ਓਟਵਾ, 31 ਦਸੰਬਰ (ਪੋਸਟ ਬਿਊਰੋ): 7 ਜਨਵਰੀ ਤੋਂ ਕੈਨੇਡਾ ਪਹੁੰਚਣ ਵਾਲੇ ਹਰ ਵਿਅਕਤੀ ਕੋਲ ਕੋਵਿਡ-19 ਟੈਸਟ ਦੀ ਨੈਗੇਟਿਵ ਰਿਪੋਰਟ ਹੋਣੀ ਜ਼ਰੂਰੀ ਹੋਵੇਗੀ। ਫੈਡਰਲ ਸਰਕਾਰ ਵੱਲੋਂ ਵਿਦੇਸ਼ਾਂ ਤੋਂ ਆਉਣ ਵਾਲੇ ਸੈਲਾਨੀਆਂ ਨੂੰ ਵੀ ਇਸ ਕੰਮ ਲਈ ਤਿਆਰ ਰਹਿਣ ਦਾ ਸੰਦੇਸ਼ ਦਿੱਤਾ ਹੈ। ਜਹਾਜ਼ ਚੜ੍ਹਨ ਤੋਂ ਪਹਿਲਾਂ ਹਰ ਕਿਸੇ ਨੂੰ ਆਪਣੀ ਕੋਵਿਡ ਟੈਸਟ ਦੀ ਨੈਗੇਟਿਵ ਰਿਪੋਰਟ ਦਿਖਾਉਣੀ ਹੋਵੇਗੀ।

ਆਪਣੇ ਨਿਰਧਾਰਤ ਡਿਪਾਰਚਰ ਤੋਂ 72 ਘੰਟਿਆ ਦੇ ਅੰਦਰ ਅੰਦਰ ਹਵਾਈ ਸਫਰ ਕਰਨ ਵਾਲੇ ਪੰਜ ਸਾਲ ਤੋਂ ਉੱਪਰ ਦੇ ਵਿਅਕਤੀਆਂ ਕੋਲ ਨੈਗੇਟਿਵ ਪੀਸੀਆਰ ਟੈਸਟ ਹੋਣਾ ਜ਼ਰੂਰੀ ਹੋਵੇਗਾ ਤੇ ਜਹਾਜ਼ ਚੜ੍ਹਨ ਤੋਂ ਪਹਿਲਾਂ ਉਨ੍ਹਾਂ ਨੂੰ ਸਬੰਧਤ ਏਅਰਲਾਈਨ ਨੂੰ ਆਪਣੇ ਕੋਵਿਡ-19 ਟੈਸਟ ਦੇ ਇਹ ਨਤੀਜੇ ਵਿਖਾਉਣੇ ਹੋਣਗੇ। ਇਹ ਨੈਗੇਟਿਵ ਟੈਸਟ ਹੋਣ ਦੇ ਬਾਵਜੂਦ ਟਰੈਵਲਰਜ਼ ਨੂੰ ਕੈਨੇਡਾ ਪਹੁੰਚਣ ਤੋਂ ਬਾਅਦ 14 ਦਿਨ ਦਾ ਕੁਆਰਨਟੀਨ ਦਾ ਸਮਾਂ ਪੂਰਾ ਕਰਨਾ ਹੋਵੇਗਾ।

ਕੈਨੇਡਾ ਪਹੁੰਚਣ ਉੱਤੇ ਜਾਂ ਇਸ ਤੋਂ ਪਹਿਲਾਂ ਟਰੈਵਲਰਜ਼ ਨੂੰ ਫੈਡਰਲ ਅਧਿਕਾਰੀਆਂ ਦੇ ਮੁਲਾਂਕਣ ਲਈ ਆਪਣਾ ਕੁਆਰਨਟੀਨ ਪਲੈਨ ਮੁਹੱਈਆ ਕਰਵਾਉਣਾ ਹੋਵੇਗਾ। ਜੇ ਸਬੰਧਤ ਅਧਿਕਾਰੀ ਇਸ ਪਲੈਨ ਤੋਂ ਸੰਤੁਸ਼ਟ ਨਹੀੱ ਹੁੰਦੇ ਤਾਂ ਸਬੰਧਤ ਵਿਅਕਤੀ ਨੂੰ ਫੈਡਰਲ ਫੈਸਿਲਿਟੀ ਉੱਤੇ ਕੁਆਰਨਟੀਨ ਹੋਣਾ ਹੋਵੇਗਾ। 2021 ਸ਼ੁਰੂ ਹੋਣ ਤੋਂ ਕਈ ਘੰਟੇ ਪਹਿਲਾਂ ਆਏ ਇਸ ਬਿਆਨ ਵਿੱਚ ਆਖਿਆ ਗਿਆ ਕਿ ਵਿਦੇਸ਼ਾਂ ਵਿੱਚ ਛੁੱਟੀਆਂ ਮਨਾ ਰਹੇ ਕੈਨੇਡੀਅਨਾਂ ਨੂੰ ਤੁਰੰਤ ਕੋਵਿਡ-19 ਟੈਸਟ ਦਾ ਪ੍ਰਬੰਧ ਕਰਨਾ ਸੁ਼ਰੂ ਕਰ ਦੇਣਾ ਚਾਹੀਦਾ ਹੈ ਤਾਂ ਕਿ ਕੈਨੇਡਾ ਪਰਤਣ ਵਿੱਚ ਉਨ੍ਹਾਂ ਨੂੰ ਦੇਰ ਨਾ ਹੋਵੇ।

