ਵਾਸਿ਼ੰਗਟਨ, 6 ਜਨਵਰੀ (ਪੋਸਟ ਬਿਊਰੋ) : ਜਾਰਜੀਆ ਦੀਆਂ ਦੋਵੇਂ ਸੈਨੇਟ ਸੀਟਾਂ ਡੈਮੋਕ੍ਰੈਟਸ ਦੀ ਝੋਲੀ ਆ ਪਈਆਂ ਹਨ। ਇਸ ਦੇ ਨਾਲ ਹੀ ਅਮਰੀਕਾ ਦੀ ਸੈਨੇਟ ਵਿੱਚ ਵੀ ਹੁਣ ਡੈਮੋਕ੍ਰੈਟਸ ਦਾ ਦਬਦਬਾ ਹੋ ਗਿਆ ਹੈ। ਇਸ ਨਾਲ ਰਾਸ਼ਟਰਪਤੀ ਡੌਨਲਡ ਟਰੰਪ ਨੂੰ ਆਫਿਸ ਵਿੱਚ ਆਪਣੇ ਆਖਰੀ ਦਿਨਾਂ ਵਿੱਚ ਵੱਡਾ ਝਟਕਾ ਲੱਗਿਆ ਹੈ ਜਦਕਿ ਨਵੇਂ ਰਾਸ਼ਟਰਪਤੀ ਚੁਣੇ ਗਏ ਜੋਅ ਬਾਇਡਨ ਦੀ ਸਥਿਤੀ ਵਿੱਚ ਹੋਰ ਸੁਧਾਰ ਹੋਇਆ ਹੈ।
ਡੈਮੋਕ੍ਰੈਟਸ ਦੀ ਨੁਮਾਇੰਦਗੀ ਕਰਨ ਵਾਲੇ ਜੌਨ ਓਸੌਫ ਤੇ ਰਫੇਲ ਵਾਰਨੌਕ ਨੇ ਰਿਪਬਲਿਕਨ ਉਮੀਦਵਾਰਾਂ ਡੇਵਿਡ ਪਰਡਿਊ ਤੇ ਕੈਲੀ ਲੋਏਫਲਰ ਨੂੰ ਸਿ਼ਕਸਤ ਦਿੱਤੀ। 1992 ਤੋਂ ਬਾਅਦ ਇਸ ਸਟੇਟ ਉੱਤੇ ਪਰਚਮ ਲਹਿਰਾਉਣ ਵਾਲੇ ਬਾਇਡਨ ਪਹਿਲੇ ਡੈਮੋਕ੍ਰੈਟਿਕ ਉਮੀਦਵਾਰ ਬਣ ਗਏ ਹਨ। ਵਾਰਨੌਕ ਐਟਲਾਂਟਾ ਦੀ ਉਸੇ ਚਰਚ ਵਿੱਚ ਪਾਦਰੀ ਰਹਿ ਚੁੱਕੇ ਹਨ ਜਿੱਥੇ ਸਿਵਲ ਅਧਿਕਾਰਾਂ ਦੀ ਪੈਰਵੀ ਮਾਰਟਿਨ ਲੂਥਰ ਕਿੰਗ ਜੂਨੀਅਰ ਵੱਲੋਂ ਕੀਤੀ ਗਈ ਸੀ। ਜਾਰਜੀਆ ਤੋਂ ਸੈਨੇਟ ਲਈ ਚੁਣੇ ਜਾਣ ਵਾਲੇ ਉਹ ਪਹਿਲੇ ਐਫਰੀਕਨ ਅਮੈਰੀਕਨ ਵੀ ਬਣ ਗਏ ਹਨ।
ਇਸ ਤੋਂ ਇਲਾਵਾ ਓਸੌਫ 33 ਸਾਲ ਦੀ ਉਮਰ ਵਿੱਚ ਪਹਿਲੇ ਯਹੂਦੀ ਸੈਨੇਟਰ ਬਣ ਗਏ ਹਨ। ਉਹ ਸੈਨੇਟ ਦੇ ਸੱਭ ਤੋਂ ਘੱਟ ਉਮਰ ਦੇ ਸੈਨੇਟਰ ਵੀ ਹਨ। ਇਨ੍ਹਾਂ ਦੋਵਾਂ ਆਗੂਆਂ ਦੀ ਜਿੱਤ ਜਾਰਜੀਆ ਦੀ ਸਿਆਸਤ ਵਿੱਚ ਹੋ ਰਹੀ ਤਬਦੀਲੀ ਨੂੰ ਦਰਸਾਉਂਦੀ ਹੈ। ਸਾਲ 2020 ਦੇ ਰੌਲੇ ਰੱਪੇ ਵਾਲੇ ਚੋਣ ਸੀਜ਼ਨ ਵਿੱਚ ਇਸ ਹਫਤੇ ਹੋਈਆਂ ਚੋਣਾਂ ਨੇ ਸਪਸ਼ਟ ਕਰ ਦਿੱਤਾ ਕਿ ਇਸ ਵਾਰੀ ਹਵਾ ਦਾ ਰੁਖ ਡੈਮੋਕ੍ਰੈਟਸ ਵੱਲ ਹੈ।