ਲੁਧਿਆਣਾ, 22 ਫਰਵਰੀ (ਪੋਸਟ ਬਿਊਰੋ)- ਸਬਜ਼ੀ ਲੈਣ ਗਏ ਬਾਈਕ ਸਵਾਰ ਨੌਜਵਾਨ ਨੂੰ ਸੀਮੈਂਟ ਮਿਕਸਚਰ ਟਰੱਕ ਨੇ ਕੁਚਲ ਦਿੱਤਾ। ਨੌਜਵਾਨ ਦੀ ਮੌਕੇ ਉੱਤੇ ਮੌਤ ਹੋ ਗਈ। ਇਸ ਦੌਰਾਨ ਲੋਕ ਭੜਕ ਗਏ ਅਤੇ ਟਰੱਕ ਉੱਤੇ ਪਥਰਾਓ ਕਰ ਦਿੱਤਾ। ਸੂਚਨਾ ਮਿਲਣ ਉੱਤੇ ਪਹੁੰਚੀ ਪੁਲਸ ਨੇ ਲੋਕਾਂ ਨੂੰ ਸ਼ਾਂਤ ਕਰਵਾਇਆ। ਲੋਕਾਂ ਦਾ ਦੋਸ਼ ਹੈ ਕਿ ਪੁਲਸ ਨੇ ਟਰੱਕ ਚਾਲਕ ਨੂੰ ਮੌਕੇ ਤੋਂ ਭਜਾ ਦਿੱਤਾ ਹੈ। ਪੁਲਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ। ਮ੍ਰਿਤਕ ਦੀ ਪਛਾਣ ਵਿਜੇ ਨਗਰ ਦੇ ਰਹਿਣ ਵਾਲੇ ਸੁਨੀਲ ਕੁਮਾਰ ਦੇ ਰੂਪ ਵਿੱਚ ਹੋਈ ਹੈ।
ਕੱਲ੍ਹ ਦੇਰ ਸ਼ਾਮ ਫੈਕਟਰੀ ਵਿੱਚ ਓਵਰਲਾਕਿੰਗ ਦਾ ਕੰਮ ਕਰਨ ਵਾਲਾ ਸੁਨੀਲ ਕੁਮਾਰ ਘਰੋਂ ਬਾਈਕ ਉੱਤੇ ਸਬਜ਼ੀ ਲੈਣ ਲਈ ਨਿਕਲਿਆ ਸੀ। ਜਦ ਉਹ ਵਿਜੈ ਨਗਰ, ਓਸਵਾਲ ਫੈਕਟਰੀ ਨੇੜੇ ਪਹੁੰਚਿਆ ਤਾਂ ਪਿੱਛੋਂ ਆ ਰਹੇ ਤੇਜ਼ ਰਫਤਾਰ ਮਿਕਸਚਰ ਟਰੱਕ ਨੇ ਉਸ ਨੂੰ ਕੁਚਲ ਦਿੱਤਾ। ਮੌਕੇ ਉੱਤੇ ਸੁਨੀਲ ਦੀ ਮੌਤ ਹੋ ਗਈ। ਇਸ ਦੌਰਾਨ ਭੜਕੇ ਲੋਕਾਂ ਨੇ ਟਰੱਕ ਉੱਤੇ ਪਥਰਾਓ ਕੀਤਾ ਅਤੇ ਚਾਲਕ ਨੂੰ ਫੜਨ ਦੀ ਕੋਸ਼ਿਸ਼ ਕੀਤੀ, ਪਰ ਓਥੇ ਪਹੁੰਚੀ ਪੁਲਸ ਨੇ ਲੋਕਾਂ ਨੂੰ ਸ਼ਾਂਤ ਕਰਨ ਦੀ ਕੋਸ਼ਿਸ਼ ਕੀਤੀ। ਬਾਅਦ ਵਿੱਚ ਪੁਲਸ ਨੂੰ ਭੀੜ ਨੂੰ ਪਰੇ ਕਰਨ ਲਈ ਹਲਕਾ ਤਾਕਤ ਦੀ ਵਰਤੋਂਕਰਨੀ ਪਈ। ਸੁਨੀਲ ਦੇ ਪਿਤਾ ਨਕੁਲ ਨੇ ਦੱਸਿਆ ਕਿ ਉਸ ਦੇ ਬੇਟੇ ਦਾ ਵਿਆਹ ਸੱਤ ਸਾਲ ਪਹਿਲਾਂ ਹੋਇਆ ਸੀ। ਉਸ ਦੀਆਂ ਦੋ ਬੇਟੀਆਂ ਹਨ। ਕੱਲ੍ਹ ਉਸ ਦਾ ਬੇਟਾ ਘਰੋਂ ਸਬਜ਼ੀ ਲੈਣ ਨਿਕਲਿਆ ਸੀ। ਤੇਜ਼ ਰਫਤਾਰ ਟਰੱਕ ਨੇ ਉਸ ਨੂੰ ਕੁਚਲ ਦਿੱਤਾ।