ਮਾਂਟਰੀਅਲ, 11 ਫਰਵਰੀ (ਪੋਸਟ ਬਿਊਰੋ) : ਬੰਬਾਰਡੀਅਰ ਇਨਕਾਰਪੋਰੇਸ਼ਨ ਦਾ ਕਹਿਣਾ ਹੈ ਕਿ ਉਹ ਕੀਮਤਾਂ ਵਿੱਚ ਕਟੌਤੀ ਲਈ 1600 ਕਰਮਚਾਰੀਆਂ ਦੀ ਛਾਂਗੀ ਕਰੇਗੀ।
ਕੰਪਨੀ ਦਾ ਕਹਿਣਾ ਹੈ ਕਿ ਇਹ ਕਟੌਤੀਆਂ ਇਸ ਲਈ ਕੀਤੀਆਂ ਜਾ ਰਹੀਆਂ ਹਨ ਤਾਂ ਕਿ ਕੰਪਨੀ ਮਾਂਟਰੀਅਲ ਵਿੱਚ ਆਪਣੇ ਗਲੋਬਲ ਏਅਰਕ੍ਰਾਫਟ ਮੁਕੰਮਲ ਕਰਨ ਦੇ ਕੰਮ ਨੂੰ ਇੱਕਸਾਰ ਕਰਨ ਦੀ ਕੋਸਿ਼ਸ਼ ਕਰ ਰਹੀ ਹੈ। ਇਸ ਦੇ ਨਾਲ ਹੀ ਕੰਪਨੀ ਆਪਣੀਆਂ ਕਿਊਬਿਕ ਸਥਿਤ ਫੈਸਿਲਿਟੀਜ਼ ਵਿਚਲੇ ਘੱਟ ਵਰਤੋਂ ਵਿੱਚ ਆਉਣ ਵਾਲੇ ਹੈਂਗਰ ਤੇ ਇੰਡਸਟਰੀਅਲ ਥਾਂ ਦਾ ਮੁਲਾਂਕਣ ਵੀ ਕਰ ਰਹੀ ਹੈ।
ਬੰਬਾਰਡੀਅਰ ਨੇ ਇਹ ਵੀ ਆਖਿਆ ਕਿ ਉਹ ਇਸ ਸਾਲ ਦੇ ਅੰਤ ਤੱਕ ਲੀਅਰਜੈੱਟ ਏਅਰਕ੍ਰਾਫਟ ਦਾ ਉਤਪਾਦਨ ਵੀ ਬੰਦ ਕਰ ਦੇਵੇਗੀ ਤੇ ਇਸ ਦੀ ਥਾਂ ਉੱਤੇ ਕੰਪਨੀ ਵਧੇਰੇ ਮੁਨਾਫੇ ਵਾਲੇ ਆਪਣੇ ਚੈਲੈਂਜਰ ਤੇ ਗਲੋਬਲ ਏਅਰਕ੍ਰਾਫਟ ਨਾਲ ਜੁੜੇ ਕੰਮਾਂ ਉੱਤੇ ਧਿਆਨ ਕੇਂਦਰਿਤ ਕਰੇਗਾ। ਕੰਪਨੀ ਦਾ ਕਹਿਣਾ ਹੈ ਕਿ ਇਨ੍ਹਾਂ ਕਟੌਤੀਆਂ ਨਾਲ ਇਸ ਸਾਲ ਦੇ ਅੰਤ ਤੱਕ ਉਨ੍ਹਾਂ ਦੀ ਵਰਕਫੋਰਸ 13000 ਰਹਿ ਜਾਵੇਗੀ।
ਇਹ ਕਦਮ ਉਸ ਸਮੇਂ ਚੁੱਕਿਆ ਗਿਆ ਹੈ ਜਦੋਂ ਬੰਬਾਰਡੀਅਰ ਨੂੰ 31 ਦਸੰਬਰ ਨੂੰ ਖ਼ਤਮ ਹੋਈ ਤਿਮਾਹੀ ਵਿੱਚ 337 ਮਿਲੀਅਨ ਡਾਲਰ ਦਾ ਘਾਟਾ ਹੋਇਆ ਜਦਕਿ ਇੱਕ ਸਾਲ ਪਹਿਲਾਂ ਕੰਪਨੀ ਨੂੰ 1·72 ਬਿਲੀਅਨ ਡਾਲਰ ਦਾ ਘਾਟਾ ਪਿਆ ਸੀ। ਇਸੇ ਦੌਰਾਨ ਕੰਪਨੀ ਦੀ ਆਮਦਨ 2·34 ਬਿਲੀਅਨ ਡਾਲਰ ਰਹੀ ਜੋ ਕਿ 2·41 ਬਿਲੀਅਨ ਡਾਲਰ ਤੋਂ ਘੱਟ ਸੀ।