ਓਨਟਾਰੀਓ, 25 ਨਵੰਬਰ (ਪੋਸਟ ਬਿਊਰੋ) : ਕੋਵਿਡ-19 ਮਹਾਂਮਾਰੀ ਦਰਮਿਆਨ ਸਰਦ ਰੁੱਤ ਦੀਆ ਛੁੱਟੀਆਂ ਵਿੱਚ ਲੋਕਾਂ ਨੂੰ ਇੱਕਠ ਕਰਨ ਦੀ ਇਜਾਜ਼ਤ ਹੋਵੇਗੀ ਜਾਂ ਨਹੀਂ ਇਸ ਬਾਰੇ ਦਿਸ਼ਾ ਨਿਰਦੇਸ਼ ਓਨਟਾਰੀਓ ਸਰਕਾਰ ਵੱਲੋਂ ਅੱਜ ਜਾਰੀ ਕੀਤੇ ਜਾਣ ਦੀ ਸੰਭਾਵਨਾ ਹੈ|
ਪ੍ਰੋਵਿੰਸ ਦੇ ਨਵੇਂ ਪ੍ਰਬੰਧਾਂ ਤਹਿਤ ਟੋਰਾਂਟੋ ਤੇ ਪੀਲ ਰੀਜਨ ਵਿੱਚ ਮੁੜ ਲਾਕਡਾਊਨ ਲਾਇਆ ਗਿਆ ਹੈ| ਇਹ ਪਾਬੰਦੀਆਂ ਕ੍ਰਿਸਮਿਸ ਵਾਲੇ ਹਫਤੇ ਤੱਕ ਜਾਰੀ ਰਹਿਣਗੀਆਂ| ਲਾਕਡਾਊਨ ਤਹਿਤ ਪਬਲਿਕ ਹੈਲਥ ਮਾਪਦੰਡਾਂ ਵਿੱਚ ਇੰਡੋਰ ਇੱਕਠਾਂ ਉੱਤੇ ਪਾਬੰਦੀ ਹੁੰਦੀ ਹੈ ਅਤੇ ਸਾਰੇ ਰੈਸਟੋਰੈਂਟਸ ਵੀ ਬੰਦ ਕਰ ਦਿੱਤੇ ਜਾਂਦੇ ਹਨ ਸਿਰਫ ਉਨ੍ਹਾਂ ਤੋਂ ਟੇਕਆਊਟ ਤੇ ਡਲਿਵਰੀ ਹੀ ਹੋ ਸਕਦੀ ਹੈ|
ਇਸ ਹਫਤੇ ਦੇ ਸ਼ੁਰੂ ਵਿੱਚ ਪ੍ਰੋਵਿੰਸ ਦੇ ਉੱਘੇ ਡਾਕਟਰ ਨੇ ਆਖਿਆ ਸੀ ਕਿ ਅਗਲੇ 28 ਦਿਨਾਂ ਵਿੱਚ ਇਸ ਇਲਾਕੇ ਵਿੱਚ ਹਾਲਾਤ ਬਦਲਣ ਦੀ ਸੰਭਾਵਨਾ ਘੱਟ ਹੀ ਹੈ| ਇਸ ਲਈ ਇਨ੍ਹਾਂ ਨੂੰ ਲਾਕਡਾਊਨ ਤੋਂ ਇੱਕ ਪੱਧਰ ਘੱਟ ਰੈੱਡ ਜੋæਨ ਵਿੱਚ ਸ਼ਾਇਦ ਹੀ ਲਿਆਂਦਾ ਜਾ ਸਕੇ| ਪੰਜ ਹੋਰ ਰੀਜਨ ਜਿਵੇਂ ਕਿ ਹੈਮਿਲਟਨ, ਦਰਹਾਮ, ਹਾਲਟਨ, ਯੌਰਕ ਤੇ ਵਾਟਰਲੂ ਇਸ ਸਮੇਂ ਰੈੱਡ ਜੋæਨ ਵਿੱਚ ਹਨ| ਇਨ੍ਹਾਂ ਇਲਾਕਿਆਂ ਵਿੱਚ ਪੰਜ ਲੋਕਾਂ ਦੇ ਇੰਡੋਰ ਤੇ 25 ਲੋਕਾਂ ਦੇ ਆਊਟਡੋਰ ਇੱਕਠੇ ਹੋਣ ਦੀ ਇਜਾਜ਼ਤ ਹੈ|