ਜਲੰਧਰ, 18 ਜਨਵਰੀ (ਪੋਸਟ ਬਿਊਰੋ)- ਲੜਕੀ ਦੀ ਜਾਇਦਾਦ ਵੱਧ ਦੇਖ ਕੇ ਲਾਲਚ ਵਿੱਚ ਵਿਆਹ ਕਰਨ ਦੇ ਬਾਅਦ ਪਤੀ ਆਪਣੀ ਭੈਣ ਦੇ ਵਿਆਹ ਲਈ ਦਾਜ ਮੰਗਣ ਲੱਗਾ। ਉਹ ਜਦ ਦੁਬਈ ਚਲਾ ਗਿਆ ਤਾਂ ਪਿੱਛੋਂ ਸੱਸ-ਸਹੁਰਾ ਪ੍ਰੇਸ਼ਾਨ ਕਰਨ ਲੱਗੇ।ਇਸ ਬਾਰੇ ਮਿਲੀ ਸਿ਼ਕਾਇਤ ਦੀ ਜਾਂਚ ਦੇ ਬਾਅਦ ਪੁਲਸ ਨੇ ਫਗਵਾੜਾ ਦੇ ਵਸਨੀਕਦੋਸ਼ੀ ਸੁਨੀਲ ਕੁਮਾਰ, ਉਸ ਦੇ ਪਿਤਾ ਜੋਗਿੰਦਰ ਸਿੰਘ ਅਤੇ ਮਾਂ ਸੁਦਰਸ਼ਨ ਦੇ ਖਿਲਾਫ ਥਾਣਾ ਭੋਗਪੁਰ ਵਿੱਚ ਕੇਸ ਦਰਜ ਕੀਤਾ ਹੈ।
ਪੁਲਸ ਨੂੰ ਦਿੱਤੇ ਬਿਆਨਾਂ ਵਿੱਚ ਗੁਰੂ ਨਾਨਕ ਨਗਰ ਦੀ ਵਸਨੀਕ ਅਵਨੀਤ ਕੌਰ ਨੇ ਦੱਸਿਆ ਕਿ ਉਸ ਦਾ ਵਿਆਹ ਫਗਵਾੜੇ ਦੇ ਪਿੰਡ ਭਗਤਪੁਰਾ ਦੇ ਸੁਨੀਲ ਕੁਮਾਰ ਨਾਲ ਹੋਇਆ ਸੀ। ਪਤੀ ਨੂੰ ਅਵਨੀਤ ਦੇ ਪਰਵਾਰਕ ਪਿਛੋਕੜ ਦਾਪਤਾ ਸੀ ਤੇ ਉਸ ਨੇ ਆਪਣੀ ਭੈਣ ਦੇ ਵਿਆਹ ਦੇ ਬਹਾਨੇ ਪੰਜ ਲੱਖ ਰੁਪਏ ਮੰਗ ਲਏ। ਮਨ੍ਹਾ ਕੀਤਾ ਤਾਂ ਉਸ ਦੇ ਪੇਕੇ ਭੋਗਪੁਰ ਪਹੁੰਚ ਗਿਆ। ਇਸ `ਤੇ ਅਵਨੀਤ ਦੇ ਪਿਤਾ ਨੇ ਕਿਹਾ ਕਿ ਜਿੰਨੇ ਹੋ ਸਕੇ, ਕਰ ਦੇਣਗੇ। ਫਿਰ ਉਹ ਦੁਬਈ ਚਲਾ ਗਿਆ ਤਾਂ ਬਾਅਦ ਵਿੱਚ ਸੱਸ ਸੁਦਰਸ਼ਨ ਅਤੇ ਸਹੁਰੇ ਜੋਗਿੰਦਰ ਸਿੰਘ ਨੇ ਪੈਸਿਆਂ ਲਈ ਤੰਗ ਕਰਨਾ ਸ਼ੁਰੂ ਕਰ ਦਿੱਤਾ। ਅਵਨੀਤ ਨੇ ਪਿਤਾ ਦੀ ਆਰਥਿਕ ਹਾਲਤ ਬਾਰੇ ਰੋ ਕੇ ਦੱਸਿਆ ਤਾਂ ਸੱਸ ਨੇ ਕਿਹਾ ਕਿ ਤੂੰ ਡਰਾਮਾ ਕਰਦੀ ਏਂ। ਸੱਸ ਨੇ ਕਿਹਾ ਕਿ ਮੇਰਾ ਇੱਕ ਹੀ ਬੇਟਾ ਹੈ, ਕਈ ਅਮੀਰ ਘਰਾਂ ਦੇ ਰਿਸ਼ਤੇ ਮਿਲ ਜਾਂਦੇ, ਪਰ ਸਾਨੂੰ ਪਤਾ ਸੀ ਕਿ ਤੁਸੀਂ ਪਰਵਾਰ ਵਿੱਚ ਦੋ ਧੀਆਂ ਹੋ, ਵਿਆਹ ਦੇ ਬਾਅਦ ਜਾਇਦਾਦ ਤੁਹਾਡੀ ਹੋਵੇਗੀ, ਪਰ ਤੂੰ ਪੈਸੇ ਨਹੀਂ ਲਿਆ ਰਹੀ। ਇਸ ਦੇ ਬਾਅਦ ਉਨ੍ਹਾਂ ਨੇ ਅਵਨੀਤ ਨੂੰ ਖਾਣਾ ਤੱਕ ਪੁੱਛਣਾ ਬੰਦ ਕਰ ਦਿਤਾ। ਤਬੀਅਤ ਵਿਗੜਨ `ਤੇ ਅਵਨੀਤ ਨੇ ਪਿਤਾ ਨੂੰ ਦੱਸਿਆ ਤਾਂ ਅਵਨੀਤ ਦੇ ਪਿਤਾ ਖੁਦ ਉਸ ਨੂੰ ਹਸਪਤਾਲ ਲੈ ਕੇ ਗਏ, ਜਿੱਥੇ ਸਹੁਰੇ ਨੇ ਕਿਹਾ ਕਿ ਉਹ ਅਵਨੀਤ ਨੂੰ ਲੈ ਜਾਣ। ਕੁਝ ਦਿਨ ਬਾਅਦ ਸਹੁਰੇ ਨੇ ਕਿਹਾ ਕਿ ਤਲਾਕ ਦੇ ਕਾਗਜ਼ ਬਣਾ ਲਓ। ਓਦੋਂ ਮਾਮਲੇ ਦੀ ਸ਼ਿਕਾਇਤ ਐਸ ਐਸ ਪੀਦਿਹਾਤੀ ਨੂੰ ਦਿੱਤੀ ਗਈ। ਪੁਲਸ ਨੇ ਜਾਂਚ ਕੀਤੀ ਅਤੇ ਸਹੁਰੇ ਦੇ ਫੋਨ ਤੋਂ ਅਵਨੀਤ ਦੇ ਪਤੀ ਸੁਨੀਲ ਨਾਲ ਦੁਬਈ ਵਿੱਚ ਗੱਲ ਕੀਤੀ। ਉਨ੍ਹਾਂ ਕਿਹਾ ਕਿ ਉਸ ਦਾ ਪਤੀ ਦੁਬਈ ਤੋਂ ਆ ਜਾਏਗਾ ਤਾਂ ਮਾਮਲਾ ਸੁਲਝਾ ਲੈਣਗੇ, ਪਰ ਉਹ ਨਹੀਂ ਆਇਆ। ਮਾਮਲੇ ਦੀ ਜਾਂਚ ਥਾਣਾ ਭੋਗਪੁਰ ਦੀ ਪੁਲਸ ਵੱਲੋਂ ਸ਼ੁਰੂ ਕੀਤੀ ਗਈ ਅਤੇ ਪਰਚਾ ਦਰਜ ਕਰ ਲਿਆ ਗਿਆ ਹੈ।