ਜਲੰਧਰ, 26 ਜਨਵਰੀ (ਪੋਸਟ ਬਿਊਰੋ)- ਟਰਾਂਸਪੋਰਟ ਨਗਰ ਨੇੜੇ ਗਲਤ ਦਿਸ਼ਾ `ਤੇ ਖੜ੍ਹੀ ਸਰੀਏ ਨਾਲ ਲੱਦੀ ਰੇਹੜੀ ਨਾਲ ਟਕਰਾ ਕੇ ਨੇੜਿਓਂ ਲੰਘਦੇ ਟਰੱਕ ਦੀ ਲਪੇਟ ਵਿੱਚ ਆਉਣ ਨਾਲ ਰਾਸ਼ਟਰੀ ਪੱਧਰ ਦੇ ਐਥਲੀਟ ਦੀ ਮੌਤ ਹੋ ਗਈ। ਪੁਲਸ ਨੇ ਦੋਵਾਂ ਚਾਲਕਾਂ ਖ਼ਿਲਾਫ਼ ਗੈਰ-ਇਰਾਦਤਨ ਹੱਤਿਆ ਦਾ ਕੇਸ ਦਰਜ ਕਰ ਲਿਆ ਹੈ। ਮ੍ਰਿਤਕ ਐਥਲੀਟ ਦੀ ਪਛਾਣ ਬੁੱਧੀਰਾਜ ਨਿਵਾਸੀ ਗੌਂਡਾ ਉਤਰ ਪ੍ਰਦੇਸ਼ ਵਜੋਂ ਹੋਈ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਬੁੱਧੀਰਾਜ ਇੱਕ ਅਖ਼ਬਾਰ ਦੇ ਲਈ ਕੁਲੈਕਸ਼ਨ ਦਾ ਕੰਮ ਕਰਦਾ ਸੀ। ਕੱਲ੍ਹ ਦੇਰ ਸ਼ਾਮ ਉਹ ਆਪਣੇ ਮੋਟਰ ਸਾਈਕਲ `ਤੇ ਫੋਕਲ ਪੁਆਇੰਟ ਵਾਲੇ ਦਫ਼ਤਰ ਵਿੱਚ ਕੁਲੈਕਸ਼ਨ ਜਮ੍ਹਾ ਕਰਾਉਣ ਜਾ ਰਿਹਾ ਸੀ।ਜਿਉਂ ਹੀ ਉਹ ਟਰਾਂਸਪੋਰਟ ਨਗਰ ਨੇੜੇ ਪਹੁੰਚਿਆਂ ਤਾਂ ਗਲਤ ਦਿਸ਼ਾ ਅਤੇ ਗਲਤ ਤਰੀਕੇ ਨਾਲ ਸਰੀਏ ਨਾਲ ਲੱਦੀ ਖੜ੍ਹੀ ਰੇਹੜੀ ਨਾਲ ਬੁੱਧੀਰਾਜ ਦਾ ਮੋਟਰਸਾਈਕਲ ਟਕਰਾਅ ਗਿਆ, ਜਿਸ ਕਾਰਨ ਉਹ ਨੇੜਿਓਂ ਲੰਘ ਰਹੇ ਟਰੱਕ ਦੀ ਲਪੇਟ ਵਿੱਚ ਆ ਗਿਆ ਅਤੇ ਮੌਕੇ `ਤੇ ਉਸਦੀ ਮੌਤ ਹੋ ਗਈ।ਹਾਦਸੇ ਤੋਂ ਬਾਅਦ ਰਾਹਗੀਰਾਂ ਨੇ ਰੇਹੜੀ ਚਾਲਕ ਅਤੇ ਟਰੱਕ ਡਰਾਈਵਰ ਨੂੰ ਕਾਬੂ ਕਰ ਲਿਆ। ਰਾਹਗੀਰਾਂ ਨੇ ਹੀ ਬੁੱਧੀਰਾਜ ਨੂੰ ਹਸਪਤਾਲ ਪਹੁੰਚਾਇਆਂ ਪਰ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਥਾਣਾ ਨੰਬਰ ਅੱਠ ਦੇ ਇੰਚਾਰਜ ਕਮਲਜੀਤ ਸਿੰਘ ਨੇ ਦੱਸਿਆ ਕਿ ਰੇਹੜੀ ਚਾਲਕ ਤੇ ਟਰੱਕ ਡਰਾਈਵਰ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਗਿਆ ਹੈ।