ਓਟਵਾ, 8 ਨਵੰਬਰ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਡੈਮੋਕ੍ਰੈਟ ਜੋਅ ਬਾਇਡਨ ਨੂੰ ਅਮਰੀਕਾ ਦਾ ਰਾਸ਼ਟਰਪਤੀ ਬਣਨ ਤੇ ਕਮਲਾ ਹੈਰਿਸ ਨੂੰ ਉੱਪ ਰਾਸ਼ਟਰਪਤੀ ਬਣਨ ਉੱਤੇ ਵਧਾਈ ਦਿੱਤੀ|
ਟਰੂਡੋ ਨੇ ਆਖਿਆ ਕਿ ਦੋਵੇਂ ਦੇਸ਼ ਨਜ਼ਦੀਕੀ ਦੋਸਤ, ਭਾਈਵਾਲ ਤੇ ਸਹਿਯੋਗੀ ਹਨ| ਅਸੀਂ ਅਜਿਹਾ ਰਿਸ਼ਤਾ ਸਾਂਝਾ ਕਰਦੇ ਹਾਂ ਜਿਹੜਾ ਦੁਨੀਆ ਦੇ ਮੰਚ ਉੱਤੇ ਵਿਲੱਖਣ ਹੈ| ਅਸੀਂ ਦੋਵਾਂ ਨਾਲ ਰਲ ਕੇ ਕੰਮ ਕਰਨ ਲਈ ਤਾਂਘਵਾਣ ਹਾਂ|
ਟਰੂਡੋ ਨੇ ਆਖਿਆ ਕਿ ਉਹ ਦੁਨੀਆਂ ਦੀਆਂ ਵੱਡੀਆਂ ਚੁਣੌਤੀਆਂ ਨਾਲ ਰਲ ਕੇ ਸਿੱਝਣ ਦੀ ਆਸ ਰੱਖਦੇ ਹਨ| ਇਸ ਦੌਰਾਨ ਐਨਡੀਪੀ ਆਗੂ ਜਗਮੀਤ ਸਿੰਘ ਤੇ ਕੰਜ਼ਰਵੇਟਿਵ ਆਗੂ ਐਰਿਨ ਓਟੂਲ ਨੇ ਵੀ ਜੋਅ ਬਾਇਡਨ ਨੂੰ ਅਮਰੀਕਾ ਦਾ ਰਾਸ਼ਟਰਪਤੀ ਬਣਨ ਤੇ ਕਮਲਾ ਹੈਰਿਸ ਨੂੰ ਉੱਪ ਰਾਸ਼ਟਰਪਤੀ ਬਣਨ ਉੱਤੇ ਵਧਾਈ ਦਿੱਤੀ|
ਸ਼ਨਿੱਚਰਵਾਰ ਸਵੇਰੇ ਬਾਇਡਨ ਨੂੰ ਪੈਨਿਨਸਿਲਵੇਨੀਆ ਵਿੱਚ ਜਿੱਤ ਹਾਸਲ ਕਰਨ ਤੋਂ ਬਾਅਦ ਜੇਤੂ ਕਰਾਰ ਦੇ ਦਿੱਤਾ ਗਿਆ| ਡੌਨਲਡ ਟਰੰਪ ਨੂੰ ਹਰਾਉਣ ਲਈ ਯੂਐਸ ਇਲੈਕਟੋਰਲ ਕਾਲਜ ਵਿੱਚ ਲੋੜੀਂਦੀਆਂ 270 ਵੋਟਾਂ ਤੋਂ ਵੀ ਵੱਧ ਵੋਟਾਂ ਬਾਇਡਨ ਨੂੰ ਹਾਸਲ ਹੋ ਗਈਆਂ ਸਨ| ਬਾਇਡਨ ਅਮਰੀਕਾ ਦੇ 46ਵੇਂ ਰਾਸਟਰਪਤੀ ਬਣ ਗਏ ਹਨ|
