ਤਿਆਨਜਿ਼ਨ, 17 ਜਨਵਰੀ (ਪੋਸਟ ਬਿਊਰੋ) : ਪੂਰਬੀ ਚੀਨ ਵਿੱਚ ਤਿਆਰ ਕੀਤੀ ਜਾਣ ਵਾਲੀ ਆਈਸਕ੍ਰੀਮ ਉੱਤੇ ਕਰੋਨਾਵਾਇਰਸ ਪਾਏ ਜਾਣ ਤੋਂ ਬਾਅਦ ਉਸ ਬੈਚ ਦੇ ਸਾਰੇ ਕਾਰਟਨਜ਼ ਨੂੰ ਵਾਪਿਸ ਮੰਗਵਾ ਲਿਆ ਗਿਆ ਹੈ। ਇਹ ਜਾਣਕਾਰੀ ਸਰਕਾਰ ਵੱਲੋਂ ਦਿੱਤੀ ਗਈ।
ਸਿਟੀ ਦੀ ਸਰਕਾਰ ਵੱਲੋਂ ਜਾਰੀ ਕੀਤੇ ਬਿਆਨ ਮੁਤਾਬਕ ਬੀਜਿੰਗ ਦੇ ਨਾਲ ਲੱਗਦੇ ਤਿਆਨਜਿ਼ਨ ਵਿੱਚ ਦ ਡਾਕੀਆਓਡਾਓ ਫੂਡ ਕਾਰਪੋਰੇਸ਼ਨ ਲਿਮਟਿਡ ਨੂੰ ਸੀਲ ਕਰ ਦਿੱਤਾ ਗਿਆ ਹੈ ਤੇ ਇਸ ਦੇ ਮੁਲਾਜ਼ਮਾਂ ਦੀ ਜਾਂਚ ਕਰੋਨਾਵਾਇਰਸ ਲਈ ਕੀਤੀ ਜਾ ਰਹੀ ਹੈ।ਅਜੇ ਤੱਕ ਇਸ ਦੇ ਕੋਈ ਸਬੂਤ ਨਹੀਂ ਮਿਲੇ ਹਨ ਕਿ ਇਸ ਆਈਸਕ੍ਰੀਮ ਕਾਰਨ ਕੋਈ ਵਾਇਰਸ ਦੀ ਚਪੇਟ ਵਿੱਚ ਆਇਆ ਹੈ।
ਇਸ ਬੈਚ ਦੇ 29,000 ਕਾਰਟਨਜ਼ ਦੀ ਅਜੇ ਵਿੱਕਰੀ ਹੋਣੀ ਬਾਕੀ ਸੀ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਤਿਆਨਜਿ਼ਨ ਵਿੱਚ ਵੇਚੇ ਗਏ 390 ਕਾਰਟਨਜ਼ ਦਾ ਪਤਾ ਲਾ ਲਿਆ ਗਿਆ ਸੀ ਤੇ ਉਨ੍ਹਾਂ ਇਲਾਕਿਆਂ ਵਿੱਚ ਇਸ ਆਈਸਕ੍ਰੀਮ ਦੀ ਵਿੱਕਰੀ ਰੋਕਣ ਲਈ ਸਾਰਿਆਂ ਨੂੰ ਸੂਚਿਤ ਵੀ ਕਰ ਦਿੱਤਾ ਗਿਆ। ਸਰਕਾਰ ਨੇ ਦੱਸਿਆ ਕਿ ਇਹ ਆਈਸਕ੍ਰੀਮ ਤਿਆਰ ਕਰਨ ਲਈ ਨਿਊਜ਼ੀਲੈਂਡ ਮਿਲਕ ਪਾਊਡਰ ਤੇ ਯੂਕਰੇਨ ਦੇ ਵੇ੍ਹਅ ਪਾਊਡਰ ਦੀ ਵਰਤੋਂ ਕੀਤੀ ਗਈ ਸੀ।