ਓਨਟਾਰੀਓ, 20 ਜਨਵਰੀ (ਪੋਸਟ ਬਿਊਰੋ) : ਓਨਟਾਰੀਓ ਦੇ ਸਿੱਖਿਆ ਮੰਤਰੀ ਦਾ ਕਹਿਣਾ ਹੈ ਕਿ ਵੱਖ ਵੱਖ ਪਬਲਿਕ ਹੈਲਥ ਯੂਨਿਟਸ (ਪੀਐਚਯੂਜ਼), ਜਿਨ੍ਹਾਂ ਵਿੱਚ ਹੈਲੀਬਰਟਨ, ਕਵਾਰਥਾ, ਪਾਈਨ ਰਿੱਜ ਤੇ ਪੀਟਰਬੌਰੋਅ ਪਬਲਿਕ ਹੈਲਥ ਸ਼ਾਮਲ ਹਨ, ਤੋਂ 100,000 ਤੋਂ ਵੀ ਵੱਧ ਵਿਦਿਆਰਥੀ ਅਗਲੇ ਹਫਤੇ ਤੋਂ ਇਨ ਪਰਸਨ ਲਰਨਿੰਗ ਲਈ ਸਕੂਲ ਪਰਤਣਗੇ।
ਸਿੱਖਿਆ ਮੰਤਰੀ ਸਟੀਫਨ ਲਿਚੇ ਨੇ ਇੱਕ ਬਿਆਨ ਜਾਰੀ ਕਰਕੇ ਆਖਿਆ ਕਿ ਚੀਫ ਮੈਡੀਕਲ ਆਫੀਸਰ ਆਫ ਹੈਲਥ ਦੀ ਸਲਾਹ ਉੱਤੇ ਸਰਕਾਰ ਵੱਲੋਂ ਸੱਤ ਪਬਲਿਕ ਹੈਲਥ ਯੂਨਿਟਸ ਤੇ 100,000 ਵਿਦਿਆਰਥੀਆਂ ਨੂੰ ਸੋਮਵਾਰ, 25 ਜਨਵਰੀ ਤੋਂ ਕਲਾਸਾਂ ਵਿੱਚ ਪਰਤਣ ਦੀ ਇਜਾਜ਼ਤ ਦੇ ਦਿੱਤੀ ਗਈ ਹੈ। ਓਨਟਾਰੀਓ ਦੇ ਚੀਫ ਮੈਡੀਕਲ ਆਫੀਸਰ ਆਫ ਹੈਲਥ ਡਾ· ਡੇਵਿਡ ਵਿਲੀਅਮਜ਼ ਦੀ ਸਿਫਾਰਿਸ਼ ਉੱਤੇ ਜੀਟੀਏ ਭਰ ਵਿੱਚ ਇਨ ਪਰਸਨ ਲਰਨਿੰਗ ਸਸਪੈਂਡ ਰਹੇਗੀ। ਦਰਹਾਮ ਤੇ ਹਾਲਟਨ ਰੀਜਨਜ਼ ਦੇ ਸਕੂਲਾਂ ਨੂੰ ਵੀ ਅਗਲੇ ਹੁਕਮਾਂ ਤੱਕ ਬੰਦ ਰੱਖਿਆ ਜਾਵੇਗਾ।
ਓਨਟਾਰੀਓ ਦੀ ਸਟੇਟ ਆਫ ਐਮਰਜੰਸੀ ਦੇ ਹਿੱਸੇ ਵਜੋਂ ਗ੍ਰੇਅ ਜੋਂਨ ਵਿੱਚ ਮੌਜੂਦ ਸਕੂਲਾਂ ਦੇ 10 ਫਰਵਰੀ ਨੂੰ ਇਨ ਕਲਾਸ ਲਰਨਿੰਗ ਸੁ਼ਰੂ ਕਰਨ ਦੀ ਸੰਭਾਵਨਾ ਸੀ। ਪਰ ਹੁਣ ਪ੍ਰੋਵਿੰਸ ਵੱਲੋਂ ਇਸ ਤਰੀਕ ਦੀ ਵਰਤੋਂ ਨਹੀਂ ਕੀਤੀ ਜਾ ਰਹੀ ਹੈ। ਗ੍ਰੇਅ ਜ਼ੋਨ ਵਾਲੇ ਇਲਾਕਿਆਂ ਵਿੱਚ ਵਿੰਡਸਰ, ਟੋਰਾਂਟੋ, ਪੀਲ, ਯੌਰਕ ਤੇ ਹੈਮਿਲਟਨ ਸ਼ਾਮਲ ਹਨ।