ਟੈਕਸਸ ਵਿੱਚ ਬਿਜਲੀ ਸਪਲਾਈ ਹੋਈ ਠੱਪ
ਡੱਲਾਸ, 15 ਫਰਵਰੀ (ਪੋਸਟ ਬਿਊਰੋ) : ਬਰਫੀਲੇ ਤੂਫਾਨ ਕਾਰਨ ਅਮਰੀਕਾ ਦੇ ਦੱਖਣੀ ਮੈਦਾਨੀ ਇਲਾਕੇ ਵਿੱਚ ਂਿਜੱਥੇ ਤਾਪਮਾਨ ਕਾਫੀ ਡਿੱਗ ਗਿਆ ਹੈ ਉੱਥੇ ਹੀ ਟੈਕਸਸ ਭਰ ਵਿੱਚ ਬਿਜਲੀ ਸਪਲਾਈ ਠੱਪ ਹੋ ਗਈ। ਭਾਰੀ ਬਰਫਬਾਰੀ ਕਾਰਨ ਉਡਾਨਾਂ ਰੱਦ ਹੋ ਗਈਆਂ ਤੇ ਅਮਰੀਕਾ ਦੇ ਕਈ ਹਿੱਸਿਆਂ ਵਿੱਚ ਟਰੈਫਿਕ ਉੱਤੇ ਵੀ ਮਾੜਾ ਅਸਰ ਪਿਆ।
ਟੈਕਸਸ ਦੀ ਇਲੈਕਟ੍ਰਿਕ ਰਿਲਾਇਬਿਲਿਟੀ ਕਾਊਂਸਲ (ਐਰਕੌਟ) ਵੱਲੋਂ ਪਹਿਲਾਂ ਹੌਲੀ ਹੌਲੀ ਕੱਟ ਲਾਉਣੇ ਸ਼ੁਰੂ ਕੀਤੇ ਗਏ ਪਰ ਸੋਮਵਾਰ ਸਵੇਰੇ ਤਾਪਮਾਨ ਹੋਰ ਡਿੱਗ ਜਾਣ ਕਾਰਨ ਬਿਜਲੀ ਸਪਲਾਈ ਠੱਪ ਹੋ ਗਈ ਜਿਸ ਕਾਰਨ ਸੈਂਕੜੇ ਲੋਕਾਂ ਨੂੰ ਪਰੇਸ਼ਾਨੀ ਝੱਲਣੀ ਪਈ। ਡੱਲਾਸ ਤੇ ਹਿਊਸਟਨ ਵਿੱਚ ਵੀ ਤਾਪਮਾਨ ਕਾਫੀ ਡਿੱਗ ਗਿਆ। ਐਰਕੌਟ ਨੇ ਟਵੀਟ ਕਰਕੇ ਟੈਕਸਸ ਦੇ ਲੋਕਾਂ ਨੂੰ ਬਿਜਲੀ ਦੀ ਵਰਤੋਂ ਘਟਾਉਣ ਲਈ ਆਖਿਆ ਤੇ ਇਹ ਵੀ ਆਖਿਆ ਕਿ ਉਨ੍ਹਾਂ ਲਈ ਟੈਕਸਸ ਵਾਸੀਆਂ ਦੀ ਸੇਫਟੀ ਸੱਭ ਤੋਂ ਪਹਿਲਾਂ ਜ਼ਰੂਰੀ ਹੈ। ਕਾਊਂਸਲ ਵੱਲੋਂ ਸਟੇਟ ਵਿੱਚ ਬਿਜਲੀ ਦੀ ਸਪਲਾਈ ਜਲਦ ਬਹਾਲ ਕਰ ਦਿੱਤੀ ਗਈ।
ਕਾਊਂਸਲ ਨੇ ਆਖਿਆ ਕਿ ਟਰੈਫਿਕ ਲਾਈਟਾਂ ਤੇ ਹੋਰ ਇਨਫਰਾਸਟ੍ਰਕਚਰ ਅਜੇ ਕੁੱਝ ਸਮੇਂ ਲਈ ਬਿਜਲੀ ਤੋਂ ਬਿਨਾਂ ਰਹਿ ਸਕਦਾ ਹੈ। ਐਰਕੌਟ ਦੇ ਪ੍ਰੈਜ਼ੀਡੈਂਟ ਤੇ ਸੀਈਓ ਬਿੱਲ ਮੈਗਨੈਂਸ ਨੇ ਆਖਿਆ ਕਿ ਹਰ ਗ੍ਰਿੱਡ ਆਪਰੇਟਰ ਤੇ ਹਰੇਕ ਇਲੈਕਟ੍ਰਿਕ ਕੰਪਨੀ ਇਸ ਸਮੇਂ ਬਿਜਲੀ ਸਪਲਾਈ ਬਹਾਲ ਕਰਨ ਵਿੱਚ ਰੁੱਝੀ ਹੋਈ ਹੈ।
ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡਨ ਨੇ ਐਤਵਾਰ ਰਾਤ ਨੂੰ ਇੱਕ ਬਿਆਨ ਜਾਰੀ ਕਰਕੇ ਟੈਕਸਸ ਵਿੱਚ ਐਮਰਜੰਸੀ ਦਾ ਐਲਾਨ ਵੀ ਕੀਤਾ। ਇਹ ਐਲਾਨ ਫੈਡਰਲ ਮਦਦ ਤੇ ਲੋਕਲ ਪੱਧਰ ਉੱਤੇ ਕੋਸਿ਼ਸ਼ਾਂ ਨੂੰ ਤੇਜ਼ ਕਰਨ ਲਈ ਕੀਤਾ ਗਿਆ।