ਓਨਟਾਰੀਓ, 25 ਜਨਵਰੀ (ਪੋਸਟ ਬਿਊਰੋ) : ਓਨਟਾਰੀਓ ਵੱਲੋਂ ਲਾਂਗ ਟਰਮ ਕੇਅਰ ਸਟਾਫ ਤੇ ਅਸੈਂਸ਼ੀਅਲ ਵਰਕਰਜ਼ ਨੂੰ ਦਿੱਤੀ ਜਾਣ ਵਾਲੀ ਕੋਵਿਡ-19 ਵੈਕਸੀਨੇਸ਼ਨ ਨੂੰ ਥੋੜ੍ਹੇ ਸਮੇਂ ਲਈ ਰੋਕਿਆ ਜਾ ਰਿਹਾ ਹੈ ਤਾਂ ਕਿ ਡੋਜ਼ਾਂ ਦੀ ਘਾਟ ਕਾਰਨ ਇਹ ਸ਼ੌਟਸ ਸਾਰੇ ਨਰਸਿੰਗ ਹੋਮ ਰੈਜ਼ੀਡੈਂਟਸ ਨੂੰ ਦਿੱਤੇ ਜਾ ਸਕਣ।
ਸਰਕਾਰ ਨੇ ਦੱਸਿਆ ਕਿ ਵੈਕਸੀਨ ਪਲੈਨ ਵਿੱਚ ਇਸ ਤਬਦੀਲੀ ਤੋਂ ਮਤਲਬ ਹੈ ਕਿ ਹੁਣ 5 ਫਰਵਰੀ ਤੱਕ ਸਾਰੇ ਲਾਂਗ ਟਰਮ ਕੇਅਰ ਹੋਮ ਰੈਜ਼ੀਡੈਂਟਸ, ਹਾਈ ਰਿਸਕ ਰਿਟਾਇਰਮੈਂਟ ਹੋਮ ਰੈਜ਼ੀਡੈਂਟਸ ਤੇ ਫਰਸਟ ਨੇਸ਼ਨਜ਼ ਦੇ ਐਲਡਰ ਕੇਅਰ ਰੈਜ਼ੀਡੈਂਟਸ ਨੂੰ ਇਸ ਵੈਕਸੀਨ ਦੀ ਪਹਿਲੀ ਡੋਜ਼ ਦੇ ਦਿੱਤੀ ਜਾਵੇਗੀ। ਇਹ ਟੀਚਾ ਪਹਿਲਾਂ ਮਿਥੇ ਗਏ ਟੀਚੇ, ਜੋ ਕਿ 15 ਫਰਵਰੀ ਸੀ, ਤੋਂ ਪਹਿਲਾਂ ਹੀ ਹਾਸਲ ਕਰ ਲਿਆ ਜਾਵੇਗਾ। ਪਰ ਪਹਿਲਾਂ ਲਾਂਗ ਟਰਮ ਕੇਅਰ ਸਟਾਫ ਤੇ ਕੇਅਰਗਿਵਰਜ਼ ਦਾ ਟੀਕਾਕਰਣ ਵੀ ਨਾਲ ਹੀ ਹੋਣਾ ਸੀ।
ਜਿਨ੍ਹਾਂ ਨੂੰ ਫਾਈਜ਼ਰ-ਬਾਇਓਐਨਟੈਕ ਦਾ ਪਹਿਲਾ ਟੀਕਾ ਲੱਗ ਚੁੱਕਿਆ ਹੈ, ਉਨ੍ਹਾਂ ਨੂੰ ਇਸ ਵੈਕਸੀਨ ਦੀ ਦੂਜੀ ਡੋਜ਼ ਦੇਣ ਲਈ ਵੀ ਇੰਤਜ਼ਾਮ ਕੀਤੇ ਜਾ ਰਹੇ ਹਨ। ਫੋਰਡ ਸਰਕਾਰ ਦਾ ਕਹਿਣਾ ਹੈ ਕਿ ਉਹ ਪਹਿਲੀ ਤੇ ਦੂਜੀ ਡੋਜ਼ ਵਿੱਚ 21 ਤੋਂ 27 ਦਿਨ ਦਾ ਫਰਕ ਬਰਕਰਾਰ ਰੱਖੇਗੀ ਤੇ ਹੋਰਨਾਂ ਗਰੁੱਪਜ਼ ਲਈ ਦੋਵਾਂ ਡੋਜ਼ਾਂ ਦਰਮਿਆਨ ਇਹ ਅੰਤਰਾਲ 42 ਦਿਨਾਂ ਦਾ ਹੋਵੇਗਾ। ਪ੍ਰੋਵਿੰਸ ਨੂੰ ਇਸ ਸਮੇਂ ਫਾਈਜ਼ਰ-ਬਾਇਓਐਨਟੈਕ ਵੈਕਸੀਨ ਦੀ ਡਲਿਵਰੀ ਵਿੱਚ ਹੋਣ ਵਾਲੀ ਦੇਰ ਨਾਲ ਸਿੱਝਣਾ ਪੈ ਰਿਹਾ ਹੈ। ਇਸ ਹਫਤੇ ਕੋਈ ਡਲਿਵਰੀ ਨਹੀਂ ਪਹੁੰਚ ਰਹੀ।  
ਫੋਰਡ ਨੇ ਸੋਮਵਾਰ ਨੂੰ ਆਖਿਆ ਕਿ ਅਸੀਂ ਵੈਕਸੀਨ ਦੀ ਖੇਪ ਦੇ ਮੁੱਦੇ ਨੂੰ ਅਣਗੌਲਿਆ ਨਹੀਂ ਕਰ ਸਕਦੇ। ਫਾਈਜ਼ਰ ਵੈਕਸੀਨ ਦੀਆਂ ਡੋਜ਼ਾਂ ਵਿੱਚ ਹੋਣ ਵਾਲੀ ਦੇਰ ਕਾਰਨ ਸਾਨੂੰ ਸੱਭ ਤੋਂ ਵੱਧ ਲੋੜਵੰਦਾਂ ਨੂੰ ਇਹ ਸ਼ੌਟ ਸੱਭ ਤੋਂ ਪਹਿਲਾਂ ਦੇਣ ਲਈ ਆਪਣੇ ਸ਼ਡਿਊਲ ਵਿੱਚ ਥੋੜ੍ਹੀ ਫੇਰਬਦਲ ਕਰਨੀ ਪੈ ਰਹੀ ਹੈ। ਸਰਕਾਰ ਨੇ ਇਹ ਵੀ ਆਖਿਆ ਕਿ ਅਗਲੇ ਹਫਤੇ ਫਾਈਜ਼ਰ-ਬਾਇਓਐਨਟੈਕ ਦੀਆਂ 26,325 ਡੋਜ਼ਾਂ ਹਾਸਲ ਹੋਣ ਦੀ ਉਮੀਦ ਹੈ।