ਓਟਵਾ, 16 ਫਰਵਰੀ (ਪੋਸਟ ਬਿਊਰੋ) : ਆਉਣ ਵਾਲੇ ਦਿਨਾਂ ਤੇ ਹਫਤਿਆਂ ਵਿੱਚ ਕੋਵਿਡ-19 ਵੈਕਸੀਨ ਦੀ ਸਪਲਾਈ ਵਿੱਚ ਹੌਲੀ ਹੌਲੀ ਵਾਧਾ ਹੋਣ ਦੀ ਸੰਭਾਵਨਾ ਪੈਦਾ ਹੋਈ ਹੈ, ਪ੍ਰੋਵਿੰਸ ਵੱਲੋਂ ਹੁਣ ਵੈਕਸੀਨ ਦੀ ਵੰਡ ਦਾ ਅਗਲਾ ਗੇੜ ਸ਼ੁਰੂ ਕੀਤੇ ਜਾਣ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਇਸ ਦੇ ਨਾਲ ਹੀ ਪਹਿਲੇ ਗੇੜ ਦੇ ਬਾਕੀ ਰਹਿੰਦੇ ਲੋਕਾਂ ਦਾ ਟੀਕਾਕਰਣ ਕੀਤੇ ਜਾਣ ਦਾ ਵੀ ਉਪਰਾਲਾ ਕੀਤਾ ਜਾ ਰਿਹਾ ਹੈ।
ਮੈਡੀਕਲ ਆਫੀਸਰਜ਼ ਆਫ ਹੈਲਥ ਤੇ ਹਸਪਤਾਲਾਂ ਦੇ ਸੀਈਓਜ਼ ਨੂੰ ਭੇਜੇ ਮੀਮੋ ਅਨੁਸਾਰ 80 ਸਾਲ ਤੋਂ ਉੱਪਰ ਦੇ ਬਾਲਗਾਂ, ਰਿਟਾਇਰਮੈਂਟ ਹੋਮਜ਼ ਵਿਚਲੇ ਸਟਾਫ, ਰੈਜ਼ੀਡੈਂਟਸ ਤੇ ਕੇਅਰਗਿਵਰਜ਼ ਦੇ ਨਾਲ ਨਾਲ ਸਾਰੇ ਮੂਲਵਾਸੀ ਬਾਲਗਾਂ ਨੂੰ ਅਗਲੇ ਪੜਾਅ ਵਿੱਚ ਵੈਕਸੀਨ ਦੀ ਪਹਿਲੀ ਡੋਜ਼ ਦੇਣ ਦੀ ਤਿਆਰੀ ਕੀਤੀ ਜਾ ਰਹੀ ਹੈ।
ਕੈਨੇਡਾ ਨੂੰ ਪਹਿਲਾਂ ਮਿਲੀ ਵੈਕਸੀਨ ਦੀ ਖੇਪ ਤਹਿਤ ਤਰਜੀਹੀ ਤੌਰ ਉੱਤੇ ਵੈਕਸੀਨ ਲਾਂਗ ਟਰਮ ਕੇਅਰ ਹੋਮਜ਼ ਦੇ ਸਟਾਫ, ਅਸੈਂਸ਼ੀਅਲ ਕੇਅਰਗਿਵਰਜ਼ ਤੇ ਫਰੰਟਲਾਈਨ ਹੈਲਥ ਕੇਅਰ ਵਰਕਰਜ਼ ਨੂੰ ਦਿੱਤੀ ਗਈ। ਪ੍ਰੋਵਿੰਸ ਦਾ ਕਹਿਣਾ ਹੈ ਕਿ ਹੁਣ ਪਹਿਲੇ ਗੇੜ ਦਾ ਟੀਕਾਕਰਣ ਮੁਕੰਮਲ ਹੋਣ ਵਾਲਾ ਹੈ ਤੇ ਪਹਿਲੇ ਗੇੜ ਦੀ ਬਾਕੀ ਬਚੀ ਆਬਾਦੀ ਦਾ ਟੀਕਾਕਰਣ ਸ਼ੁਰੂ ਕਰਨ ਦਾ ਸਮਾਂ ਆ ਗਿਆ ਹੈ।ਇਸ ਗੇੜ ਵਿੱਚ ਹੇਠ ਲਿਖੇ ਲੋਕਾਂ ਦਾ ਟੀਕਾਕਰਣ ਕੀਤਾ ਜਾਵੇਗਾ :
