ਹਿਊਸਟਨ, 30 ਨਵੰਬਰ (ਪੋਸਟ ਬਿਊਰੋ)- ਖੋਜਕਾਰਾਂ ਨੇ ਡਾਟਾ/ਸੂਚਨਾ ਨੂੰ ਇਕੱਠਾ ਕਰਨ ਲਈ ਦੁਨੀਆ ਦਾ ਸਭ ਤੋਂ ਛੋਟਾ ਯੰਤਰ ਬਣਾਇਆ ਹੈ, ਜਿਸ ਨਾਲ ਖਪਤਕਾਰਾਂ ਲਈ ਇਲੈਕਟ੍ਰਾਨਿਕਸ ਤੇ ‘ਬ੍ਰੇਨ ਇੰਸਪਾਇਰਡ ਕੰਪਿਊਟਿੰਗ` ਲਈ ਤੇਜ਼, ਛੋਟੀਆਂ ਅਤੇ ਵੱਧ ਊਰਜਾ ਵਾਲੀਆਂ ਸਸਤੀਆਂ ਇਲੈਕਟ੍ਰਾਨਿਕ ਚਿੱਪ ਬਣਾਈਆਂ ਜਾ ਸਕਣਗੀਆਂ।
‘ਬ੍ਰੇਨ ਇੰਸਪਾਇਰਡ ਕੰਪਿਊਟਿੰਗ` ਦਿਮਾਗ ਦੀ ਪੂਰੀ ਤਰ੍ਹਾਂ ਨਕਲ ਦੀ ਜਗ੍ਹਾ ਦਿਮਾਗ ਦੇ ਸਿਸਟਮ `ਤੇ ਆਧਾਰਿਤ ਗਣਨਾ ਦਾ ਮਾਡਲ ਜਾਂ ਢੰਗ ਹੁੰਦਾ ਹੈ। ਅਮਰੀਕਾ ਦੇ ਆਸਟਿਨ ਵਿੱਚ ਟੈਕਸਾਸ ਯੂਨੀਵਰਸਿਟੀ ਦੇ ਵਿਗਿਆਨੀਆਂ ਨੇ ਇਸ ਛੋਟੇ ਜਿਹੇ ਯੰਤਰ `ਚ ਵੱਧ ਡਾਟਾ ਸੁਰੱਖਿਅਤ ਕਰਨ ਦੇ ਭੌਤਿਕ ਸਿਧਾਂਤ ਦਾ ਪਤਾ ਲਾ ਲੈਣ ਦਾ ਦਾਅਵਾ ਕੀਤਾ ਹੈ। ਜਨਰਲ ‘ਨੇਚਰ ਨੈਨੋਟੈਕਨੋਲੋਜੀ` ਵਿੱਚ ਛਪੇ ਇਕ ਖੋਜ ਪੱਤਰ ਅਨੁਸਾਰ ਵਿਗਿਆਨੀਆਂ ਨੇ ਅੱਜ ਤਕ ਮੌਜੂਦ ਦੁਨੀਆ ਦੇ ਸਭ ਤੋਂ ਪਤਲੇ ਡਾਟਾ ਇਕੱਠੇ ਕਰਨ ਦੇ ਯੰਤਰ (ਮੈਮੋਰੀ ਸਟੋਰੇਜ ਡਿਵਾਇਸ) ਤੋਂ ਵੀ ਪਤਲੇ ਅਤੇ ਛੋਟੇ ਆਕਾਰ ਦਾ ਮੈਮੋਰੀ ਯੰਤਰ ਬਣਾਉਣ `ਚ ਸਫਲਤਾ ਹਾਸਲ ਕੀਤੀ ਹੈ, ਜਿਸ ਦਾ ਆਕਾਰ ਸਿਰਫ ਇੱਕ ਵਰਗ ਨੈਨੋਮੀਟਰ ਹੈ।