ਪਿੱਛੇ ਜਿਹੇ ਬਾਲੀਵੁੱਡ ਕਲਾਕਾਰ ਰਾਜ ਕੁਮਾਰ ਰਾਓ ਅਤੇ ਨੁਸਰਤ ਭਰੂਚਾ ਰਿਐਲਿਟੀ ਸ਼ੋਅ ‘ਇੰਡੀਆਜ਼ ਬੈਸਟ ਡਾਂਸਰ’ ਦੇ ਸੈੱਟ 'ਤੇ ਮਹਿਮਾਨ ਬਣ ਕੇ ਪਹੁੰਚੇ। ਇਸ ਦੌਰਾਨ ਰਾਜ ਕੁਮਾਰ ਰਾਓ ਨੇ ਵੱਡਾ ਖੁਲਾਸਾ ਕਰਦੇ ਹੋਏ ਦੱਸਿਆ ਕਿ ਉਨ੍ਹਾਂ ਨੇ ਪਾਪੂਲਰ ਡਾਂਸ ਸ਼ੋਅ ‘ਬੂਗੀ ਵੂਗੀ’ ਦੇ ਲਈ ਆਡੀਸ਼ਨ ਦਿੱਤਾ ਸੀ ਜਿਸ ਵਿੱਚ ਉਹ ਰਿਜੈਕਟ ਹੋ ਗਏ ਸਨ। ਰਾਜ ਕੁਮਾਰ ਦੱਸਦੇ ਹਨ, ‘ਕਾਫੀ ਸਾਲ ਪਹਿਲਾਂ ਜਦ ਮੈਂ 11ਵੀਂ ਵਿੱਚ ਪੜ੍ਹਦਾ ਸੀ ਤਾਂ ਮੈਂ ਆਪਣੇ ਛੋਟੇ ਭਰਾ ਨਾਲ ‘ਬੂਗੀ ਵੂਗੀ’ ਦਾ ਆਡੀਸ਼ਨ ਦੇਣ ਮੰੁਬਈ ਆਇਆ ਸੀ, ਪਰ ਉਸ ਸਮੇਂ ਮੈਨੂੰ ਰਿਜੈਕਟ ਕਰ ਦਿੱਤਾ ਗਿਆ ਸੀ। ਅੱਜ ਇਥੇ ਆ ਕੇ ਇੰਨੀ ਵਧੀਆ ਪ੍ਰਫਾਰਮੈਂਸ ਦੇਖ ਕੇ ਬਹੁਤ ਚੰਗਾ ਲੱਗ ਰਿਹਾ ਹੈ। ਕੰਟੈਸਟੈਂਟਸ ਵੱਲੋਂ ਮੇਰੀ ਇਸ ਪ੍ਰਫਾਰਮੈਂਸ ਨੂੰ ਤੀਹ ਪੁਆਇੰਟ ਦੇਣ ਦੇ ਲਈ ਜੱਜਾਂ ਦਾ ਸ਼ੁਕਰੀਆ।’
ਇਸ ਮੌਕੇ ਮਲਾਇਕਾ ਅਰੋੜਾ ਨੇ ਦੱਸਿਆ, ‘‘ਰਾਜ ਇੱਕ ਛੁਪੇ ਰੁਸਤਮ ਡਾਂਸਰ ਹਨ ਤੇ ਬਹੁਤ ਘੱਟ ਲੋਕ ਜਾਣਦੇ ਹਨ ਕਿ ਉਹ ਸੱਚਮੁੱਚ ਇੱਕ ਵਧੀਆ ਡਾਂਸਰ ਹਨ। ਮੈਨੂੰ ਇੱਕ ਫਿਲਮ ਵਿੱਚ ਉਨ੍ਹਾਂ ਨਾਲ ਡਾਂਸ ਕਰਨ ਦਾ ਮੌਕਾ ਮਿਲਿਆ ਸੀ। ਅਸੀਂ ਫਿਲਮ ‘ਡੌਲੀ ਕੀ ਡੋਲੀ’ ਦਾ ਇੱਕ ਗਾਣਾ ਕੀਤਾ ਸੀ। ਜਦ ਅਸੀਂ ਲੋਕ ਸੈਟ 'ਤੇ ਆਏ, ਤਦ ਰਾਜ ਕਾਫੀ ਸ਼ਾਂਤ ਸਨ, ਪਰ ਜਿਵੇਂ ਹੀ ਗਾਣਾ ਵਜਾਇਆ ਗਿਆ, ਉਹ ਡਾਂਸ ਦੀ ਮਸਤੀ ਵਿੱਚ ਝੂਮ ਉਠੇ।” ਇਹ ਚਰਚਾ ਸੁਣ ਕੇ ਨੁਸਰਤ ਨੇ ਅੱਗੇ ਕਿਹਾ, ‘‘ਤੁਹਾਨੂੰ ਉਨ੍ਹਾਂ ਨੂੰ ਪਾਰਟੀ ਵਿੱਚ ਦੇਖਣਾ ਚਾਹੀਦੈ। ਜੇ ਤੁਸੀਂ ਨੱਬੇ ਦੇ ਦਹਾਕੇ ਦਾ ਬਾਲੀਵੁੱਡ ਮਿਊਜ਼ਿਕ ਵਜਾਓਗੇ, ਤਾਂ ਉਹ ਇਨ੍ਹਾਂ ਗੀਤਾਂ 'ਤੇ ਬਿਹਤਰੀਨ ਡਾਂਸ ਕਰਦੇ ਹਨ।”