ਕੋਰੋਨਾ ਕਾਰਨ ਇਸ ਸਾਲ ਕਈ ਫਿਲਮਾਂ ਦੀ ਸ਼ੂਟਿੰਗ ਸ਼ੁਰੂ ਨਹੀਂ ਸੀ ਹੋ ਸਕੀ। ਅਗਲੇ ਸਾਲ ਲਈ ਫਿਲਮ ਮੇਕਰ ਕਮਰ ਕੱਸ ਰਹੇ ਹਨ। ਲਗਾਤਾਰ ਨਵੀਆਂ ਫਿਲਮਾਂ ਦਾ ਐਲਾਨ ਹੋ ਰਿਹਾ ਹੈ। ਇਸ ਲੜੀ ਵਿੱਚ ‘ਕਹਾਣੀ’ ਅਤੇ ‘ਬਦਲਾ’ ਵਰਗੀਆਂ ਸਫਲ ਫਿਲਮਾਂ ਦੇ ਚੁੱਕੇ ਸੁਜਾਏ ਘੋਸ਼ ਅੱਗੋਂ ਰਵਿੰਦਰਨਾਥ ਟੈਗੋਰ ਦੀ ਮਸ਼ਹੂਰ ਕਹਾਣੀ ‘ਕਾਬੁਲੀਵਾਲਾ’ ਉੱਤੇ ਪੀਰੀਅਡ ਫਿਲਮ ਬਣਾਉਣਗੇ। ਫਿਲਮ ਦੀ ਸ਼ੂਟਿੰਗ ਲੰਡਨ ਤੇ ਉਸ ਦੇ ਆਸਪਾਸ ਦੇ ਸ਼ਹਿਰਾਂ ਵਿੱਚ ਕੀਤੀ ਜਾਵੇਗੀ। ਇਸ ਦਾ ਲੇਖਨ ਅਤੇ ਨਿਰਦੇਸ਼ਨ ਸੁਜਾਏ ਘੋਸ਼ ਕਰਨਗੇ। ਉਹ ਇਸ ਦੇ ਸਹਿ-ਨਿਰਮਾਤਾ ਵੀ ਹੋਣਗੇ।
ਇਸ ਦੇ ਨਾਲ ਉਹ ਫਿਲਮ ‘ਉਮਾ’ ਨਾਲ ਉਹ ਬਤੌਰ ਕ੍ਰਿਏਟਿਵ ਪ੍ਰੋਡਿਊਸਰ ਜੁੜਨਗੇ। ‘ਉਮਾ’ ਦਾ ਨਿਰੇਦਸ਼ਨ ਤਥਾਗਤ ਸਿੰਘਾ ਕਰਨਗੇ। ਇਨ੍ਹੀਂ ਦੋਵਾਂ ਫਿਲਮਾਂ ਨੂੰ ਬਣਾਉਣ ਦੇ ਲਈ ਮਿਰਾਜ ਕ੍ਰਿਏਸ਼ੰਸ ਅਤੇ ਏ ਵੀ ਐੱਮ ਏ ਪ੍ਰੋਡਕਸ਼ਨ ਹਾਊਸ ਇਕੱਠੇ ਆਏ ਹਨ। ਇਨ੍ਹਾਂ ਦੋਵਾਂ ਫਿਲਮਾਂ ਦੀ ਸ਼ੂਟਿੰਗ ਅਗਲੇ ਸਾਲ ਸ਼ੁਰੂ ਹੋਵੇਗੀ। ਸੁਜਾਏ ਦਾ ਕਹਿਣਾ ਹੈ, ‘‘ਮੈਂ ਦੋਵਾਂ ਪ੍ਰੋਜੈਕਟਾਂ ਬਾਰੇ ਕਾਫੀ ਰੋਮਾਂਚਿਤ ਮਹਿਸੂਸ ਕਰ ਰਿਹਾ ਹਾਂ। ‘ਕਾਬੁਲੀਵਾਲਾ’ ਤਾਂ ਹਮੇਸ਼ਾ ਤੋਂ ਮੇਰੇ ਲਈ ਡ੍ਰੀਮ ਪ੍ਰੋਜੈਕਟ ਰਿਹਾ ਹੈ। ਮਿਰਾਜ ਕ੍ਰਿਏਸ਼ੰਸ ਅਤੇ ਏ ਵੀ ਐਮ ਏ ਦੀ ਬਦੌਲਤ ਅੱਜ ਮੈਂ ਆਪਣੇ ਸੁਫਨੇ ਨੂੰ ਪਰਦੇ 'ਤੇ ਸਾਕਾਰ ਕਰਨ ਜਾ ਰਿਹਾ ਹਾਂ। ਇਸ ਖੁਸ਼ੀ ਨੂੰ ਬਿਆਨ ਕਰਨ ਲਈ ਮੇਰੇ ਕੋਲ ਸ਼ਬਦ ਨਹੀਂ ਹਨ।”
ਦੱਸਣਾ ਬਣਦਾ ਹੈ ਕਿ ਇਸ ਤੋਂ ਪਹਿਲਾਂ ਟੈਗੋਰ ਦੀ ਇਸੇ ਕਹਾਣੀ ਉੱਤੇ ਸਾਲ 1961 ਵਿੱਚ ਆਈ ਫਿਲਮ ‘ਕਾਬੁਲੀਵਾਲਾ’ ਵਿੱਚ ਬਲਰਾਜ ਸਾਹਨੀ ਨੇ ਮੁੱਖ ਭੂਮਿਕਾ ਨਿਭਾਈ ਸੀ।