ਮਾਂਟਰੀਅਲ, 19 ਨਵੰਬਰ (ਪੋਸਟ ਬਿਊਰੋ) : ਪਿਛਲੇ ਸ਼ੁੱਕਰਵਾਰ ਕਿਊਬਾ ਵਿੱਚ ਛੁੱਟੀਆਂ ਮਨਾਉਣ ਗਈ ਮਾਂਟਰੀਅਲ ਦੀ ਮਹਿਲਾ ਅਗਲੇ ਹੀ ਦਿਨ ਲਾਪਤਾ ਹੋ ਗਈ| ਪਰ ਬਾਅਦ ਵਿੱਚ ਵੈਰਾਡੈਰੋ ਦੇ ਰਿਜ਼ਾਰਟ ਟਾਊਨ ਦੇ ਬੀਚ ਉੱਤੇ ਉਸ ਦੀ ਲਾਸ਼ ਮਿਲੀ| ਇਹ ਵੀ ਪਤਾ ਲੱਗਿਆ ਹੈ ਕਿ ਉਸ ਦਾ ਕਤਲ ਕੀਤਾ ਗਿਆ ਹੈ|
52 ਸਾਲਾ ਐਂਟੌਇਨੈੱਟ ਟਰੈਬੁਲਸੀ ਬੀਚ ਦੀ ਰੇਤਾ ਵਿੱਚ ਇੱਕ ਮੀਟਰ ਦੱਬੀ ਪਾਈ ਗਈ ਤੇ ਉਸ ਦੇ ਸ਼ਰੀਰ ਉੱਤੇ ਹਿੰਸਾ ਦੇ ਨਿਸ਼ਾਨ ਵੀ ਸਾਫ ਨਜ਼ਰ ਆ ਰਹੇ ਸਨ| ਕਿਊਬਾ ਦੇ ਅਧਿਕਾਰੀਆਂ ਨੂੰ ਚਾਰ ਬੱਚਿਆਂ ਦੀ ਮਾਂ ਦੀ ਲਾਸ਼ ਮੰਗਲਵਾਰ ਦੁਪਹਿਰੇ ਮਿਲੀ| ਗਲੋਬਲ ਅਫੇਅਰਜ਼ ਕੈਨੇਡਾ ਵੱਲੋਂ ਬੁੱਧਵਾਰ ਨੂੰ ਇਸ ਖਬਰ ਦੀ ਪੁਸ਼ਟੀ ਕੀਤੀ ਗਈ| ਵਿਭਾਗ ਨੇ ਦੱਸਿਆ ਕਿ ਉਨ੍ਹਾਂ ਵੱਲੋਂ ਪਰਿਵਾਰ ਨੂੰ ਕਾਊਂਸਲਰ ਸੇਵਾਵਾਂ ਦਿੱਤੀਆਂ ਜਾ ਰਹੀਆਂ ਹਨ ਤੇ ਇਸ ਸਬੰਧ ਵਿੱਚ ਹੋਰ ਜਾਣਕਾਰੀ ਹਾਸਲ ਕਰਨ ਲਈ ਲੋਕਲ ਅਧਿਕਾਰੀਆਂ ਨਾਲ ਵੀ ਪੂਰਾ ਰਾਬਤਾ ਰੱਖਿਆ ਜਾ ਰਿਹਾ ਹੈ|
ਪਰਿਵਾਰਕ ਮੈਂਬਰਾਂ ਨੇ ਦੱਸਿਆ ਕਿ ਟਰੈਬੁਲਸੀ, ਜੋ ਕਿ ਸੈਕਰੇਕੋਇਰ ਹਸਪਤਾਲ ਦੇ ਮੇਨਟੇਨੈਂਸ ਵਿਭਾਗ ਵਿੱਚ ਕੰਮ ਕਰਦੀ ਸੀ, ਬੀਤੇ ਸੁੱæਕਰਵਾਰ ਕਿਊਬਾ ਗਈ ਸੀ| ਮਹਾਂਮਾਰੀ ਕਾਰਨ ਵਾਧੂ ਕੰਮ ਕਰਨ ਤੋਂ ਬਾਅਦ ਉਹ ਦੋ ਹਫਤਿਆਂ ਲਈ ਛੁੱਟੀਆਂ ਕੱਟਣ ਵਾਸਤੇ ਉੱਥੇ ਗਈ ਸੀ| ਸ਼ਨਿੱਚਰਵਾਰ ਸਵੇਰੇ ਬੀਚ ਉੱਤੇ ਖਿੱਚੀਆਂ ਆਪਣੀਆਂ ਤਸਵੀਰਾਂ ਵੀ ਉਸ ਵੱਲੋਂ ਪੋਸਟ ਕੀਤੀਆਂ ਗਈਆਂ| ਪਰ ਸ਼ਨਿੱਚਰਵਾਰ ਦੁਪਹਿਰ ਨੂੰ ਹੀ ਕਿਊਬਾ ਵਿਚਲੀ ਉਸ ਦੀ ਦੋਸਤ ਨੇ ਉਸ ਦੇ ਲਾਪਤਾ ਹੋਣ ਦੀ ਖਬਰ ਦਿੱਤੀ|
ਮਾਂਟਰੀਅਲ ਸਥਿਤ ਉਸ ਦੇ ਕਜ਼ਨ ਸੈਮੀ ਸੌਸਾ ਨੇ ਆਖਿਆ ਕਿ ਉਹ ਕਿਊਬਨ ਅਧਿਕਾਰੀਆਂ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ ਪਰ ਅਜਿਹਾ ਹੋ ਨਹੀਂ ਪਾ ਰਿਹਾ| ਹੁਣ ਪਰਿਵਾਰ ਟਰੈਬੁਲਸੀ ਦੀ ਦੇਹ ਨੂੰ ਮਾਂਟਰੀਅਲ ਲਿਆਉਣ ਲਈ ਯਤਨ ਕਰ ਰਿਹਾ ਹੈ|