· 80 ਸਾਲਾ ਬਾਲਗ ਤੇ ਇਸ ਤੋਂ ਵੱਡੀ ਉਮਰ ਦੇ ਲੋਕ
· ਰਿਟਾਇਰਮੈਂਟ ਹੋਮਜ਼ ਦੇ ਸਟਾਫ, ਰੈਜ਼ੀਡੈਂਟਸ ਤੇ ਕੇਅਰਗਿਵਰਜ਼ ਅਤੇ ਸੀਨੀਅਰਜ਼ ਲਈ ਹੋਰ ਕੇਅਰ ਸੈਟਿੰਗਜ਼ (ਜਿਵੇਂ ਕਿ ਅਸਿਸਟਿਡ ਲਿਵਿੰਗ)
· ਹਾਈ ਪ੍ਰਾਇਓਰਿਟੀ ਲੈਵਲ ਦੇ ਹੈਲਥ ਕੇਅਰ ਵਰਕਰਜ਼
· ਸਾਰੇ ਮੂਲਵਾਸੀ ਬਾਲਗ
· ਕ੍ਰੌਨਿਕ ਹੋਮ ਕੇਅਰ ਦੇ ਬਾਲਗ
ਪ੍ਰੋਵਿੰਸ ਵੱਲੋਂ ਇਹ ਵੀ ਆਖਿਆ ਜਾ ਰਿਹਾ ਹੈ ਕਿ ਫਾਈਜ਼ਰ ਵੈਕਸੀਨ ਦੀ ਦੂਜੀ ਡੋਜ਼ ਲਈ ਅਪੁਆਇੰਟਮੈਂਟਸ ਹੁਣ 35 ਤੋਂ 45 ਦਿਨਾਂ ਦੇ ਵਕਫੇ ਨਾਲ ਦਿੱਤੀਆਂ ਜਾਣਗੀਆਂ ਜਦਕਿ ਲਾਂਗ ਟਰਮ ਕੇਅਰ, ਫਰਸਟ ਨੇਸ਼ਨਜ਼ ਐਲਡਰ ਕੇਅਰ, ਰਿਟਾਇਰਮੈਂਟ ਹੋਮਜ਼ ਦੇ ਸੀਨੀਅਰਜ਼ ਤੇ 80 ਸਾਲ ਤੋਂ ਉੱਪਰ ਦੇ ਬਾਲਗਾਂ ਨੂੰ ਇਸ ਵੈਕਸੀਨ ਦੀ ਦੂਜੀ ਡੋਜ਼ 21 ਤੇ 27 ਦਿਨਾਂ ਦੇ ਵਕਫੇ ਨਾਲ ਹਾਸਲ ਹੋ ਸਕਦੀ ਹੈ।
ਮੌਡਰਨਾ ਵੈਕਸੀਨ ਦੀ ਦੂਜੀ ਡੋਜ਼ ਪਹਿਲੀ ਡੋਜ਼ ਤੋਂ 28 ਦਿਨਾਂ ਦੇ ਬਾਅਦ ਦਿੱਤੀ ਜਾਣੀ ਜਾਰੀ ਰੱਖੀ ਜਾਵੇਗੀ। ਪਿਛਲੇ ਹਫਤੇ ਸਿਟੀ ਆਫ ਟੋਰਾਂਟੋ ਨੇ ਆਪਣੇ ਵੈਕਸੀਨ ਵੰਡ ਪਲੈਨ ਦੇ ਹਿੱਸੇ ਵਜੋਂ 9 ਕੋਵਿਡ-19 ਇਮਿਊਨਾਈਜ਼ੇਸ਼ਨ ਕਲੀਨਿਕਸ ਖੋਲ੍ਹਣ ਦੇ ਆਪਣੇ ਇਰਾਦੇ ਦਾ ਐਲਾਨ ਕੀਤਾ ਸੀ। ਇਨ੍ਹਾਂ ਕਲੀਨਿਕਸ ਨੂੰ ਹਫਤੇ ਦੇ ਸੱਤ ਦਿਨ ਅਤੇ ਰੋਜ਼ਾਨਾ ਨੌਂ ਘੰਟੇ ਦੇ ਹਿਸਾਬ ਨਾਲ ਟੋਰਾਂਟੋ ਪਬਲਿਕ ਹੈਲਥ ਵੱਲੋਂ ਆਪਰੇਟ ਕੀਤਾ ਜਾਵੇਗਾ ਤੇ ਇਸ ਦੌਰਾਨ 120,000 ਡੋਜ਼ਾਂ ਹਰ ਹਫਤੇ ਦੇਣ ਦਾ ਟੀਚਾ ਮਿਥਿਆ ਗਿਆ ਹੈ।