ਫਿਰੋਜ਼ਪੁਰ, 9 ਨਵੰਬਰ (ਪੋਸਟ ਬਿਊਰੋ)- ਪਰਾਲੀ ਤੋਂ ਉਠਦੇ ਧੂੰਏਂ ਕਾਰਨ ਹੋਏ ਹਾਦਸੇ ਵਿੱਚ ਐਡੀਸ਼ਨਲ ਸੈਸ਼ਨ ਜੱਜ ਫਾਜ਼ਿਲਕਾ ਗੁਰਦਰਸ਼ਨ ਕੌਰ ਜ਼ਖਮੀ ਹੋ ਗਈ ਹੈ। ਉਨ੍ਹਾਂ ਨੂੰ ਪਹਿਲਾਂ ਜ਼ੀਰੇ ਦੇ ਸਰਕਾਰੀ ਹਸਪਤਾਲ ਦਾਖਲ ਕਰਵਾਇਆ ਗਿਆ, ਜਿੱਥੋਂਉਨ੍ਹਾਂ ਨੂੰ ਬਠਿੰਡਾ ਰੈਫਰ ਕਰ ਦਿੱਤਾ ਗਿਆ।
ਥਾਣਾ ਸਦਰਜ਼ੀਰਾ ਦੀ ਪੁਲਸ ਨੇ ਪਿੰਡ ਮਹੀਆਵਾਲਾ ਵਾਸੀ ਸਵਰਣ ਸਿੰਘ ਨਾਂਅ ਦੇ ਕਿਸਾਨ ਦੇ ਖਿਲਾਫ ਮਾਮਲਾ ਦਰਜ ਕੀਤਾ ਹੈ, ਪਰ ਦੋਸ਼ੀ ਪਰਵਾਰ ਦੇ ਨਾਲ ਫਰਾਰ ਹੋ ਗਿਆ ਹੈ।ਪੁਲਸ ਮੁਤਾਬਕ ਗੁਰਦਰਸ਼ਨ ਕੌਰ ਚੰਡੀਗੜ੍ਹਤੋਂ ਬੀ ਐਸ ਐਫ ਦੇ ਆਪਰੇਸ਼ਨ ਕਮਾਂਡੈਂਟ ਆਪਣੇ ਭਰਾ ਗੁਰਜੰਟ ਸਿੰਘ ਧਾਲੀਵਾਲ ਦੇ ਨਾਲ ਕਾਰ ਵਿੱਚ ਫਿਰੋਜ਼ਪੁਰ ਜਾ ਰਹੀ ਸੀ। ਦੁਪਹਿਰ ਕਰੀਬ ਢਾਈ ਵਜੇ ਮਹੀਆਵਾਲਾ ਨੇੜੇ ਪਰਾਲੀ ਨੂੰ ਲਾਈ ਅੱਗ `ਚੋਂ ਉਠਦੇ ਧੂੰਏਂ ਕਾਰਨ ਕੁਝ ਨਾ ਦਿੱਸਿਆ ਤਾਂ ਗੁਰਜੰਟ ਸਿੰਘ ਨੇ ਕਾਰ ਰੋਕ ਦਿੱਤੀ। ਇਸੇ ਦੌਰਾਨ ਪਿੱਛੋਂ ਆਈ ਬੱਸ ਨੇ ਕਾਰ ਨੂੰ ਟੱਕਰ ਮਾਰ ਦਿੱਤੀ, ਜਿਸ ਕਾਰਨ ਕਾਰ ਅੱਗੇ ਖੜ੍ਹੀ ਗੱਡੀ ਨਾਲ ਜਾ ਵੱਜੀ। ਹਾਦਸੇ ਵਿੱਚ ਗੁਰਦਰਸ਼ਨ ਕੌਰ ਜ਼ਖਮੀ ਹੋ ਗਈ।