ਨੁਸਰਤ ਭਰੂਚਾ ਖੁਸ਼ ਹੈ ਕਿ ਉਸ ਦੀ ਪਿਛਲੀ ਫਿਲਮ ‘ਛਲਾਂਗ’ ਨੂੰ ਕਾਫੀ ਪਸੰਦ ਕੀਤਾ ਗਿਆ। ਉਸ ਨੂੰ ਲੱਗਦਾ ਹੈ ਕਿ ਇਹ ਫਿਲਮ ਉਸ ਦੇ ਕਰੀਅਰ ਨੂੰ ਨਵੀਂ ਛਲਾਂਗ ਦੇਣ ਦਾ ਕੰਮ ਕਰੇਗੀ। ਕੋਰੋਨਾ ਮਹਾਮਾਰੀ ਦੇ ਬਾਵਜੂਦ ਪਿਛਲਾ ਸਾਲ ਨੁਸਰਤ ਦੇ ਕਰੀਅਰ ਦੇ ਲਈ ਕਾਫੀ ਚੰਗਾ ਰਿਹਾ, ਕਿਉਂਕਿ ਡਿਜੀਟਲ ਪਲੇਟਫਾਰਮ 'ਤੇ ਰਿਲੀਜ਼ ਉਸ ਦੀ ਫਿਲਮ ‘ਛਲਾਂਗ’ ਹਿੱਟ ਰਹੀ। ਆਪਣੀ ਇਸ ਫਿਲਮ ਦੀ ਸਫਲਤਾ 'ਤੇ ਉਤਸ਼ਾਹਤ ਨੁਸਰਤ ਦੱਸਦੀ ਹੈ, ‘‘ਇਸ ਫਿਲਮ ਵਿੱਚ ਮੈਂ ਇੱਕ ਹਰਿਆਣਵੀ ਟੀਚਰ ਦੀ ਭੂਮਿਕਾ ਨਿਭਾਈ। ਫਿਲਮ ਦੇ ਲਈ ਮੈਂ ਹਰਿਆਣਵੀ ਖੇਤਰੀ ਬੋਲੀ ਸਿੱਖੀ ਅਤੇ ਕੈਮਰੇ ਦੇ ਸਾਹਮਣੇ ਪੂਰੇ ਆਤਮਵਿਸ਼ਵਾਸ ਨਾਲ ਇਸ ਨੂੰ ਬੋਲਿਆ ਵੀ।”
‘ਛਲਾਂਗ’ ਦਾ ਨਿਰਦੇਸ਼ਨ ਹੰਸਲ ਮਹਿਤਾ ਨੇ ਕੀਤਾ ਹੈ। ਉਨ੍ਹਾਂ ਦੇ ਨਾਲ ਨੁਸਟਤ ਫਿਰ ਕੰਮ ਕਰਨ ਦੀ ਇੱਛਾ ਰੱਖਦੀ ਹੈ। ਨੁਸਰਤ ਨੇ ਕਿਹਾ, ‘‘ਮੈਂ ਹਮੇਸ਼ਾ ਹੰਸਲ ਸਰ ਦੇ ਕੰਮ ਦੀ ਵੱਡੀ ਪ੍ਰਸ਼ੰਸਕ ਰਹੀ ਹਾਂ। ਭਾਵੇਂ ਉਹ ਫਿਲਮ ‘ਸ਼ਾਹਿਦ’ ਹੋਵੇ ਜਾਂ ‘ਸਿਟੀਲਾਈਟਸ’ ਕਹਾਣੀ, ਕਹਿਣ ਤੇ ਨਿਰਦੇਸ਼ਨ ਕਰਨ ਦੇ ਉਨ੍ਹਾਂ ਦੇ ਤਰੀਕੇ ਨੇ ਮੈਨੂੰ ਹਮੇਸ਼ਾ ਹੈਰਾਨ ਕੀਤਾ ਹੈ। ਜਦੋਂ ਮੈਨੂੰ ਪਤਾ ਲੱਗਾ ਕਿ ‘ਛਲਾਂਗ’ ਦਾ ਨਿਰਦੇਸ਼ਨ ਕਰ ਰਹੇ ਹਨ ਤਾਂ ਮੇਰੀ ਖੁਸ਼ੀ ਦਾ ਕੋਈ ਟਿਕਾਣਾ ਨਹੀਂ ਸੀ। ਜੇ ਮੈਨੂੰ ਅੱਗੇ ਵੀ ਮੌਕਾ ਮਿਲਿਆ ਤਾਂ ਉਨ੍ਹਾਂ ਨਾਲ ਕੰਮ ਕਰਨ ਦੀ ਹਾਮੀ ਭਰ ਦਿਆਂਗੀ।” ਨੁਸਰਤ ਦੀਆਂ ਅਗਲੀਆਂ ਫਿਲਮਾਂ ਵਿੱਚ ਹਾਰਰ ਫਿਲਮ ‘ਛੋਰੀ’ ਸ਼ਾਮਲ ਹੈ, ਜਿਸ ਦੀ ਸ਼ੂਟਿੰਗ ਉਸ ਨੇ ਪਿੱਛੇ ਜਿਹੇ ਪੂਰੀ ਕੀਤੀ ਹੈ। ਇਸ ਦੇ ਇਲਾਵਾ ਪਿੱਛੇ ਜਿਹੇ ਉਸ ਨੇ ਸਨੀ ਕੌਸ਼ਲ ਅਤੇ ਵਿਜੇ ਵਰਮਾ ਨਾਲ ਉਮੰਗ ਕੁਮਾਰ ਦੀ ਫਿਲਮ ‘ਜਨਹਿਤ ਮੇਂ ਜਾਰੀ' ਸਾਈਨ ਕੀਤਾ ਹੈ।