ਵਿਲਮਿੰਗਟਨ, 30 ਨਵੰਬਰ (ਪੋਸਟ ਬਿਊਰੋ) : ਅਮਰੀਕਾ ਦੇ ਨਵੇਂ ਚੁਣੇ ਗਏ ਰਾਸ਼ਟਰਪਤੀ ਜੋਅ ਬਾਇਡਨ ਨੂੰ ਅਗਲੇ ਕਈ ਹਫਤਿਆਂ ਤੱਕ ਵਾਕਿੰਗ ਬੂਟ ਪਾਉਣਾ ਪੈ ਸਕਦਾ ਹੈ। ਅਜਿਹਾ ਇਸ ਲਈ ਕਿਉਂਕਿ ਆਪਣੇ ਕੁੱਤਿਆਂ ਵਿੱਚੋਂ ਇੱਕ ਨਾਲ ਖੇਡਦੇ ਸਮੇਂ ਉਨ੍ਹਾਂ ਦੇ ਇੱਕ ਪੈਰ ਵਿੱਚ ਫ੍ਰੈਕਚਰ ਹੋ ਗਿਆ। ਇਹ ਜਾਣਕਾਰੀ ਉਨ੍ਹਾਂ ਦੇ ਡਾਕਟਰ ਨੇ ਦਿੱਤੀ।
ਇਹ ਸੱਟ ਬਾਇਡਨ ਨੂੰ ਸ਼ਨਿੱਚਰਵਾਰ ਨੂੰ ਲੱਗੀ ਤੇ ਉਹ ਐਤਵਾਰ ਨੂੰ ਨਿਉਆਰਕ, ਡੈਲਾਵੇਅਰ ਵਿੱਚ ਓਰਥੋਪੈਡਿਸਟ ਨੂੰ ਮਿਲੇ। ਉਨ੍ਹਾਂ ਦੇ ਡਾਕਟਰ ਕੈਵਿਨ ਓਕੌਨਰ ਨੇ ਦੱਸਿਆ ਕਿ ਸ਼ੁਰੂਆਤੀ ਐਕਸ-ਰੇਅਜ਼ ਵਿੱਚ ਕੋਈ ਫ੍ਰੈਕਚਰ ਨਜ਼ਰ ਨਹੀਂ ਆਇਆ ਪਰ ਬਾਅਦ ਵਿੱਚ ਕਰਵਾਏ ਗਏ ਸੀਟੀ ਸਕੈਨ ਵਿੱਚ ਉਨ੍ਹਾਂ ਦੇ ਸੱਜੇ ਪੈਰ ਵਿੱਚ ਹਲਕਾ ਜਿਹਾ ਫ੍ਰੈਕਚਰ ਨਜ਼ਰ ਆਇਆ।
ਇਹ ਵੀ ਪਤਾ ਲੱਗਿਆ ਹੈ ਕਿ ਆਪਣੇ ਕੁੱਤੇ ਮੇਜਰ ਨਾਲ ਖੇਡਦੇ ਸਮੇਂ ਬਾਇਡਨ ਨੂੰ ਇਹ ਸੱਟ ਲੱਗੀ। ਮੇਜਰ ਨੂੰ ਉਨ੍ਹਾਂ ਨੇ 2018 ਵਿੱਚ ਅਡੌਪਟ ਕੀਤਾ ਸੀ ਤੇ 2008 ਦੀਆਂ ਚੋਣਾਂ ਤੋਂ ਬਾਅਦ ਉਨ੍ਹਾਂ ਆਪਣਾ ਪਹਿਲਾ ਕੁੱਤਾ ਚੈਂਪ ਲਿਆ ਸੀ। ਇਨ੍ਹਾਂ ਦੋਵਾਂ ਕੁੱਤਿਆਂ ਨੂੰ ਬਾਇਡਨਜ਼ ਆਪਣੇ ਨਾਲ ਵਾੲ੍ਹੀਟ ਹਾਊਸ ਲਿਜਾਣਗੇ ਤੇ ਉਹ ਇੱਕ ਬਿੱਲੀ ਰੱਖਣ ਬਾਰੇ ਵੀ ਵਿਚਾਰ ਕਰ ਰਹੇ ਹਨ।