ਲੰਡਨ, 26 ਨਵੰਬਰ (ਪੋਸਟ ਬਿਊਰੋ) : ਬ੍ਰਿਟਿਸ਼ ਡਰੱਗ ਨਿਰਮਾਤਾ ਐਸਟਰਾਜ਼ੈਨੇਕਾ ਦੇ ਮੁਖੀ ਨੇ ਵੀਰਵਾਰ ਨੂੰ ਆਖਿਆ ਕਿ ਉਨ੍ਹਾਂ ਦੀ ਕੋਵਿਡ-19 ਵੈਕਸੀਨ ਲਈ ਅਜੇ ਹੋਰ ਰਿਸਰਚ ਦੀ ਲੋੜ ਹੈ| ਇਸ ਵੈਕਸੀਨ ਲਈ ਮੁਹੱਈਆ ਕਰਵਾਈ ਜਾਣ ਵਾਲੀ ਹਿਫਾਜ਼ਤ ਦੇ ਸਬੰਧ ਵਿੱਚ ਸਵਾਲ ਖੜ੍ਹੇ ਹੋਣ ਤੋਂ ਬਾਅਦ ਕੰਪਨੀ ਵੱਲੋਂ ਇਹ ਐਲਾਨ ਕੀਤਾ ਗਿਆ| ਪਰ ਯੂਰਪ ਵਿੱਚ ਇਸ ਨੂੰ ਮਿਲੀ ਮਨਜੂæਰੀ ਉੱਤੇ ਇਸ ਗੱਲ ਦਾ ਸ਼ਾਇਦ ਹੀ ਕੋਈ ਅਸਰ ਪਵੇ|
ਐਸਟਰਾਜ਼ੈਨੇਕਾ ਤੇ ਇਸ ਦੀ ਭਾਈਵਾਲ ਯੂਨੀਵਰਸਿਟੀ ਆਫ ਆਕਸਫੋਰਡ ਨੇ ਸੋਮਵਾਰ ਨੂੰ ਐਲਾਨ ਕੀਤਾ ਸੀ ਕਿ ਉਨ੍ਹਾਂ ਵੱਲੋਂ ਰਲ ਕੇ ਤਿਆਰ ਕੀਤੀ ਗਈ ਇਹ ਵੈਕਸੀਨ 70 ਫੀ ਸਦੀ ਅਸਰਦਾਰ ਹੈ ਤੇ ਇਸ ਲਈ ਉਹ ਇਸ ਨੂੰ ਮਨਜ਼ੂਰੀ ਦਿਵਾਉਣੀ ਚਾਹੁੰਦੇ ਹਨ| ਇਹ ਦਵਾਈ ਉਸ ਸੂਰਤ ਵਿੱਚ ਹੋਰ ਵੀ ਜ਼ਿਆਦਾ, 90 ਫੀ ਸਦੀ, ਅਸਰਦਾਰ ਹੋ ਜਾਂਦੀ ਹੈ ਜਦੋਂ ਇਸ ਦੀ ਸ਼ੁਰੂਆਤ ਵਿੱਚ ਅੱਧੀ ਡੋਜ਼ ਦਿੱਤੀ ਜਾਵੇ ਤੇ ਫਿਰ ਪੂਰੀ ਡੋਜ਼ ਦਿੱਤੀ ਜਾਵੇ| ਇਹ ਵੀ ਆਖਿਆ ਜਾ ਰਿਹਾ ਹੈ ਕਿ ਇਹ ਵੈਕਸੀਨ ਫਾਈਜ਼ਰ ਤੇ ਮੌਡਰਨਾ ਵੱਲੋਂ ਤਿਆਰ ਕੋਵਿਡ-19 ਦੀਆਂ ਵੈਕਸੀਨਜ਼ ਨੂੰ ਬਰਾਬਰ ਟੱਕਰ ਦੇਣ ਦੇ ਯੋਗ ਹੈ|
ਅਮਰੀਕੀ ਵਿਗਿਆਨੀਆਂ ਦਾ ਕਹਿਣਾ ਹੈ ਕਿ ਇਸ ਦਾ ਅਸਰ 55 ਸਾਲ ਤੇ ਇਸ ਤੋਂ ਘੱਟ ਉਮਰ ਵਰਗ ਦੇ ਲੋਕਾਂ ਵਿੱਚ ਜ਼ਿਆਦਾ ਵੇਖਿਆ ਗਿਆ| ਇਹ ਖੁਲਾਸਾ ਵੈਕਸੀਨ ਦੇ ਕੀਤੇ ਜਾ ਰਹੇ ਟੈਸਟਸ ਦੌਰਾਨ ਹੋਇਆ| ਇਸ ਦਾ ਪਤਾ ਵੀ ਕਲੀਨਿਕਲ ਟਰਾਇਲਜ਼ ਦੌਰਾਨ ਅਚਾਨਕ ਹੀ ਲੱਗਿਆ| ਆਕਸਫੋਰਡ ਵੈਕਸੀਨ ਗਰੁੱਪ ਦੇ ਮੁਖੀ ਐਂਡਰਿਊ ਪੋਲਾਰਡ ਨੇ ਆਖਿਆ ਕਿ ਇਸ ਦੇ ਹੋਰ ਸਬੂਤ ਅਗਲੇ ਮਹੀਨੇ ਮਿਲ ਜਾਣਗੇ ਪਰ ਇਸ ਦੇ ਨਤੀਜੇ ਅਜੇ ਵੀ ਕਾਫੀ ਅਸਰਦਾਰ ਹਨ|
ਐਸਟਰਾਜ਼ੈਨੇਕਾ ਦੇ ਚੀਫ ਐਗਜੈæਕਟਿਵ ਪਾਸਕਲ ਸੌਰੌਇਤ ਨੇ ਆਖਿਆ ਕਿ ਸਾਨੂੰ ਪਤਾ ਲੱਗ ਚੁੱਕਿਆ ਹੈ ਕਿ ਇਸ ਦੇ ਨਤੀਜੇ ਕਿਹੋ ਜਿਹੇ ਆ ਰਹੇ ਹਨ ਇਸ ਲਈ ਸਾਨੂੰ ਹੁਣ ਇਸ ਦੇ ਹੋਰ ਅਧਿਐਨ ਦੀ ਲੋੜ ਮਹਿਸੂਸ ਹੋ ਰਹੀ ਹੈ| ਉਨ੍ਹਾਂ ਆਖਿਆ ਕਿ ਇਹ ਅਧਿਐਨ ਜਲਦ ਹੀ ਨੇਪਰੇ ਚੜ੍ਹ ਜਾਵੇਗਾ ਕਿਉਂਕਿ ਸਾਨੂੰ ਇਸ ਦੇ ਅਸਰਦਾਰ ਹੋਣ ਦਾ ਸਬੂਤ ਤਾਂ ਮਿਲ ਹੀ ਚੁੱਕਿਆ ਹੈ ਤੇ ਬੱਸ ਹੁਣ ਥੋੜ੍ਹੇ ਅਧਿਐਨ ਤੋਂ ਬਾਅਦ ਰਹਿੰਦੀ ਗੁੰਜਾਇਸ਼ ਪੂਰੀ ਕਰਕੇ ਸਾਨੂੰ ਮੁਕਾਬਲਤਨ ਘੱਟ ਲੋਕਾਂ ਉੱਤੇ ਟਰਾਇਲ ਕਰਨ ਦੀ ਲੋੜ ਹੋਵੇਗੀ|