ਇਸਲਾਮਾਬਾਦ, 30 ਨਵੰਬਰ (ਪੋਸਟ ਬਿਊਰੋ)- ਪਾਕਿਸਤਾਨ ਦੇ ਇੱਕ ਸੰਗਠਨ ਨੇ ਦਾਅਵਾ ਕੀਤਾ ਹੈ ਕਿ ਪੰਜਾਬ ਵਿੱਚ ਮਹਿਲਾਵਾਂ ਦੇ ਜਬਰੀ ਧਰਮ ਪਰਿਵਰਤਨ ਦੇ 52 ਪ੍ਰਤੀਸ਼ਤ ਕੇਸ ਸਾਹਮਣੇ ਆਏ ਹਨ। ਖਾਸ ਤੌਰ ਉੱਤੇ ਘੱਟ ਗਿਣਤੀ ਵਰਗ ਦੀਆਂ ਘੱਟ ਉਮਰ ਦੀਆਂ ਲੜਕੀਆਂ ਨਾਲ ਅਜਿਹਾ ਹੋਇਆ ਹੈ।
ਡਾਨ ਨਿਊਜ ਦੀ ਰਿਪੋਰਟ ਮੁਤਾਬਕ ਸੈਂਟਰ ਫਾਰ ਸੋਸ਼ਲ ਜਸਟਿਸ (ਸੀ ਐਸ ਜੇ) ਨਾਮੀ ਸੰਗਠਨ ਨੇ ਆਨਲਾਈਨ ਜਬਰੀ ਧਰਮ ਪਰਿਵਰਤਨ ਦੀਆਂ ਸ਼ਿਕਾਇਤਾਂ ਅਤੇ ਧਾਰਮਿਕ ਸਤੰਤਰਤਾ ਨਾਮੀ ਵਿਸ਼ੇ `ਤੇ ਚਰਚਾ ਕੀਤੀ ਹੈ, ਜਿਸ ਵਿੱਚ ਇਸ ਗੱਲ ਦਾ ਪਤਾ ਲੱਗਾ ਹੈ। ਸੀ ਐਸ ਜੇ ਨੇ ਕਿਹਾ ਕਿ 2013 ਅਤੇ 2020 ਵਿੱਚ ਧਰਮ ਪਰਿਵਰਤਨ ਦੇ ਲੱਗਭਗ 162 ਮਾਮਲੇ ਦਰਜ ਕੀਤੇ ਗਏ, ਜਿਨ੍ਹਾਂ ਨੂੰ 1973 ਦੇ ਪਾਕਿਸਤਾਨ ਦੇ ਸੰਵਿਧਾਨ ਵਿੱਚ ਧਾਰਮਿਕ ਆਜ਼ਾਦੀ ਦੀ ਉਲੰਘਣਾ ਦੇ ਕਾਰਨ ਵਜੋਂ ਦਰਜ ਕਰਾਇਆ ਗਿਆ। ਪੰਜਾਬ ਦੇ ਇਲਾਵਾ ਇਨ੍ਹਾਂ ਵਿੱਚੋਂ 44 ਪ੍ਰਤੀਸ਼ਤ ਘਟਨਾਵਾਂ ਸਿੰਧ ਵਿੱਚ ਦਰਜ ਕੀਤੀਆਂ ਗਈਆਂ, ਜਦਕਿ ਫੈਡਰਲ ਅਤੇ ਖੈਬਰ ਪਖਤੁਨਖਵਾ ਖੇਤਰਾਂ ਵਿੱਚ 1.23 ਪ੍ਰਤੀਸ਼ਤ ਅਜਿਹੇ ਮਾਮਲੇ ਰਿਪੋਰਟ ਕੀਤੇ ਗਏ ਸਨ। ਇੱਕ ਮਾਮਲਾ ਬਲੋਚਿਸਤਾਨ ਵਿੱਚ ਦਰਜ ਕੀਤਾ ਗਿਆ ਹੈ।