਚਾਹੀਦਾ ਹੈ ਜਿਸ ਵਿੱਚ ਸਫਲਤਾ ਹੋਵੇ। ਇਹ ਪ੍ਰੋਗਰਾਮ ਪਹਿਲਾਂ ਹੀ ਸਫਲ ਹੋ ਚੁੱਕਿਆ ਹੈ ਤੇ ਇਹ ਅਜ਼ਮਾਇਆ ਹੋਇਆ ਨੁਸਖਾ ਹੈ।
ਜਾਣਕਾਰ ਸੂਤਰਾਂ ਦਾ ਕਹਿਣਾ ਹੈ ਕਿ ਲਿਬਰਲ ਕਈ ਹਫਤਿਆਂ ਤੋਂ ਰੈਪਿਡ ਹਾਊਸਿੰਗ ਪ੍ਰੋਗਰਾਮ ਬਾਰੇ ਵਿਚਾਰ ਵਟਾਂਦਰਾ ਕਰ ਰਹੇ ਸਨ ਤੇ ਉਨ੍ਹਾਂ ਵੱਲੋਂ ਇਹ ਸੰਕੇਤ ਵੀ ਦਿੱਤ਼ੇ ਗਏ ਹਨ ਕਿ ਇਸ ਬਜਟ ਵਿੱਚ ਇਸ ਪ੍ਰੋਗਰਾਮ ਲਈ ਰਕਮ ਰਾਖਵੀਂ ਰੱਖੀ ਜਾਵੇਗੀ।