ਟਰੰਪ ਵੱਲੋਂ ਵਾਰੀ ਵਾਰੀ ਕਾਨੂੰਨੀ ਕਾਰਵਾਈ ਕਰਨ ਦੀ ਧਮਕੀ ਦਿੱਤੀ ਗਈ| ਉਨ੍ਹਾਂ ਵਾਰੀ ਵਾਰੀ ਬਿਨਾਂ ਸਬੂਤ ਦੇ ਇਹ ਦੋਸ਼ ਵੀ ਲਾਏ ਕਿ ਵੋਟਾਂ ਦੀ ਗਿਣਤੀ ਵਿੱਚ ਗੜਬੜੀ ਕੀਤੀ ਗਈ ਹੈ| ਬਾਇਡਨ ਦੇ ਰਾਸ਼ਟਰਪਤੀ ਬਣਨ ਨਾਲ ਕੈਨੇਡਾ ਨੂੰ ਹਰ ਮਾਮਲੇ ਵਿੱਚ ਜਿਹੜਾ ਫੂਕ ਫੂਕ ਕੇ ਕਦਮ ਰੱਖਣਾ ਪੈਂਦਾ ਹੈ ਉਸ ਤੋਂ ਨਿਜਾਤ ਮਿਲੇਗੀ| ਜਦੋਂ ਤੋਂ ਟਰੰਪ ਨੇ ਆਫਿਸ ਸਾਂਭਿਆ ਸੀ ਉਦੋਂ ਤੋਂ ਉਹ ਕਿਹੜੇ ਵੇਲੇ ਕੀ ਫੈਸਲਾ ਲੈ ਲੈਣ ਇਸ ਦਾ ਪਤਾ ਹੀ ਨਹੀਂ ਸੀ ਲੱਗਦਾ|
ਟਰੰਪ ਨੇ ਰਾਸ਼ਟਰਪਤੀ ਬਣਨ ਤੋਂ ਪਹਿਲਾਂ ਤੇ ਬਾਅਦ ਵਿੱਚ ਵਾਰੀ ਵਾਰੀ ਨਾਫਟਾ ਡੀਲ ਨੂੰ ਖਤਮ ਕਰਨ ਦੀ ਧਮਕੀ ਦਿੱਤੀ| ਕੈਨੇਡਾ ਨੂੰ ਮੈਕਸਿਕੋ ਸਮੇਤ ਨਾਫਟਾ ਦੀ ਥਾਂ ਉੱਤੇ ਅਜਿਹੀ ਡੀਲ ਉੱਤੇ ਸਹਿਮਤੀ ਬਣਾਉਣੀ ਪਈ ਜਿਹੜੀ ਪਿਛਲੀਆਂ ਗਰਮੀਆਂ ਵਿੱਚ ਪ੍ਰਭਾਵੀ ਹੋਈ| ਇੱਥੇ ਹੀ ਬੱਸ ਨਹੀਂ ਟਰੰਪ ਨੇ ਕੈਨੇਡੀਅਨ ਕਿਸਾਨਾਂ ਨੂੰ ਹੀ ਨਹੀਂ ਸਗੋਂ ਟਰੂਡੋ ਨੂੰ ਵੀ ਬੇਇੱਜ਼ਤ ਕੀਤਾ ਤੇ ਕੈਨੇਡਾ ਉੱਤੇ ਸਟੀਲ ਤੇ ਐਲੂਮੀਨੀਅਮ ਟੈਰਿਫ ਲਾਏ| ਟਰੰਪ ਨੇ ਟਰੂਡੋ ਨੂੰ ਜੂਨ 2018 ਵਿੱਚ ਕਿਊਬਿਕ ਵਿੱਚ ਹੋਈ ਜੀ-7 ਆਗੂਆਂ ਦੀ ਸਿਖਰ ਵਾਰਤਾ ਵਿੱਚ ਬੇਈਮਾਨ ਤੇ ਕਮਜ਼ੋਰ ਆਗੂ ਆਖਿਆ|