ਓਨਟਾਰੀਓ, 26 ਨਵੰਬਰ (ਪੋਸਟ ਬਿਊਰੋ) : ਓਨਟਾਰੀਓ ਵਿੱਚ ਡੇਅਲਾਈਟ ਸੇਵਿੰਗ ਟਾਈਮ ਨੂੰ ਖ਼ਤਮ ਕਰਨ ਲਈ ਲਿਆਂਦਾ ਗਿਆ ਪ੍ਰਾਈਵੇਟ ਮੈਂਬਰਜ਼ ਬਿੱਲ ਵਿਧਾਨ ਸਭਾ ਵਿੱਚ ਤੀਜੀ ਰੀਡਿੰਗ ਵਿੱਚ ਪਾਸ ਕਰ ਦਿੱਤਾ ਗਿਆ।
ਓਟਵਾ ਵੈਸਟ-ਨੇਪੀਅਨ ਤੋਂ ਐਮਪੀਪੀ ਜੈਰੇਮੀ ਰੌਬਰਟਸ ਵੱਲੋਂ ਅਕਤੂਬਰ ਵਿੱਚ ਇੱਕ ਬਿੱਲ ਲਿਆਂਦਾ ਗਿਆ ਸੀ ਜਿਸ ਵਿੱਚ ਘੜੀਆਂ ਦਾ ਸਮਾਂ ਸਾਲ ਵਿੱਚ ਦੋ ਵਾਰੀ ਬਦਲਣ ਦੀ ਕਵਾਇਦ ਨੂੰ ਖਤਮ ਕਰਨ ਦੀ ਮੰਗ ਕੀਤੀ ਗਈ ਸੀ। ਵੀਰਵਾਰ ਨੂੰ ਬਿੱਲ 214- ਦ ਟਾਈਮ ਅਮੈਂਡਮੈਂਟ ਐਕਟ- ਨੂੰ ਵਿਧਾਨ ਸਭਾ ਵਿੱਚ ਸਰਬਸੰਮਤੀ ਨਾਲ ਪਾਸ ਕਰ ਦਿੱਤਾ ਗਿਆ। ਇਸ ਬਿੱਲ ਨੂੰ ਹੁਣ ਸ਼ਾਹੀ ਮਨਜ਼ੂਰੀ ਲਈ ਲੈਫਟੀਨੈਂਟ ਗਵਰਨਰ ਕੋਲ ਭੇਜਿਆ ਜਾਵੇਗਾ।
ਇੱਥੇ ਦੱਸਣਾ ਬਣਦਾ ਹੈ ਕਿ ਇਹ ਬਿੱਲ ਉਸ ਸਮੇਂ ਹੀ ਲਾਗੂ ਕੀਤਾ ਜਾਵੇਗਾ ਜਦੋਂ ਗੁਆਂਢੀ ਪ੍ਰੋਵਿੰਸ ਕਿਊਬਿਕ ਤੇ ਅਮਰੀਕਾ ਦੇ ਨਿਊ ਯੌਰਕ ਸਟੇਟ ਵੱਲੋਂ ਇਸੇ ਤਰ੍ਹਾਂ ਦਾ ਕਾਨੂੰਨ ਲਿਆਂਦਾ ਜਾਵੇਗਾ। ਪਰ ਅਜੇ ਤੱਕ ਨਾ ਹੀ ਕਿਊਬਿਕ ਤੇ ਨਿਊ ਯੌਰਕ ਸਟੇਟ ਵੱਲੋਂ ਇਸ ਤਰ੍ਹਾਂ ਦੇ ਕਿਸੇ ਬਿੱਲ ਨੁੰ ਪੇਸ਼ ਕੀਤਾ ਗਿਆ ਹੈ। ਰੌਬਰਟਸ ਨੇ ਆਸ ਪ੍ਰਗਟਾਈ ਕਿ ਉਨ੍ਹਾਂ ਦੇ ਇਸ ਬਿੱਲ ਨਾਲ ਇਸ ਨਵੇਂ ਰੁਝਾਣ ਦਾ ਮੁੱਢ ਤਾਂ ਜ਼ਰੂਰ ਬੱਝੇਗਾ।