ਕੈਲੇਫੋਰਨੀਆ, 2 ਮਾਰਚ (ਪੋਸਟ ਬਿਊਰੋ) : ਮੰਗਲਵਾਰ ਸਵੇਰੇ ਲੋਕਾਂ ਨਾਲ ਭਰੀ ਹੋਈ ਇੱਕ ਐਸਯੂਵੀ ਤੇ ਦੋ ਟਰੇਲਰ ਲੈ ਕੇ ਜਾ ਰਹੇ ਸੈਮੀਟਰੱਕ ਦਰਮਿਆਨ ਟੱਕਰ ਹੋ ਜਾਣ ਕਾਰਨ 13 ਵਿਅਕਤੀ ਮਾਰੇ ਗਏ ਜਦਕਿ ਕਈ ਹੋਰ ਜ਼ਖ਼ਮੀ ਹੋ ਗਏ। ਇਹ ਹਾਦਸਾ ਮੈਕਸਿਕੋ ਦੀ ਸਰਹੱਦ ਲਾਗੇ ਰੂਰਲ ਕੈਲੇਫੋਰਨੀਆ ਕਾਊਂਟੀ ਵਿੱਚ ਹੋਇਆ।
ਹਸਪਤਾਲ ਤੇ ਪੁਲਿਸ ਅਧਿਕਾਰੀਆਂ ਵੱਲੋਂ ਮਰਨ ਵਾਲਿਆਂ ਤੇ ਜ਼ਖ਼ਮੀਆਂ ਦੀ ਗਿਣਤੀ ਵੱਖ ਵੱਖ ਦੱਸੀ ਗਈ। ਕੈਲੇਫੋਰਨੀਆਂ ਹਾਈਵੇਅ ਪੈਟਰੋਲ ਬਾਰਡਰ ਡਵੀਜ਼ਨ ਚੀਫ ਓਮਰ ਵਾਟਸਨ ਨੇ ਦੱਸਿਆ ਕਿ ਹਾਦਸੇ ਸਮੇਂ ਫੋਰਡ ਐਕਸਪੇਡਿਸ਼ਨ (ਐਸਯੂਵੀ)ਵਿੱਚ 25 ਵਿਅਕਤੀ ਸਵਾਰ ਸਨ ਤੇ ਇਸ ਹਾਦਸੇ ਵਿੱਚ 22 ਸਾਲਾ ਡਰਾਈਵਰ ਸਮੇਤ 13 ਲੋਕਾਂ ਦੀ ਮੌਤ ਹੋ ਗਈ। ਆਮ ਤੌਰ ਉੱਤੇ ਫੋਰਡ ਐਕਸਪੇਡਿਸ਼ਨ ਵਿੱਚ ਅੱਠ ਵਿਅਕਤੀ ਆਰਾਮ ਨਾਲ ਬੈਠ ਸਕਦੇ ਹਨ।
ਵਾਟਸਨ ਨੇ ਦੱਸਿਆ ਕਿ ਕੁੱਝ ਲੋਕ ਤਾਂ ਐਸਯੂਵੀ ਵਿੱਚੋਂ ਬਾਹਰ ਡਿੱਗਣ ਕਾਰਨ ਮਾਰੇ ਗਏ ਤੇ ਕੁੱਝ ਗੱਡੀ ਦੇ ਅੰਦਰ ਹੀ ਮ੍ਰਿਤਕ ਪਾਏ ਗਏ। ਉਨ੍ਹਾਂ ਦੱਸਿਆ ਕਿ 12 ਵਿਅਕਤੀਆਂ ਦੀ ਤਾਂ ਹਾਦਸੇ ਵਾਲੀ ਥਾਂ ਉੱਤੇ ਹੀ ਮੌਤ ਹੋ ਗਈ ਜਦਕਿ ਇੱਕ ਵਿਅਕਤੀ ਨੇ ਹਸਪਤਾਲ ਜਾ ਕੇ ਦਮ ਤੋੜਿਆ। ਪੁਲਿਸ ਨੂੰ ਇਸ ਹਾਦਸੇ ਦੀ ਰਿਪੋਰਟ ਸਵੇਰੇ 6:15 ਵਜੇ ਮਿਲੀ। ਹਾਦਸੇ ਸਮੇਂ ਸੈਮੀਟਰੱਕ ਸਟੇਟ ਰੋਡ 115 ਉੱਤੇ ਉੱਤਰ ਵੱਲ ਜਾ ਰਿਹਾ ਸੀ ਤੇ ਐਕਸਪੇਡਿਸ਼ਨ ਨੌਰਿਸ ਰੋਡ ਉੱਤੇ ਪੱਛਮ ਵੱਲ ਜਾ ਰਹੀ ਸੀ। ਉਨ੍ਹਾਂ ਆਖਿਆ ਕਿ ਅਜੇ ਤੱਕ ਇਹ ਪਤਾ ਨਹੀਂ ਲੱਗ ਸਕਿਆ ਹੈ ਕਿ ਐਕਸਪੇਡਿਸ਼ਨ ਸਟੌਪ ਵਾਲੇ ਸਾਈਨ ਉੱਤੇ ਰੁਕੀ ਸੀ ਜਾਂ ਨਹੀਂ ਪਰ ਐਸਯੂਵੀ ਲਾਂਘੇ ਅੰਦਰ ਦਾਖਲ ਕਰਕੇ ਸੈਮੀਟਰੱਕ ਦੇ ਸਾਹਮਣੇ ਆ ਗਈ ਜਿਸ ਕਾਰਨ ਹਾਦਸਾ ਵਾਪਰਿਆ।
ਐਸਯੂਵੀ ਵਿੱਚ ਸਵਾਰ ਲੋਕਾਂ ਦੀ ਉਮਰ 16 ਤੋਂ 55 ਸਾਲ ਤੱਕ ਸੀ। ਇਸ ਹਾਦਸੇ ਵਿੱਚ ਜ਼ਖ਼ਮੀ ਹੋਇਆ ਸੱਭ ਤੋਂ ਛੋਟਾ ਵਿਅਕਤੀ 20 ਸਾਲਾਂ ਦਾ ਹੈ। ਉਨ੍ਹਾਂ ਆਖਿਆ ਕਿ ਇਹ ਤਾਂ ਪਤਾ ਨਹੀਂ ਲੱਗ ਸਕਿਆ ਕਿ ਇਹ ਸਾਰੇ ਵਿਅਕਤੀ ਕਿੱਥੋਂ ਆ ਰਹੇ ਸਨ ਕਿਉਂਕਿ ਕਈਆਂ ਦੇ ਕੋਲ ਤਾਂ ਸ਼ਨਾਖ਼ਤ ਲਈ ਵੀ ਕੋਈ ਦਸਤਾਵੇਜ਼ ਨਹੀਂ ਸੀ। ਪਰ ਡਰਾਈਵਰ ਮੈਕਸਿਕੋ ਦੇ ਸ਼ਹਿਰ ਮੈਕਸੀਕਾਲੀ ਦਾ ਸੀ।