ਜ਼ੀਰਕਪੁਰ, 20 ਜਨਵਰੀ (ਪੋਸਟ ਬਿਊਰੋ)- ਜ਼ੀਰਕਪੁਰ ਦੇ ਭਬਾਤ ਖੇਤਰ ਤੋਂ 100 ਮੀਟਰ ਦੂਰ ਚੰਡੀਗੜ੍ਹ ਏਅਰਫੋਰਸ ਸਟੇਸ਼ਨ ਦਾ ਸੁਰੱਖਿਆ ਘੇਰਾ ਤੋੜ ਕੇ ਇੱਕ ਸ਼ੱਕੀ ਨੌਜਵਾਨ ਕੰਧ ਟੱਪ ਕੇ ਪਾਬੰਦੀਸ਼ੁਦਾ ਖੇਤਰ ਵਿੱਚ ਚਲਾ ਗਿਆ। ਜਦ ਏਅਰਫੋਰਸ ਦੀ ਸਕਿਓਰਿਟੀ ਨੂੰ ਉਸ ਦੇ ਏਅਰਫੋਰਸ ਸਟੇਸ਼ਨ ਵਿੱਚ ਵੜਨ ਦੀ ਸੂਚਨਾ ਮਿਲੀ ਤਾਂ ਤਰਥੱਲੀ ਮੱਚ ਗਈ ਅਤੇ ਲੁਕੇ ਹੋਏ ਨੌਜਵਾਨ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ। ਫੜੇ ਗਏ ਨੌਜਵਾਨ ਨੇ ਦੱਸਿਆ ਕਿ ਉਹ ਜਹਾਜ਼ ਨਾਲ ਸੈਲਫੀ ਲੈਣ ਦੇ ਲਈ ਅੰਦਰ ਦਾਖਲ ਹੋਇਆ ਸੀ।
ਏਅਰਫੋਰਸ ਦੀਆਂ ਖੁਫੀਆ ਏਜੰਸੀਆਂ ਨੇ ਪੁੱਛਗਿੱਛ ਦੇ ਬਾਅਦ ਨੌਜਵਾਨ ਨੂੰ ਜ਼ੀਰਕਪੁਰ ਪੁਲਸ ਦੇ ਹਵਾਲੇ ਕਰ ਦਿੱਤਾ ਹੈ, ਜਿਸ ਦੇ ਖਿਲਾਫ ਜ਼ੀਰਕਪੁਰ ਪੁਲਸ ਨੇ ਵੱਖ-ਵੱਖ ਧਾਰਾਵਾਂ ਦਾ ਕੇਸਦਰਜ ਕੀਤਾ ਹੈ।ਪੁਲਸ ਮੁਤਾਬਕ ਵਿਕਾਸ ਰਾਣਾ ਉਰਫ ਕਾਕੂ (22) ਵਾਸੀ ਮਿਲਕ ਕਾਲੋਨੀ ਧਨਾਸ, ਚੰਡੀਗੜ੍ਹ ਇੱਕ ਟਰੱਕ `ਤੇ ਕੰਡਕਟਰੀ ਦਾ ਕਰਦਾ ਹੈ। ਉਹ ਸੋਮਵਾਰ ਰਾਤ ਢਾਈ ਵਜੇ ਇਥੇ ਗੋਦਾਮ ਵਿੱਚ ਮਾਲ ਲੈ ਕੇ ਆਇਆ ਸੀ। ਜਦ ਉਸ ਨੇ ਜਹਾਜ਼ ਦੇਖੇ ਤਾਂ ਉਸ ਦੀ ਹਸਰਤ ਸੈਲਫੀ ਲੈਣ ਦੀ ਹੋਈ ਤੇ ਏਅਰਫੋਰਸ ਸਟੇਸ਼ਨ ਵਿੱਚ ਵੜ ਗਿਆ। ਏਅਰਫੋਰਸ ਮੁਲਾਜ਼ਮਾਂ ਨੇ ਉਸ ਨੂੰ ਕਾਬੂ ਕਰ ਕੇ ਉਚ ਅਧਿਕਾਰੀਆਂ ਨੂੰ ਇਸ ਦੀ ਜਾਣਕਾਰੀ ਦਿੱਤੀ ਤਾਂ ਪੁਲਸ ਨੂੰ ਸੌਂਪ ਦਿੱਤਾ ਗਿਆ। ਇਸ ਦੇ ਜਾਂਚ ਅਧਿਕਾਰੀ ਏ ਐਸ ਆਈ ਰਵਿੰਦਰ ਸਿੰਘ ਨੇ ਦੱਸਿਆ ਕਿ ਨੌਜਵਾਨ ਨੂੰ ਕੋਰਟ ਵਿੱਚ ਪੇਸ਼ ਕਰ ਦੋ ਦਿਨ ਦਾ ਪੁਲਸ ਰਿਮਾਂਡ ਲਿਆ ਹੈ।