ਓਨਟਾਰੀਓ, 30 ਨਵੰਬਰ (ਪੋਸਟ ਬਿਊਰੋ) : ਕੋਵਿਡ-19 ਵੈਕਸੀਨ ਪ੍ਰਤੀ ਫੈਡਰਲ ਸਰਕਾਰ ਦੇ ਢਿੱਲੇ ਮੱਠੇ ਰਵੱਈਏ ਤੋਂ ਬੇਚੈਨ ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਨੇ ਇਸ ਮਾਮਲੇ ਨੂੰ ਆਪਣੇ ਹੱਥ ਵਿੱਚ ਲੈਣ ਦਾ ਫੈਸਲਾ ਕੀਤਾ ਹੈ|
ਫੋਰਡ ਦੇ ਆਫਿਸ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਪ੍ਰੀਮੀਅਰ ਫੋਰਡ ਨੇ ਸੋਮਵਾਰ ਨੂੰ ਫਾਈਜ਼ਰ ਕੈਨੇਡਾ ਦੇ ਪ੍ਰੈਜ਼ੀਡੈਂਟ ਕੋਲ ਪਿਨੋਅ ਤੇ ਐਸਟਰਾਜੈæਨੇਕਾ ਦੇ ਕੈਨੇਡੀਅਨ ਸੀਈਓ ਜੇਨ ਚੁੰਗ ਨਾਲ ਗੱਲਬਾਤ ਕੀਤੀ| ਇਨ੍ਹਾਂ ਤੋਂ ਇਲਾਵਾ ਮੰਗਲਵਾਰ ਨੂੰ ਫੋਰਡ ਵੱਲੋਂ ਜੌਹਨਸਨ ਐਂਡ ਜੌਹਨਸਨ ਦੀ ਸਬਸਿਡਰੀ ਜੈਨਸਨ ਨਾਲ ਵੀ ਗੱਲਬਾਤ ਕੀਤੇ ਜਾਣ ਦੀ ਸੰਭਾਵਨਾ ਹੈ| ਇਸ ਦੇ ਨਾਲ ਹੀ ਅਗਲੇ ਹਫਤੇ ਫੋਰਡ ਮੌਡਰਨਾ ਦੇ ਨੁਮਾਂਇੰਦਿਆਂ ਨਾਲ ਵੀ ਮੀਟਿੰਗ ਕਰਨ ਦਾ ਇਰਾਦਾ ਰੱਖਦੇ ਹਨ|
ਇੱਥੇ ਦੱਸਣਾ ਬਣਦਾ ਹੈ ਕਿ ਫਾਈਜ਼ਰ, ਮੌਡਰਨਾ ਤੇ ਐਸਟਰਾਜ਼ੈਨੇਕਾ ਦੇ ਉਤਪਾਦਕਾਂ ਵੱਲੋਂ ਕੈਨੇਡਾ ਵਿੱਚ ਆਪਣੀਆਂ ਵੈਕਸੀਨਜ਼ ਨੂੰ ਮਨਜ਼ੂਰੀ ਦਿਵਾਉਣ ਲਈ ਅਰਜ਼ੀਆਂ ਫਾਈਲ ਕੀਤੀਆਂ ਗਈਆਂ ਹਨ| ਸੋਮਵਾਰ ਨੂੰ ਵਾਅਨ, ਓਨਟਾਰੀਓ ਵਿੱਚ ਗੱਲ ਕਰਦਿਆਂ ਫੋਰਡ ਨੇ ਆਖਿਆ ਕਿ ਉਨ੍ਹਾਂ ਦੇ ਤਿੰਨ ਮੁੱਖ ਸਵਾਲ ਹਨ, ਕਿਹੋ ਜਿਹੀ ਵੈਕਸੀਨ ਲਿਆਂਦੀ ਜਾ ਰਹੀ ਹੈ, ਕਿੰਨੀਆਂ ਡੋਜ਼ਾਂ ਉਪਲਬਧ ਹੋਣਗੀਆਂ ਤੇ ਇਹ ਕਦੋਂ ਪਹੁੰਚੇਗੀ|
ਪ੍ਰੀਮੀਅਰ ਨੇ ਆਖਿਆ ਕਿ ਕੁੱਝ ਤਾਂ ਗੜਬੜ ਚੱਲ ਰਹੀ ਹੈ, ਜਾਂ ਤਾਂ ਕੋਈ ਈਮਾਨਦਾਰੀ ਤੋਂ ਕੰਮ ਨਹੀਂ ਲੈ ਰਿਹਾ ਤੇ ਜਾਂ ਫਿਰ ਕਿਸੇ ਕਿਸਮ ਦੀ ਅਸਮਰੱਥਾ ਹੈ ਤੇ ਇਹ ਦੋਵੇਂ ਮਾਮਲੇ ਵੀ ਹੋ ਸਕਦੇ ਹਨ| ਫੋਰਡ ਨੇ ਆਖਿਆ ਕਿ ਓਨਟਾਰੀਓ ਨੂੰ ਕੋਵਿਡ-19 ਵੈਕਸੀਨ ਮਨਜ਼ੂਰ ਹੋਣ ਤੋਂ ਬਾਅਦ ਕਦੋਂ ਮਿਲੇਗੀ ਇਸ ਸਬੰਧ ਵਿੱਚ ਚਾਨਣਾ ਪਾਉਣ ਦੇ ਮਾਮਲੇ ਵਿੱਚ ਫੈਡਰਲ ਸਰਕਾਰ ਵੱਲੋਂ ਪਾਰਦਰਸ਼ਤਾ ਤੇ ਤੇਜ਼ੀ ਦੀ ਵਿਖਾਈ ਜਾ ਰਹੀ ਘਾਟ ਤੋਂ ਉਹ ਪਰੇਸ਼ਾਨ ਹਨ|
ਪਿਛਲੇ ਹਫਤੇ ਫੋਰਡ ਨੇ ਇਹ ਸਵੀਕਾਰ ਕੀਤਾ ਸੀ ਕਿ ਉਨ੍ਹਾਂ ਦੀ ਸਰਕਾਰ ਵੈਕਸੀਨ ਦੀ ਖੇਪ ਹਾਸਲ ਕਰਨ ਲਈ ਫੈਡਰਲ ਸਰਕਾਰ ਤੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਤੋਂ ਸਪਸ਼ਟ ਸਮਾਂ ਸੀਮਾਂ ਚਾਹੁੰਦੀ ਹੈ ਕਿਉਂਕਿ ਇਸ ਤੋਂ ਬਿਨਾਂ ਅਗਲੇਰੀ ਕਾਰਵਾਈ ਦੀ ਯੋਜਨਾ ਊਲੀਕਣਾ ਅਸੰਭਵ ਹੈ|