ਵਾਸਿੰ਼ਗਟਨ, 20 ਜਨਵਰੀ (ਪੋਸਟ ਬਿਊਰੋ) : ਜੋਅ ਬਾਇਡਨ ਨੇ ਅੱਜ ਅਮਰੀਕਾ ਦੇ 46ਵੇਂ ਰਾਸ਼ਟਰਪਤੀ ਵਜੋਂ ਸੰਹੁ ਚੁੱਕੀ। ਬਾਇਡਨ ਅਜਿਹੇ ਮੌਕੇ ਰਾਸ਼ਟਰਪਤੀ ਬਣੇ ਹਨ ਜਦੋਂ ਦੇਸ਼ ਬੁਰੀ ਤਰ੍ਹਾਂ ਵੰਡਿਆਂ ਹੋਇਆ ਹੈ ਤੇ ਦੂਜੇ ਪਾਸੇ ਮਹਾਂਮਾਰੀ ਕਾਰਨ ਬੁਰੀ ਤਰ੍ਹਾਂ ਝੰਬਿਆ ਜਾ ਚੁੱਕਿਆ ਹੈ।
ਸੰਹੁ ਚੁੱਕਦੇ ਸਮੇਂ ਬਾਇਡਨ ਨੇ ਆਖਿਆ ਕਿ ਇਹ ਅਮਰੀਕਾ ਦਾ ਦਿਨ ਹੈ। ਇਹ ਜਮਹੂਰੀਅਤ ਦਾ ਦਿਨ ਹੈ। ਅੱਜ ਅਸੀਂ ਕਿਸੇ ਉਮੀਦਵਾਰ ਦੀ ਜਿੱਤ ਦੇ ਨਹੀਂ ਸਗੋਂ ਕਾਰਨ ਦੀ ਜਿੱਤ ਦੇ ਜਸ਼ਨ ਮਨਾਂਵਾਂਗੇ।ਉਨ੍ਹਾਂ ਆਖਿਆ ਕਿ ਉਨ੍ਹਾਂ ਦੇ ਸੰਹੁ ਚੁੱਕਣ ਦੇ ਇਸ ਦਿਨ ਨੂੰ ਇਤਿਹਾਸ ਤੇ ਆਸ ਵਜੋਂ ਵੇਖਿਆ ਜਾਵੇਗਾ। ਆਪਣੇ ਉਦਘਾਟਨੀ ਸੰਬੋਧਨ ਵਿੱਚ ਬਾਇਡਨ ਨੇ ਆਖਿਆ ਕਿ ਦੇਸ਼ ਨੇ ਇੱਕ ਵਾਰੀ ਮੁੜ ਇਹ ਸਿੱਖ ਲਿਆ ਹੈ ਕਿ ਜਮਹੂਰੀਅਤ ਕੀਮਤੀ ਹੈ।
ਬਾਇਡਨ ਨੇ ਦੋਵਾਂ ਪਾਰਟੀਆਂ ਦੇ ਆਪਣੇ ਪੁਰਾਣੇ ਆਗੂਆਂ ਵੱਲੋਂ ਇਨ੍ਹਾਂ ਜਸ਼ਨਾਂ ਦਾ ਹਿੱਸਾ ਬਣਨ ਉੱਤੇ ਉਨ੍ਹਾਂ ਦਾ ਧੰਨਵਾਦ ਕੀਤਾ। ਇਸ ਮੌਕੇ ਸਾਬਕਾ ਵਾਈਸ ਪ੍ਰੈਜ਼ੀਡੈਂਟ ਮਾਈਕ ਪੈਂਸ ਤਾਂ ਹਾਜ਼ਰ ਹੋਏ ਪਰ ਸਾਬਕਾ ਰਾਸ਼ਟਰਪਤੀ ਡੌਨਲਡ ਟਰੰਪ ਸਵੇਰ ਸਮੇਂ ਹੀ ਫਲੋਰਿਡਾ ਰਵਾਨਾ ਹੋ ਗਏ।ਆਪਣੇ ਪਹਿਲੇ ਦਿਨ ਬਾਇਡਨ ਕਈ ਤਰ੍ਹਾਂ ਦੇ ਐਗਜੈ਼ਕਟਿਵ ਐਕਸ਼ਨ ਲੈਣਗੇ, ਜਿਨ੍ਹਾਂ ਵਿੱਚ ਮਹਾਂਮਾਰੀ, ਕਲਾਈਮੇਟ, ਇਮੀਗ੍ਰੇਸ਼ਨ ਤੇ ਹੋਰ ਕਾਫੀ ਕੁੱਝ ਸ਼ਾਮਲ ਹੈ।
ਉਨ੍ਹਾਂ ਅੱਗੇ ਆਖਿਆ ਕਿ ਉਹ ਜਾਣਦੇ ਹਨ ਕਿ ਜਿਹੜੀਆਂ ਤਾਕਤਾਂ ਵੱਲੋਂ ਸਾਡੇ ਵਿੱਚ ਵੰਡੀਆਂ ਪਾਈਆ ਗਈਆਂ ਹਨ ਉਹ ਡੂੰਘੀਆ ਤੇ ਅਸਲ ਹਨ। ਪਰ ਅਸੀਂ ਇਹ ਵੀ ਜਾਣਦੇ ਹਾਂ ਕਿ ਇਹ ਨਵੀਂ ਨਹੀਂ ਹੈ। ਸਾਡੇ ਲਈ ਇਹ ਸੰਕਟ ਤੇ ਚੁਣੌਤੀਆਂ ਦਾ ਇਤਿਹਾਸਕ ਪਲ ਹੈ ਤੇ ਆਉਣ ਵਾਲੇ ਸਮੇਂ ਵੱਲ ਅਸੀਂ ਸਾਰਿਆਂ ਨੇ ਇੱਕਜੁੱਟ ਹੋ ਕੇ ਚੱਲਣਾ ਹੈ ਤੇ ਅਸੀਂ ਯੂਨਾਈਟਿਡ ਸਟੇਟਸ ਆਫ ਅਮਰੀਕਾ ਦੇ ਨਾਂ ਨੂੰ ਸਾਰਥਕ ਕਰਨਾ ਹੈ। ਬਾਇਡਨ ਨੇ 78 ਸਾਲ ਦੀ ਉਮਰ ਵਿੱਚ ਅਮਰੀਕਾ ਦੇ ਰਾਸ਼ਟਰਪਤੀ ਵਜੋਂ ਸੰਹੁ ਚੁੱਕੀ ਹੈ ਤੇ ਅਜਿਹਾ ਕਰਨ ਵਾਲੇ ਉਹ ਦੇਸ਼ ਦੇ ਸੱਭ ਤੋਂ ਉਮਰਦਰਾਜ਼ ਆਗੂ ਬਣ ਗਏ ਹਨ।
ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਬਾਇਡਨ ਦੇ ਸੰਹੁ ਚੁੱਕਣ ਤੋਂ ਕੁੱਝ ਸਮੇਂ ਬਾਅਦ ਹੀ ਇਹ ਬਿਆਨ ਜਾਰੀ ਕੀਤਾ ਕਿ ਉਹ ਬਾਇਡਨ ਨਾਲ ਕੰਮ ਕਰਨ ਲਈ ਪੱਬਾਂ ਭਾਰ ਹਨ।