ਟੋਰਾਂਟੋ, 26 ਅਕਤੂਬਰ (ਪੋਸਟ ਬਿਊਰੋ) : ਦਰਜਨਾਂ ਲੋਕਾਂ ਨਾਲ ਮਾਸਕ ਤੋਂ ਬਿਨਾਂ ਤਸਵੀਰਾਂ ਖਿਚਵਾਉਣ ਵਾਲੇ ਨਾਇਗਰਾ ਤੋਂ ਪੀਸੀ ਐਮਪੀਪੀ ਨੂੰ ਓਨਟਾਰੀਓ ਦੇ ਹਸਪਤਾਲ ਦੀ ਲਾਬੀ ਦੇ ਮੁਖੀ ਵੱਲੋਂ ਸਜ਼ਾ ਦਿੱਤੇ ਜਾਣ ਦੀ ਮੰਗ ਕੀਤੀ ਜਾ ਰਹੀ ਹੈ|
ਸੈਮ ਊਸਟਰਹੌਫ ਨੇ ਵੀਕੈਂਡ ਉੱਤੇ ਅਣਦੱਸੇ ਬੈਂਕੁਏਟ ਹਾਲ ਵਿੱਚ 40 ਹੋਰਨਾਂ ਵਿਅਕਤੀਆਂ ਨਾਲ ਬਿਨਾਂ ਮਾਸਕ ਤੋਂ ਖਿਚਵਾਈਆਂ ਆਪਣੀਆਂ ਤਸਵੀਰਾਂ ਆਨਲਾਈਨ ਸਾਂਝੀਆਂ ਕੀਤੀਆਂ| ਹੁਣ ਡਲੀਟ ਕੀਤੀਆਂ ਜਾ ਚੁੱਕੀਆਂ ਇਨ੍ਹਾਂ ਤਸਵੀਰਾਂ ਵਿੱਚ ਸਿੱਖਿਆ ਮੰਤਰੀ ਸਟੀਫਨ ਲਿਚੇ ਦੇ ਪਾਰਲੀਆਮੈਂਟਰੀ ਅਸਿਸਟੈਂਟ ਊਸਟਰਹੌਫ ਘੱਟੋ ਘੱਟ ਚਾਲੀ ਵਿਅਕਤੀਆਂ ਦੇ ਗਰੁੱਪ ਨਾਲ ਬਿਨਾਂ ਮਾਸਕ ਤੋਂ ਨਜ਼ਰ ਆ ਰਹੇ ਹਨ|
ਇਸ ਉੱਤੇ ਓਨਟਾਰੀਓ ਹੌਸਪਿਟਲ ਐਸੋਸਿਏਸ਼ਨ ਦੇ ਪ੍ਰੈਜ਼ੀਡੈਂਟ ਐਨਥਨੀ ਡੇਲ, ਜੋ ਕਿ ਸੈਕਿੰਡ ਵੇਵ ਨੂੰ ਹੈਂਡਲ ਕਰਨ ਦੇ ਸਬੰਧ ਵਿੱਚ ਫੋਰਡ ਸਰਕਾਰ ਦੇ ਤਕੜੇ ਆਲੋਚਕ ਹਨ, ਨੇ ਟਵੀਟ ਕਰਕੇ ਆਖਿਆ ਕਿ ਊਸਟਰਹੌਫ ਤੋਂ ਪਾਰਲੀਮਾਨੀ ਸਕੱਤਰ ਦਾ ਅਹੁਦਾ ਵਾਪਿਸ ਲੈ ਲਿਆ ਜਾਣਾ ਚਾਹੀਦਾ ਹੈ|
ਇਸ ਤਰ੍ਹਾਂ ਦੇ ਉੱਠ ਰਹੇ ਸਵਾਲਾਂ ਬਾਰੇ ਊਸਟਰਹੌਫ ਨੇ ਆਖਿਆ ਕਿ ਭਾਵੇਂ ਬੈਂਕੁਏਟ ਹਾਲ ਵਿੱਚ ਸਾਰੇ ਨਿਯਮਾਂ ਦੀ ਪਾਲਣਾ ਹੋ ਰਹੀ ਸੀ ਪਰ ਉਨ੍ਹਾਂ ਨੂੰ ਕਾਹਲੀ ਵਿੱਚ ਖਿਚਵਾਈਆਂ ਗਈਆਂ ਤਸਵੀਰਾਂ ਵਿੱਚ ਮਾਸਕ ਪਾ ਲੈਣਾ ਚਾਹੀਦਾ ਸੀ ਪਰ ਅਜਿਹਾ ਨਾ ਕਰਨ ਲਈ ਉਹ ਮੁਆਫੀ ਮੰਗਦੇ ਹਨ|
ਇਸ ਉੱਤੇ ਗੱਲ ਕਰਦਿਆਂ ਸੋਮਵਾਰ ਦੁਪਹਿਰ ਨੂੰ ਪ੍ਰੀਮੀਅਰ ਡੱਗ ਫੋਰਡ ਨੇ ਆਖਿਆ ਕਿ ਊਸਟਰਹੌਫ ਨੂੰ ਨਾ ਹੀ ਡੀਮੋਟ ਕੀਤਾ ਜਾ ਰਿਹਾ ਹੈ ਤੇ ਨਾ ਹੀ ਇਨ੍ਹਾਂ ਤਸਵੀਰਾਂ ਲਈ ਉਨ੍ਹਾਂ ਨੂੰ ਕੋਈ ਹੋਰ ਸਜ਼ਾ ਹੀ ਦਿੱਤੀ ਜਾ ਰਹੀ ਹੈ| ਉਹ ਬਹੁਤ ਹੀ ਵਧੀਆ ਨੁਮਾਇੰਦੇ ਹਨ ਤੇ ਆਪਣੀ ਟੀਮ ਵਿੱਚ ਉਨ੍ਹਾਂ ਨੂੰ ਸ਼ਾਮਲ ਕੀਤੇ ਜਾਣ ਉੱਤੇ ਸਾਨੂੰ ਮਾਣ ਹੈ|