* ਸਪਿਨਿੰਗ ਮਿਲ ਦਾ ਡਾਇਰੈਕਟਰ ਗ੍ਰਿਫਤਾਰ
ਲੁਧਿਆਣਾ, 28 ਨਵੰਬਰ (ਪੋਸਟ ਬਿਊਰੋ)- ਡਾਇਰੈਕਟੋਰੇਟ ਜਨਰਲ ਆਫ ਜੀ ਐਸ ਟੀ ਇੰਟੈਲੀਜੈਂਸ (ਡੀ ਜੀ ਜੀ ਆਈ) ਲੁਧਿਆਣਾ ਨੇ ਮਾਨਸਾ ਦੇ ਇੱਕ ਸਪਿਨਿੰਗ ਮਿਲ ਦੇ ਡਾਇਰੈਕਟਰ ਨੂੰ ਗ੍ਰਿਫਤਾਰ ਕੀਤਾ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਕੱਲ੍ਹ ਡੀ ਜੀ ਪੀ ਆਈ ਲੁਧਿਆਣਾ ਜ਼ੋਨਲ ਯੂਨਿਟ ਦੇ ਏ ਡੀ ਜੀ ਅਰਵਿੰਦ ਮਾਧਵਨ ਦੀ ਅਗਵਾਈ ਵਿੱਚ ਵਿਭਾਗ ਦੀ ਟੀਮ ਨੇ ਇਹ ਕਾਰਵਾਈ ਕੀਤੀ ਹੈ। ਗ੍ਰਿਫਤਾਰ ਕੀਤੇ ਗਏ ਮਿਲ ਡਾਇਰੈਕਟਰ ਨੂੰ ਕੋਰਟ ਵਿੱਚ ਪੇਸ਼ ਕਰ ਕੇ ਉਸ ਨੂੰ 14 ਦਿਨ ਦੇ ਜੁਡੀਸ਼ਲ ਰਿਮਾਂਡ ਉੱਤੇਜੇਲ੍ਹ ਭੇਜ ਦਿੱਤਾ ਗਿਆ ਹੈ। ਪਤਾ ਲੱਗਾ ਹੈ ਕਿ ਕੰਪਨੀ ਦੀ ਬੈਂਕ ਦੀ ਕੈਸ਼ ਕ੍ਰੈਡਿਟ ਲਿਮਿਟ ਵਧਾਉਣ ਲਈ ਇਸ ਮਿਲ ਵੱਲੋਂ 1600 ਕਰੋੜ ਰੁਪਏ ਦੇ ਬਿੱਲ ਆਪਣੀਆਂ ਦੂਸਰੀਆਂ ਕੰਪਨੀਆਂ ਤੋਂਕੋਈ ਮਾਲ ਖਰੀਦਣ ਬਿਨਾਂ ਜਾਰੀ ਕਰ ਦਿੱਤੇ, ਜਿਸ ਵਿੱਚ ਜੀ ਐਸ ਟੀ ਦੀ ਰਕਮ ਲਗਭਗ ਅੱਸੀ ਕਰੋੜ ਰੁਪਏ ਬਣਦੀ ਹੈ।ਵਿਭਾਗ ਦੀ ਜਾਂਚ ਵਿੱਚ ਭੇਦ ਖੁੱਲ੍ਹਣ ਦੇ ਬਾਅਦ ਮਿੱਲ ਦੇ ਡਾਇਰੈਕਟਰ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਵਿਭਾਗ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਜਾਂਚ ਵਿੱਚ ਪਤਾ ਲੱਗਾ ਕਿ ਫਰਾਡ ਕਰਨ ਵਿੱਚ ਉਸ ਕੰਪਨੀ ਨੇ ਕਾਟਨ ਯਾਰਨ ਦੇ 1600 ਕਰੋੜ ਰੁਪਏ ਦੇ ਬਿੱਲ ਕੱਟੇ ਸਨ, ਜਿਸ ਵਿੱਚ ਕਿਸੇ ਤਰ੍ਹਾਂ ਦਾ ਕੋਈ ਮਾਲ ਖਰੀਦਿਆ ਜਾਂ ਵੇਚਿਆ ਨਹੀਂ ਗਿਆ ਸੀ। ਕੰਪਨੀ ਵੱਲੋਂ ਇਨ੍ਹਾਂ ਫਰਜ਼ੀ ਬਿੱਲਾਂ ਦੇ ਓਹਲੇ ਹੇਠ ਬੈਂਕਾਂ ਤੋਂ ਕਰੋੜਾਂ ਰੁਪਏ ਦੇ ਕਰਜ਼ੇ ਲਏ ਜਾਣ ਦਾ ਸ਼ੱਕ ਵੀ ਪ੍ਰਗਟ ਕੀਤਾ ਜਾ ਰਿਹਾ ਹੈ। ਏ ਡੀ ਜੀ ਅਰਵਿੰਦ ਮਾਧਵਨ ਦੇ ਅਨੁਸਾਰ ਡੀ ਜੀ ਜੀ ਆਈ ਅਤੇ ਜੀ ਐਸ ਟੀ ਅਧਿਕਾਰੀਆਂ ਵੱਲੋਂ ਅਜਿਹੇ ਫਰਜ਼ੀਵਾੜੇ ਦੇ ਖਿਲਾਫ ਮੁਹਿੰਮ ਵਿੱਚ ਅਜਿਹੇ ਕਈ ਕੇਸ ਸਾਹਮਣੇ ਆਉਣ ਦੀ ਸੰਭਾਵਨਾ ਹੈ।