ਭੀੜ ਨੂੰ ਰੋਕਣ ਲਈ ਚਲਾਈ ਗਈ ਗੋਲੀ ਵਿੱਚ ਇੱਕ ਮਹਿਲਾ ਦੀ ਹੋਈ ਮੋਤ
ਵਾਸਿ਼ੰਗਟਨ, 6 ਜਨਵਰੀ (ਪੋਸਟ ਬਿਊਰੋ) : ਅਮਰੀਕਾ ਵਿੱਚ ਰਾਸ਼ਟਰਪਤੀ ਚੋਣਾਂ ਦੇ ਨਤੀਜਿਆਂ ਨੂੰ ਪਲਟਾਉਣ ਦੀ ਕੋਸਿ਼ਸ਼ ਤਹਿਤ ਬੁੱਧਵਾਰ ਨੂੰ ਹਿੰਸਕ ਭੀੜ ਅਮਰੀਕੀ ਕੈਪੀਟਲ (ਜਿਸ ਇਮਾਰਤ ਵਿੱਚ ਅਮਰੀਕੀ ਕਾਂਗਰਸ ਮੁਲਾਕਾਤ ਕਰਦੀ ਹੈ) ਵਿੱਚ ਦਾਖਲ ਹੋ ਗਈ। ਭੀੜ ਦੇ ਗੁੱਸੇ ਤੋਂ ਬਚਣ ਲਈ ਨੀਤੀਘਾੜਿਆਂ ਨੂੰ ਲੁਕ ਕੇ ਆਪਣੀਆਂ ਜਾਨਾਂ ਬਚਾਉਣੀਆਂ ਪਈਆਂ।
ਪਰ ਇਸ ਤੋਂ ਤੁਰੰਤ ਬਾਅਦ ਇਮਾਰਤ ਨੂੰ ਸਕਿਓਰ ਕਰ ਲਿਆ ਗਿਆ ਤੇ ਚੋਣਾਂ ਦੀ ਗਿਣਤੀ ਦਾ ਕੰਮ ਮੁੜ ਸ਼ੁਰੂ ਕਰ ਦਿੱਤਾ ਗਿਆ। ਸੈਨੇਟਰਜ਼ ਵੀ ਆਪਣੇ ਕੰਮਕਾਜ ਵਿੱਚ ਮੁੜ ਰੁੱਝ ਗਏ। ਪਰ ਦਿਨ ਵੇਲੇ ਰਾਸ਼ਟਰਪਤੀ ਡੌਨਲਡ ਟਰੰਪ ਦਾ ਸਮਰਥਨ ਕਰਨ ਵਾਲੇ ਮੁਜ਼ਾਹਰਾਕਾਰੀਆਂ ਵੱਲੋਂ ਸਕਿਊਰਿਟੀ ਦੀ ਉਲੰਘਣਾਂ ਕੀਤੇ ਜਾਣ ਦੇ ਨਾਲ ਨਾਲ ਇਮਾਰਤ ਨੂੰ ਵੀ ਨੁਕਸਾਨ ਪਹੁੰਚਾਇਆ ਗਿਆ। ਹਿੰਸਕ ਭੀੜ ਨੂੰ ਰੋਕਣ ਦੀ ਕੋਸਿ਼ਸ਼ ਦਰਮਿਆਨ ਚੱਲੀ ਗੋਲੀ ਕਾਰਨ ਇੱਕ ਮਹਿਲਾ ਦੀ ਵੀ ਮੌਤ ਹੋ ਗਈ।ਇਸ ਤੋਂ ਇਲਾਵਾ ਵਾਸਿ਼ੰਗਟਨ ਦੇ ਮੇਅਰ ਨੇ ਹਿੰਸਾ ਨੂੰ ਰੋਕਣ ਲਈ ਸ਼ਾਮ ਵੇਲੇ ਦਾ ਕਰਫਿਊ ਵੀ ਲਾ ਦਿੱਤਾ।
ਡੀਸੀ ਪੁਲਿਸ ਚੀਫ ਰੌਬਰਟ ਕੌਂਟੀ ਨੇ ਦੱਸਿਆ ਕਿ ਮੁਜ਼ਾਹਰਾਕਾਰੀਆਂ ਨੇ ਅਮਰੀਕੀ ਕੈਪੀਟਲ ਉੱਤੇ ਕਬਜਾ ਕਰਨ ਲਈ ਕੈਮੀਕਲ ਪਦਾਰਥ ਵੀ ਪੁਲਿਸ ਉੱਤੇ ਸੁੱਟੇ। ਕੈਪੀਟਲ ਨੇੜੇ ਧਮਾਕਾਖੇਜ਼ ਸਮੱਗਰੀ, ਪੁਲਿਸ ਦੇ ਦੱਸਣ ਮੁਤਾਬਕ ਪਾਈਪ ਬੰਬ, ਵੀ ਮਿਲਿਆ।ਕੌਂਟੀ ਨੇ ਆਖਿਆ ਕਿ ਇਸ ਘਟਨਾ ਨੂੰ ਦੰਗਿਆਂ ਦਾ ਦਰਜਾ ਦਿੱਤਾ ਗਿਆ। ਪੈਂਟਾਗਨ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਅਮਨ ਕਾਨੂੰਨ ਦੀ ਸਥਿਤੀ ਬਹਾਲ ਰੱਖਣ ਲਈ 1100 ਡੀਸੀ ਨੈਸ਼ਨਲ ਗਾਰਡ ਮੈਂਬਰਾਂ ਨੂੰ ਵੀ ਮੌਕੇ ਉੱਤੇ ਭੇਜਿਆ ਗਿਆ।
ਇਸ ਮਗਰੋਂ ਰਿਪਬਲਿਕਨ ਨੀਤੀਘਾੜਿਆਂ ਵੱਲੋਂ ਹੀ ਟਰੰਪ ਤੋਂਂ ਇਸ ਘਟਨਾ ਦੀ ਜਨਤਕ ਤੌਰ ਉੱਤੇ ਨਿਖੇਧੀ ਕਰਨ ਦੀ ਮੰਗ ਕੀਤੀ ਗਈ।