ਓਟਵਾ, 9 ਨਵੰਬਰ (ਪੋਸਟ ਬਿਊਰੋ) : ਬੈਂਕ ਆਫ ਕੈਨੇਡਾ ਵੱਲੋਂ ਉਨ੍ਹਾਂ ਅੱਠ ਮਹਾਨ ਹਸਤੀਆਂ ਦੀ ਲਿਸਟ ਜਾਰੀ ਕੀਤੀ ਜਾ ਰਹੀ ਹੈ ਜਿਨ੍ਹਾਂ ਵਿੱਚੋਂ ਕੋਈ ਇੱਕ ਅਗਲੇ 5 ਡਾਲਰ ਦੇ ਨੋਟ ਉੱਤੇ ਛਪੇਗੀ|
ਇਨ੍ਹਾਂ ਅੱਠ ਵਿੱਚੋਂ ਵੀ ਸੱਭ ਤੋਂ ਮੂਹਰੇ ਰਹਿਣ ਵਾਲਿਆਂ ਵਿੱਚ ਕੈਨੇਡੀਅਨ ਫਰਸਟ ਨੇਸ਼ਨਜ਼ ਸੈਨਿਕ, ਸਿਆਸਤਦਾਨ ਤੇ ਕਾਰਕੁੰਨ ਫਰਾਂਸਿਸ ਪੇਗਾਹਮਾਗਾਬੋਅ, ਟੈਰੀ ਫੌਕਸ ਤੇ ਲੌਟਾ ਹਿਟਸ਼ਮਾਨੋਵਾ ਸ਼ਾਮਲ ਹਨ| ਪੇਗਾਹਮਾਗਾਬੋਅ ਕੈਨੇਡੀਅਨ ਸੈਨਾ ਦੇ ਸੱਭ ਤੋਂ ਵੱਧ ਸਨਮਾਨਿਤ ਮੂਲਵਾਸੀ ਸੈਨਿਕ ਸਨ| ਟੈਰੀ ਫੌਕਸ ਦੀ 1980 ਵਿੱਚ ਚਲਾਈ ਗਈ ਮੈਰਾਥਨ ਆਫ ਹੋਪ ਅੱਜ ਵੀ ਕੈਂਸਰ ਲਈ ਕੈਨੇਡੀਅਨਾਂ ਨੂੰ ਪੈਸੇ ਇੱਕਠੇ ਕਰਨ ਲਈ ਪ੍ਰੇਰਿਤ ਕਰਦੀ ਹੈ| ਲੌਟਾ ਹਿਟਸ਼ਮਾਨੋਵਾ ਇੱਕ ਮਾਨਵਤਾਵਾਦੀ ਸ਼ਖਸੀਅਤ ਸੀ, ਜਿਸ ਨੂੰ ਕੈਨੇਡਾ ਦੀ ਮਦਰ ਟੈਰੇਸਾ ਵਜੋਂ ਵੀ ਜਾਣਿਆ ਜਾਂਦਾ ਹੈ|
ਇਹ ਉਹ ਨਾਂ ਹਨ ਜਿਹੜੇ ਛੇ ਹਫਤਿਆਂ ਤੱਕ ਚੱਲੀ ਪਬਲਿਕ ਕੰਸਲਟੇਸ਼ਨ ਵਿੱਚ ਕੈਨੇਡੀਅਨਾਂ ਵੱਲੋਂ ਜਮ੍ਹਾਂ ਕਰਵਾਏ ਗਏ 600 ਨਾਂਵਾਂ ਵਿੱਚੋਂ ਸੱਭ ਤੋਂ ਮੂਹਰੇ ਰਹੇ| ਇਸ ਸਮੇਂ ਕੈਨੇਡਾ ਦੇ 5 ਡਾਲਰ ਦੇ ਨੋਟ ਉੱਤੇ ਕੈਨੇਡਾ ਦੇ ਪਹਿਲੇ ਫਰੈਂਚ ਬੋਲਣ ਵਾਲੇ ਪ੍ਰਧਾਨ ਮੰਤਰੀ ਸਰ ਵਿਲਫਰਿਡ ਲੌਰੀਅਰ ਦੀ ਤਸਵੀਰ ਛਪੀ ਹੁੰਦੀ ਹੈ| ਅਗਲੇ ਸਾਲ ਦੇ ਸ਼ੁਰੂ ਵਿੱਚ ਵਿੱਤ ਮੰਤਰੀ ਵੱਲੋਂ ਜੇਤੂ ਸ਼ਖਸੀਅਤ ਦਾ ਐਲਾਨ ਕੀਤਾ ਜਾਵੇਗਾ|