ਅਭਿਨੇਤਾ ਵਿਕਰਾਂਤ ਮੇਸੀ ਦਾ ਕਹਿਣਾ ਹੈ ਕਿ ਇਸ ਦੇਸ਼ ਵਿੱਚ ਦੀਪਿਕਾ ਪਾਦੁਕੋਣ ਜਿਹੀ ਸੁਪਰ ਸਟਾਰ ਹੋਣਾ ਬਹੁਤ ਔਖਾ ਹੈ। ਉਸ ਨੇ ਦੀਪਿਕਾ ਨਾਲ ‘ਛਪਾਕ’ ਵਿੱਚ ਕੰਮ ਕੀਤਾ ਸੀ। ਮੇਸੀ ਨੇ ਕਿਹਾ ਕਿ ਸਾਡੇ ਦੇਸ਼ ਵਿੱਚ ਅਜਿਹੀ ਮਹਿਲਾ ਬਣਨ ਲਈ ਹਿੰਮਤ ਚਾਹੀਦੀ ਹੈ, ਜੋ ਆਪਣੀ ਆਵਾਜ਼ ਬੁਲੰਦ ਕਰਨਾ ਜਾਣਦੀ ਹੈ। ਦੀਪਿਕਾ ਬਹੁਤ ਵੱਡੀ ਸਟਾਰ ਅਤੇ ਦੇਸ਼ ਦੇ ਲੋਕਾਂ ਲਈ ਆਦਰਸ਼ ਵਾਂਗ ਹੈ, ਜੇ ਉਸ ਨੰ ਆਪਣੀ ਗੱਲ ਰੱਖਣ ਲਈ ਨਿਸ਼ਾਨਾ ਬਣਾਇਆ ਜਾ ਸਕਦਾ ਹੈ ਤਾਂ ਕਿਸੇ ਨੂੰ ਵੀ ਬਣਾਇਆ ਜਾ ਸਕਦਾ ਹੈ।
ਵਿਕਰਾਂਤ ਨੇ ਜ਼ੋਰ ਦੇ ਕੇ ਕਿਹਾ ਕਿ ਬਦਕਿਸਮਤੀ ਹੈ ਕਿ ਸਾਡੇ ਦੇਸ਼ ਵਿੱਚ ਜਨਤਕ ਬਹਿਸ ਨਹੀਂ ਹੋ ਰਹੀ। ਜ਼ਿਕਰ ਯੋਗ ਹੈ ਕਿ ‘ਛਪਾਕ’ ਦੇ ਰਿਲੀਜ਼ ਹੋਣ ਵਾਲੇ ਜਨਵਰੀ ਵਿੱਚ ਦੀਪਿਕਾ ਜਵਾਹਰ ਲਾਲ ਨਹਿੂਰ ਯੂਨੀਵਰਸਿਟੀ ਚਲੀ ਗਈ ਸੀ। ਇਹ ਕਦਮ ਉਸ ਨੇ ਸੀ ਏ ਏ ਖਿਲਾਫ ਪ੍ਰਗਟਾਏ ਜਾ ਰਹੇ ਰੋਸ ਨਾਲ ਇਕਜੁੱਟਤਾ ਪ੍ਰਗਟ ਕਰਨ ਲਈ ਚੁੱਕਿਆ ਸੀ। ਅਭਿਨੇਤਰੀ ਦੇ ਇਸ ਕਦਮ ਦਾ ਸੋਸ਼ਲ ਮੀਡੀਆ 'ਤੇ ਕਈਆਂ ਨੇ ਵਿਰੋਧ ਕੀਤਾ ਸੀ। ‘ਛਪਾਕ' ਦੇ ਬਾਈਕਾਟ ਦੀ ਮੁਹਿੰਮ ਵੀ ਚੱਲੀ ਸੀ। ਵਿਕਰਾਂਤ ਨੇ ਦੀਪਿਕਾ ਤੇ ਮੇਘਨਾ ਗੁਲਜ਼ਾਰ ਨਾਲ ਕੰਮ ਕਰਨ ਦੇ ਤਜਰਬੇ ਨੂੰ ਖੁਸ਼ਨੁਮਾ ਦੱਸਿਆ।