ਓਟਵਾ, 18 ਫਰਵਰੀ (ਪੋਸਟ ਬਿਊਰੋ) : ਲੈਬੋਰੇਟਰੀ ਦੇ ਨਵੇਂ ਅਧਿਐਨ ਤੋਂ ਸਾਹਮਣੇ ਆਇਆ ਹੈ ਕਿ ਕਰੋਨਾਵਾਇਰਸ ਦੇ ਸਾਊਥ ਐਫਰੀਕਨ ਵੇਰੀਐਂਟ ਕਾਰਨ ਫਾਈਜ਼ਰ-ਬਾਇਓਐਨਟੈਕ ਤੋਂ ਹਾਸਲ ਹੋਣ ਵਾਲੀ ਐਂਟੀਬੌਡੀ ਪ੍ਰੋਟੈਕਸ਼ਨ ਦੋ ਤਿਹਾਈ ਤੱਕ ਘੱਟ ਸਕਦੀ ਹੈ। ਅਜੇ ਤੱਕ ਇਹ ਸਪਸ਼ਟ ਨਹੀੰ ਹੋ ਸਕਿਆ ਹੈ ਕਿ ਕੀ ਇਹ ਸ਼ੌਟ ਮਿਊਟੇਸ਼ਨ ਖਿਲਾਫ ਅਸਰਦਾਰ ਹੈ ਜਾਂ ਨਹੀਂ। ਇਹ ਖੁਲਾਸਾ ਕੰਪਨੀਆਂ ਵੱਲੋਂ ਕੀਤਾ ਗਿਆ।
ਅਧਿਐਨ ਵਿੱਚ ਇਹ ਵੀ ਪਾਇਆ ਗਿਆ ਕਿ ਵੈਕਸੀਨ ਵਾਇਰਸ ਨੂੰ ਨਿਊਟਰਲਾਈਜ਼ ਕਰਨ ਦੇ ਕਾਬਲ ਹੈ ਤੇ ਟ੍ਰਾਇਲਜ਼ ਤੋਂ ਇਹ ਸਬੂਤ ਵੀ ਨਹੀਂ ਮਿਲੇ ਹਨ ਕਿ ਵੇਰੀਐਂਟ ਨਾਲ ਵੈਕਸੀਨ ਦੀ ਪ੍ਰੋਟੈਕਸ਼ਨ ਘਟਦੀ ਹੈ। ਫਿਰ ਵੀ ਉਹ ਨਿਵੇਸ਼ ਕਰ ਰਹੀਆਂ ਹਨ ਤੇ ਲੋੜ ਪੈਣ ਉੱਤੇ ਐਮਆਰਐਨਏ ਵੈਕਸੀਨ ਜਾਂ ਬੂਸਟਰ ਸ਼ੌਟ ਦਾ ਅਪਡੇਟਿਡ ਵਰਜ਼ਨ ਤਿਆਰ ਕਰਨ ਲਈ ਰੈਗੂਲੇਟਰਜ਼ ਨਾਲ ਵੀ ਗੱਲਬਾਤ ਚੱਲ ਰਹੀ ਹੈ।
ਅਧਿਐਨ ਲਈ ਕੰਪਨੀਆਂ ਤੇ ਯੂਨੀਵਰਸਿਟੀ ਆਫ ਟੈਕਸਸ ਮੈਡੀਕਲ ਬ੍ਰਾਂਚ (ਯੂਟੀਐਮਬੀ) ਵਿਗਿਆਨੀਆਂ ਨੇ ਇੱਕ ਵਾਇਰਸ ਤਿਆਰ ਕੀਤਾ ਜਿਸ ਵਿੱਚ ਸਾਊਥ ਐਫਰੀਕਨ ਵੇਰੀਐਂਟ ਬੀ·1·351 ਵਾਲੀਆਂ ਮਿਊਟੇਸ਼ਨ ਹੀ ਪਾਈਆਂ ਗਈਆਂ।ਖੋਜਕਾਰੀਆਂ ਨੇ ਇਸ ਵਾਇਰਸ ਨੂੰ ਅਜਿਹੇ ਲੋਕਾਂ ਦੇ ਖੂਨ ਵਿੱਚ ਪਾ ਕੇ ਟੈਸਟ ਕੀਤਾ ਜਿਨ੍ਹਾਂ ਨੂੰ ਵੈਕਸੀਨ ਦਿੱਤੀ ਗਈ ਸੀ। ਇਸ ਤੋਂ ਬਾਅਦ ਇਹ ਪਾਇਆ ਗਿਆ ਕਿ ਐਂਟੀਬੌਡੀ ਪ੍ਰੋਟੈਕਸ਼ਨ ਵਿੱਚ ਦੋ ਤਿਹਾਈ ਦੀ ਕਮੀ ਆਈ।