ਕੈਬਨਿਟ ਮੰਤਰੀਆਂ ਵੱਲੋਂ ਇੱਕ ਦਿਨ ਪਹਿਲਾਂ ਇਹ ਫੈਸਲਾ ਕੀਤਾ ਗਿਆ ਕਿ ਹੋਰਨਾਂ ਦੇਸ਼ਾਂ ਵਾਂਗ ਕੈਨੇਡਾ ਵਿੱਚ ਵੀ ਪੀਸੀਆਰ ਟੈਸਟ ਨੂੰ ਟਰੈਵਲ ਲਈ ਯਕੀਨੀ ਬਣਾਇਆ ਜਾਵੇ। ਪੀਸੀਆਰ ਟੈਸਟ ਇਸ ਤਰ੍ਹਾਂ ਤਿਆਰ ਕੀਤਾ ਗਿਆ ਹੈ ਕਿ ਇਸ ਨਾਲ ਕੋਵਿਡ-19 ਦੇ ਕਾਰਨ ਨੋਵਲ ਕਰੋਨਾਵਾਇਰਸ ਦੀ ਨਿੱਕੀ ਤੋਂ ਨਿੱਕੀ ਬਾਰੀਕੀ ਵੀ ਫੜ੍ਹ ਲਈ ਜਾਂਦੀ ਹੈ।ਇਹ ਟੈਸਟ ਨੱਕ ਜਾਂ ਮੂੰਹ ਤੋਂ ਲਏ ਜਾਣ ਵਾਲੇ ਸਵੈਬ ਰਾਹੀੱ ਕੀਤਾ ਜਾਂਦਾ ਹੈ।

ਟਰਾਂਸਪੋਰਟ ਮੰਤਰੀ ਮਾਰਕ ਗਾਰਨਿਉ ਇਸ ਨਵੇਂ ਫੈਸਲੇ ਬਾਰੇ ਏਅਰਲਾਈਨਜ਼ ਦੇ ਸੰਪਰਕ ਵਿੱਚ ਰਹੇ। ਵੀਰਵਾਰ ਨੂੰ ਸਰਕਾਰ ਨੇ ਆਖਿਆ ਕਿ 7 ਜਨਵਰੀ ਦਾ ਸਮਾਂ ਏਅਰਲਾਈਨਜ਼ ਨੂੰ ਇਸ ਲਈ ਦਿ਼ੱਤਾ ਗਿਆ ਹੈ ਤਾਂ ਕਿ ਉਹ ਨਵੇਂ ਨਿਯਮਾਂ ਲਈ ਲੋੜੀਂਦੀ ਤਿਆਰੀ ਕਰ ਲੈਣ। ਨੈਸ਼ਨਲ ਏਅਰਲਾਈਨਜ਼ ਕਾਉਂਸਲ ਆਫ ਕੈਨੇਡਾ ਵੱਲੋਂ ਓਟਵਾ ਦੀ ਇਸ ਯੋਜਨਾ ਦੀ ਨੁਕਤਾਚੀਨੀ ਕੀਤੀ ਜਾ ਰਹੀ ਹੈ। ਕਾਉਂਸਲ ਦਾ ਕਹਿਣਾ ਹੈ ਕਿ ਪੈਸੈਂਜਰਜ਼ ਕੋਲ ਉਸ ਸੂਰਤ ਵਿੱਚ ਕੀ ਚਾਰਾ ਰਹਿ ਜਾਂਦਾ ਹੈ ਜੇ ਉਨ੍ਹਾਂ ਦੀ ਜਿਊਰਿਸਡਿਕਸ਼ਨ ਉਹੋ ਜਿਹਾ ਟੈਸਟ ਮੁਹੱਈਆ ਨਹੀਂ ਕਰਵਾਉਂਦੀ ਜਿਹੋ ਜਿਹਾ ਕੈਨੇਡਾ ਸਰਕਾਰ ਨੂੰ ਮਨਜ਼ੂਰ ਹੋਵੇ। ਵਿਰੋਧੀ ਧਿਰ ਵੱਲੋਂ ਵੀ ਇਸ ਫੈਸਲੇ ਦਾ ਵਿਰੋਧ ਕੀਤਾ ਜਾ ਰਿਹਾ ਹੈ।