ਟੋਕੀਓ, 10 ਜਨਵਰੀ (ਪੋਸਟ ਬਿਊਰੋ) : ਜਾਪਾਨ ਵਿੱਚ ਕੋਵਿਡ-19 ਵਾਇਰਸ ਦਾ ਨਵਾਂ ਵੇਰੀਐਂਟ ਮਿਲਿਆ ਹੈ। ਇਸ ਦਾ ਖੁਲਾਸਾ ਜਾਪਾਨ ਦੇ ਸਿਹਤ ਮੰਤਰੀ ਵੱਲੋਂ ਐਤਵਾਰ ਨੂੰ ਕੀਤਾ ਗਿਆ।ਇਹ ਵੇਰੀਐਂਟ ਬ੍ਰਾਜ਼ੀਲ ਦੇ ਐਮੇਜ਼ੌਨਸ ਸਟੇਟ ਤੋਂ ਆਏ ਚਾਰ ਯਾਤਰੀਆਂ ਵਿੱਚ ਪਾਇਆ ਗਿਆ।
ਮੰਤਰਾਲੇ ਦੇ ਅਧਿਕਾਰੀਆਂ ਨੇ ਆਖਿਆ ਕਿ ਇਸ ਨਵੇਂ ਵੇਰੀਐਂਟ ਖਿਲਾਫ ਵੈਕਸੀਨ ਦੇ ਅਸਰ ਨੂੰ ਜਾਨਣ ਲਈ ਅਧਿਐਨ ਕੀਤਾ ਜਾ ਰਿਹਾ ਹੈ। ਇੱਥੇ ਇਹ ਦੱਸਣਾ ਬਣਦਾ ਹੈ ਕਿ ਇਹ ਬ੍ਰਿਟੇਨ ਅਤੇ ਦੱਖਣੀ ਅਫਰੀਕਾ ਵਿੱਚ ਪਾਏ ਗਏ ਵੇਰੀਐਂਟ ਨਾਲੋਂ ਵੱਖਰਾ ਹੈ। ਸਿਹਤ ਮੰਤਰਾਲੇ ਦੀ ਬ੍ਰੀਫਿੰਗ ਵਿੱਚ ਨੈਸ਼ਨਲ ਇੰਸਟੀਚਿਊਟ ਆਫ ਇੰਫੈਕਸ਼ੀਅਸ ਡਜ਼ੀਜਿ਼ਜ਼ ਤਾਕਾਜੀ ਵਾਕਿਤਾ ਨੇ ਦੱਸਿਆ ਕਿ ਅਜੇ ਤੱਕ ਇਸ ਗੱਲ ਦੇ ਕੋਈ ਸਬੂਤ ਨਹੀਂ ਮਿਲੇ ਹਨ ਕਿ ਬ੍ਰਾਜ਼ੀਲ ਤੋਂ ਆਏ ਟਰੈਵਲਰਜ਼ ਵਿੱਚ ਪਾਇਆ ਗਿਆ ਇਹ ਵੇਰੀਐਂਟ ਬਹੁਤ ਜਿ਼ਆਦਾ ਇੰਫੈਕਸ਼ੀਅਸ ਹੈ।
ਬ੍ਰਾਜ਼ੀਲ ਦੇ ਸਿਹਤ ਮੰਤਰਾਲੇ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਜਾਪਾਨ ਦੇ ਅਧਿਕਾਰੀਆਂ ਵੱਲੋਂ ਇਹ ਜਾਣਕਾਰੀ ਦਿੱਤੀ ਗਈ ਹੈ ਕਿ ਇਸ ਨਵੇਂ ਵੇਰੀਐਂਟ ਦੀਆਂ 12 ਮਿਊਟੇਸ਼ਨਜ਼ ਹਨ। ਇਨ੍ਹਾਂ ਵਿੱਚੋਂ ਇੱਕ ਦੀ ਪਛਾਣ ਯੂਕੇ ਤੇ ਸਾਊਥ ਅਫਰੀਕਾ ਵਿੱਚ ਪਾਏ ਗਏ ਵੇਰੀਐਂਟ ਵਿੱਚ ਹੋਈ ਹੈ। ਟੋਕੀਓ ਦੇ ਹਨੇਦਾ ਏਅਰਪੋਰਟ ਉੱਤੇ 2 ਜਨਵਰੀ ਨੂੰ ਪਹੁੰਚੇ ਚਾਰ ਟਰੈਵਲਰਜ਼ ਵਿੱਚੋਂ ਇੱਕ ਨੂੰ ਸਾਹ ਲੈਣ ਵਿੱਚ ਦਿੱਕਤ ਹੋ ਰਹੀ ਸੀ, ਇੱਕ ਮਹਿਲਾ ਨੂੰ ਸਿਰਦਰਦ ਸੀ ਤੇ ਉਸ ਦਾ ਗਲਾ ਪੱਕਿਆ ਹੋਇਆ ਸੀ, ਇੱਕ ਟੀਨੇਜਰ ਨੂੰ ਬੁਖਾਰ ਸੀ ਤੇ ਇੱਕ ਟੀਨੇਜਰ ਲੜਕੀ ਵਿੱਚ ਕੋਈ ਲੱਛਣ ਨਹੀਂ ਸਨ।
ਬ੍ਰਾਜ਼ੀਲ ਦੇ ਸਿਹਤ ਮੰਤਰਾਲੇ ਨੇ ਦੱਸਿਆ ਕਿ ਸਾਰੇ ਟਰੈਵਲਰਜ਼ ਨੂੰ ਟੋਕੀਓ ਦੇ ਏਅਰਪੋਰਟ ਉੱਤੇ ਹੀ ਕੁਆਰਨਟੀਨ ਕੀਤਾ ਗਿਆ ਹੈ। ਕੋਵਿਡ-19 ਦੇ ਮਾਮਲਿਆਂ ਵਿੱਚ ਤੇਜ਼ੀ ਆਉਣ ਤੋਂ ਬਾਅਦ ਜਾਪਾਨ ਵਿੱਚ ਟੋਕੀਓ ਤੇ ਨਾਲ ਲੱਗਦੇ ਤਿੰਨ ਇਲਾਕਿਆਂ ਲਈ ਐਮਰਜੰਸੀ ਐਲਾਨੀ ਗਈ ਹੈ।