ਮਾਂਟਰੀਅਲ, 11 ਜਨਵਰੀ (ਪੋਸਟ ਬਿਊਰੋ) : ਕਿਊਬਿਕ ਵਿੱਚ ਕੋਵਿਡ-19 ਵੈਕਸੀਨ ਨੂੰ ਉਸ ਸੂਰਤ ਵਿੱਚ ਢਾਹ ਲੱਗੇਗੀ ਜੇ ਪ੍ਰੋਵਿੰਸ ਨੇ ਉਹ ਸ਼ਡਿਊਲ ਅਪਨਾਉਣਾ ਜਾਰੀ ਰੱਖਿਆ ਜਿਸ ਦੀ ਵੈਕਸੀਨ ਨਿਰਮਾਤਾ ਵੱਲੋਂ ਸਿਫਾਰਿਸ਼ ਨਹੀਂ ਕੀਤੀ ਗਈ ਹੈ। ਇਹ ਖੁਲਾਸਾ ਪ੍ਰੋਵਿੰਸ਼ੀਅਲ ਆਗੂਆਂ ਵੱਲੋਂ ਕੀਤਾ ਗਿਆ।
ਸੋਮਵਾਰ ਨੂੰ ਪ੍ਰੀਮੀਅਰ ਫਰੈਂਕੌਇਸ ਲੀਗਾਲਟ ਨੇ ਆਖਿਆ ਕਿ ਓਟਵਾ ਵੱਲੋਂ ਪ੍ਰੋਵਿੰਸ਼ੀਅਲ ਸਰਕਾਰ ਨਾਲ ਇਸ ਬਾਰੇ ਗੱਲਬਾਤ ਕੀਤੀ ਜਾ ਰਹੀ ਸੀ ਕਿ ਉਨ੍ਹਾਂ ਨੂੰ ਫਾਈਜ਼ਰ ਵੱਲੋਂ ਆਪਣੀ ਵੈਕਸੀਨ ਲਈ ਦੋ ਡੋਜ਼ਾਂ ਵਾਲੇ ਸ਼ਡਿਊਲ ਨੂੰ ਅਪਨਾਏ ਜਾਣ ਦੀ ਲੋੜ ਹੈ। ਇਸ ਸ਼ਡਿਊਲ ਅਨੁਸਾਰ ਵੈਕਸੀਨ ਦੀ ਪਹਿਲੀ ਡੋਜ਼ ਦਿੱਤੇ ਜਾਣ ਤੋਂ ਤਿੰਨ ਹਫਤੇ ਬਾਅਦ ਦੂਜੀ ਡੋਜ਼ ਦਿੱਤੀ ਜਾਣੀ ਜ਼ਰੂਰੀ ਹੈ। ਪਰ ਕਿਊਬਿਕ ਸਰਕਾਰ ਦੀ ਯੋਜਨਾ ਅਨੁਸਾਰ ਤੇ ਸੋਧੇ ਹੋਏ ਸ਼ਡਿਊਲ ਮੁਤਾਬਕ ਪਹਿਲੀ ਡੋਜ਼ ਹਾਸਲ ਕਰਨ ਵਾਲੇ ਲੋਕ ਕਈ ਮਹੀਨੇ ਬਾਅਦ ਵੀ ਦੂਜੀ ਡੋਜ਼ ਹਾਸਲ ਕਰ ਸਕਦੇ ਹਨ।
ਸਰਕਾਰ ਦਾ ਦਾਅਵਾ ਹੈ ਕਿ ਇਹ ਸੋਧਿਆ ਹੋਇਆ ਸ਼ਡਿਊਲ ਵੱਧ ਤੋਂ ਵੱਧ ਲੋਕਾਂ ਨੂੰ ਵੈਕਸੀਨੇਟ ਕਰਨ ਦਾ ਉਪਰਾਲਾ ਹੈ। ਸਰਕਾਰ ਦਾ ਇੱਥੋਂ ਤੱਕ ਦਾਅਵਾ ਹੈ ਕਿ ਪਹਿਲੀ ਡੋਜ਼ ਨਾਲ ਹੀ ਲੋੜੀਂਦੀ ਇਮਿਊਨਿਟੀ ਦਾ ਪੱਧਰ ਹਾਸਲ ਹੋ ਜਾਂਦਾ ਹੈ। ਪਰ ਫਾਈਜ਼ਰ ਵੱਲੋਂ ਕਿਊਬਿਕ ਸਰਕਾਰ ਦੇ ਇਸ ਦਾਅਵੇ ਨਾਲ ਇਤਫਾਕ ਨਹੀਂ ਰੱਖਿਆ ਜਾ ਰਿਹਾ। ਲੀਗਾਲਟ ਨੇ ਆਖਿਆ ਕਿ ਫੈਡਰਲ ਸਰਕਾਰ ਵੱਲੋਂ ਉਨ੍ਹਾਂ ਨੂੰ ਇਹ ਦੱਸਿਆ ਗਿਆ ਹੈ ਕਿ ਜੇ ਅਸੀਂ ਫਾਈਜ਼ਰ ਵੱਲੋਂ ਦੱਸੇ ਗਏ ਅੰਤਰਾਲ ਉੱਤੇ ਵੈਕਸੀਨ ਦੀ ਡੋਜ਼ ਨਾ ਦਿੱਤੀ ਤਾਂ ਕੰਪਨੀ ਭਵਿੱਖ ਵਿੱਚ ਸਾਨੂੰ ਵੈਕਸੀਨ ਦੀ ਸਪਲਾਈ ਬੰਦ ਵੀ ਕਰ ਸਕਦੀ ਹੈ।
ਲੀਗਾਲਟ ਨੇ ਅੱਗੇ ਆਖਿਆ ਕਿ ਜੇ ਦੂਜੀ ਡੋਜ਼ ਨੂੰ ਰੋਕਣ ਦੀ ਕੰਪਨੀ ਵੱਲੋਂ ਗੱਲ ਆਖੀ ਗਈ ਹੈ ਤਾਂ ਅਸੀਂ ਉਸ ਵੱਲੋਂ ਦਿੱਤੇ ਨਿਰਦੇਸ਼ਾਂ ਉੱਤੇ ਹੀ ਚੱਲਾਂਗੇ ਪਰ ਜੇ ਸਾਡੇ ਕੋਲ ਚੋਣ ਕਰਨ ਦਾ ਬਦਲ ਹੈ ਤਾਂ ਅਸੀਂ ਪਹਿਲੀ ਡੋਜ਼ ਨਾਲ ਹੀ ਵੱਧ ਤੋਂ ਵੱਧ ਲੋਕਾਂ ਨੂੰ ਵੈਕਸੀਨੇਟ ਕਰਨ ਦਾ ਫੈਸਲਾ ਕਰਾਂਗੇ। ਫਾਈਜ਼ਰ ਦੇ ਬੁਲਾਰੇ ਨੇ ਆਖਿਆ ਕਿ ਕੰਪਨੀ ਵੱਲੋਂ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕੀਤੀ ਜਾਂਦੀ ਕਿ ਇਸ ਤਰ੍ਹਾ ਦੇ ਨਤੀਜੇ ਢੁਕਵੇਂ ਹੋਣਗੇ। ਪਰ ਫਾਈਜ਼ਰ ਵੱਲੋਂ ਇਸ ਗੱਲ ਉੱਤੇ ਜ਼ੋਰ ਦਿੱਤਾ ਜਾ ਰਿਹਾ ਹੈ ਕਿ ਕੈਨੇਡਾ ਭਰ ਵਿੱਚ ਹੈਲਥ ਕੈਨੇਡਾ ਵੱਲੋਂ ਜਾਰੀ ਡੋਜ਼ਾਂ ਦੇ ਸ਼ਡਿਊਲ ਦੀ ਹੀ ਪਾਲਣਾ ਕੀਤੀ ਜਾਵੇ।