ਓਨਟਾਰੀਓ, 25 ਨਵੰਬਰ (ਪੋਸਟ ਬਿਊਰੋ) : ਲੰਡਨ, ਓਨਟਾਰੀਓ ਦੇ ਇੱਕ ਹਸਪਤਾਲ ਵੱਲੋਂ ਅਗਲੇ ਸੱਤ ਦਿਨਾਂ ਤੱਕ ਸਾਰੀਆਂ ਮੈਡੀਕਲ ਯੂਨਿਟਸ ਵਿੱਚ ਹਰ ਕਿਸਮ ਦੇ ਦਾਖਲੇ ਉੱਤੇ ਰੋਕ ਲਾਈ ਜਾ ਰਹੀ ਹੈ| ਹਸਪਤਾਲ ਦਾ ਕਹਿਣਾ ਹੈ ਕਿ ਕੋਵਿਡ-19 ਆਊਟਬ੍ਰੇਕ ਕਾਰਨ ਹੁਣ ਤੱਕ ਉਨ੍ਹਾਂ ਦੇ 41 ਮਰੀਜ਼ ਤੇ ਸਟਾਫ ਮੈਂਬਰ ਪ੍ਰਭਾਵਿਤ ਹੋ ਚੁੱਕੇ ਹਨ|
ਲੰਡਨ ਹੈਲਥ ਸਾਇੰਸਿਜ਼ ਸੈਂਟਰ, ਜੋ ਕਈ ਹਸਪਤਾਲ ਚਲਾਉਂਦਾ ਹੈ, ਨੇ ਸੱਭ ਤੋਂ ਪਹਿਲਾਂ 10 ਨਵੰਬਰ ਨੂੰ ਯੂਨੀਵਰਸਿਟੀ ਹੌਸਪਿਟਲ ਦੀ ਚੌਥੀ ਮੰਜ਼ਿਲ ਉੱਤੇ ਆਊਟਬ੍ਰੇਕ ਦਾ ਐਲਾਨ ਕੀਤਾ ਸੀ| ਪਰ ਹੁਣ ਕੋਵਿਡ-19 ਦੇ ਮਾਮਲੇ ਹਸਪਤਾਲ ਦੀਆਂ ਸਾਰੀਆਂ ਮੰਜ਼ਿਲਾਂ ਉੱਤੇ ਪਹੁੰਚ ਜਾਣ ਕਾਰਨ ਸਾਰੇ ਹਸਪਤਾਲ ਵਿੱਚ ਨਵੇਂ ਮਰੀਜ਼ਾਂ ਦੀ ਭਰਤੀ ਉੱਤੇ ਰੋਕ ਲਾ ਦਿੱਤੀ ਗਈ ਹੈ| ਮਿਡਲਸੈਕਸ ਲੰਡਨ ਹੈਲਥ ਯੂਨਿਟ ਦੇ ਮੈਡੀਕਲ ਆਫੀਸਰ ਆਫ ਹੈਲਥ ਡਾæ ਕ੍ਰਿਸ ਮੈਕੀ ਨੇ ਆਖਿਆ ਕਿ ਇਸ ਗੱਲ ਲਈ ਸਖ਼ਤ ਮਾਪਦੰਡ ਅਪਣਾਏ ਜਾ ਰਹੇ ਹਨ ਤਾਂ ਕਿ ਹੋਰ ਲੋਕ ਬਿਮਾਰ ਨਾ ਪੈਣ|
ਉਨ੍ਹਾਂ ਆਖਿਆ ਕਿ ਯੂਨੀਵਰਸਿਟੀ ਹੌਸਪਿਟਲ ਵਿੱਚ ਹਾਲਾਤ ਕਾਫੀ ਚੁਣੌਤੀ ਭਰੇ ਹਨ| ਉਨ੍ਹਾਂ ਆਖਿਆ ਕਿ ਇਸ ਤੋਂ ਸਾਨੂੰ ਇਹ ਸਮਝਣਾ ਚਾਹੀਦਾ ਹੈ ਕਿ ਜੇ ਅਸੀਂ ਮਾੜੀ ਜਿਹੀ ਵੀ ਢਿੱਲ ਵਰਤੀ ਤਾਂ ਕੋਵਿਡ ਕਦੇ ਵੀ ਤੇ ਕਿਤੇ ਵੀ ਅਕ੍ਰਾਮਕ ਰੂਪ ਲੈ ਸਕਦਾ ਹੈ| ਹੈਲਥ ਯੂਨਿਟ ਨੇ ਆਖਿਆ ਕਿ ਕੱਲ੍ਹ ਤੋਂ ਹੀ ਵਿਜ਼ੀਟਰਜ਼ ਤੇ ਸਾਂਭ ਸੰਭਾਲ ਕਰਨ ਲਈ ਨਿਰਧਾਰਤ ਪਾਰਟਨਰਜ਼ ਨੂੰ ਵੀ ਪ੍ਰਭਾਵਿਤ ਯੂਨਿਟਸ ਵਿੱਚ ਦਾਖਲ ਹੋਣ ਦੀ ਇਜਾਜ਼ਤ ਨਹੀਂ ਹੈ| ਇਸ ਤੋਂ ਇਲਾਵਾ ਸਾਰੇ ਮਰੀਜ਼ਾਂ ਤੇ ਸਟਾਫ ਦੀ ਟੈਸਟਿੰਗ ਦੀ ਸਿਫਾਰਿਸ਼ ਵੀ ਕੀਤੀ ਗਈ ਹੈ|
ਹੈਲਥ ਯੂਨਿਟ ਨੇ ਦੱਸਿਆ ਕਿ ਆਊਟਬ੍ਰੇਕ ਚੌਥੀ ਮੰਜ਼ਿਲ ਤੋਂ ਸ਼ੁਰੂ ਹੋਈ ਤੇ ਇਸ ਕਾਰਨ ਹਸਪਤਾਲ ਦੇ ਸਟਾਫ ਦੇ 16 ਮੈਂਬਰ ਤੇ ਮਰੀਜ਼ਾਂ ਵਿੱਚੋਂ 18 ਨੂੰ ਕੋਵਿਡ ਹੋਣ ਦੀ ਪੁਸ਼ਟੀ ਹੋਈ ਤੇ ਇਸ ਤੋਂ ਇਲਾਵਾ ਇਸ ਕਾਰਨ ਇੱਕ ਵਿਅਕਤੀ ਦੀ ਮੌਤ ਵੀ ਹੋਈ| ਇਸੇ ਹਸਪਤਾਲ ਦੀ ਇੱਕ ਹੋਰ ਮੰਜ਼ਿਲ ਉੱਤੇ ਦੂਜੀ ਆਊਟਬ੍ਰੇਕ ਵੀ ਦਰਜ ਕੀਤੀ ਗਈ ਤੇ ਇਸ ਦੌਰਾਨ ਛੇ ਮਾਮਲਿਆਂ ਦੀ ਪੁਸ਼ਟੀ ਹੋਈ|