ਓਨਟਾਰੀਓ, 25 ਅਕਤੂਬਰ (ਪੋਸਟ ਬਿਊਰੋ) : ਐਤਵਾਰ ਨੂੰ ਓਨਟਾਰੀਓ ਵਿੱਚ ਕੋਵਿਡ-19 ਦੇ 1042 ਮਾਮਲੇ ਦਰਜ ਕੀਤੇ ਗਏ| ਮਾਰਚ ਵਿੱਚ ਮਹਾਂਮਾਰੀ ਸੁæਰੂ ਹੋਣ ਤੋਂ ਲੈ ਕੇ ਹੁਣ ਤੱਕ ਇੱਕ ਦਿਨ ਵਿੱਚ ਕੋਵਿਡ-19 ਦੇ ਪ੍ਰੋਵਿੰਸ ਵਿੱਚ ਪਾਏ ਗਏ ਮਾਮਲਿਆਂ ਵਿੱਚ ਇਹ ਸੱਭ ਤੋਂ ਵੱਧ ਹਨ|
ਇਸ ਤੋਂ ਪਹਿਲਾਂ ਸ਼ਨਿੱਚਰਵਾਰ ਨੂੰ ਪ੍ਰੋਵਿੰਸ ਵਿੱਚ ਕੋਵਿਡ-19 ਦੇ 978 ਮਾਮਲੇ ਦਰਜ ਕੀਤੇ ਗਏ ਸਨ| ਇੱਕ ਹਫਤੇ ਪਹਿਲਾਂ 747 ਮਾਮਲਿਆਂ ਤੋਂ ਬਾਅਦ ਹਫਤੇ ਵਿੱਚ ਪਾਜ਼ੀਟਿਵ ਮਾਮਲਿਆਂ ਦੀ ਗਿਣਤੀ 857 ਹੋ ਗਈ| ਇਸ ਸਮੇਂ ਓਨਟਾਰੀਓ ਵਿੱਚ ਕਰੋਨਾਵਾਇਰਸ ਦੇ ਕੁੱਲ ਮਾਮਲੇ 70,000 ਦਾ ਅੰਕੜਾ ਪਾਰ ਕਰ ਗਏ ਹਨ|
ਸਿਹਤ ਮੰਤਰਾਲੇ ਦੇ ਬੁਲਾਰੇ ਨੇ ਆਖਿਆ ਕਿ ਚਿੰਤਾ ਵਾਲੀ ਗੱਲ ਇਹ ਹੈ ਕਿ ਅਜਿਹੇ ਮਾਮਲਿਆਂ ਵਿੱਚ ਵਾਧਾ ਥੈਂਕਸਗਿਵਿੰਗ ਸਬੰਧੀ ਹੋਣ ਵਾਲੇ ਇੱਕਠਾਂ ਕਾਰਨ ਹੋਇਆ ਹੋ ਸਕਦਾ ਹੈ| ਉਨ੍ਹਾਂ ਆਖਿਆ ਕਿ ਅਸੀਂ ਹਾਲਾਤ ਉੱਤੇ ਨਜ਼ਰ ਰੱਖਣੀ ਜਾਰੀ ਰੱਖਾਂਗੇ ਤੇ ਮਹਾਂਮਾਰੀ ਦੇ ਪਸਾਰ ਨੂੰ ਰੋਕਣ ਲਈ ਜੋ ਕੁੱਝ ਸੰਭਵ ਹੋਵੇਗਾ ਉਹ ਕਰਾਂਗੇ| ਉਨ੍ਹਾਂ ਆਖਿਆ ਕਿ ਅਸੀਂ ਆਪਣੇ ਸਕੂਲ ਤੇ ਅਰਥਚਾਰਾ ਖੁੱਲ੍ਹਾ ਰੱਖਾਂਗੇ ਤੇ ਆਪਣੇ ਕਮਜ਼ੋਰ ਲੋਕਾਂ ਦੀ ਹਿਫਾਜ਼ਤ ਕਰਾਂਗੇ|
ਇਸ ਸਮੇਂ 309 ਮਾਮਲਿਆਂ ਨਾਲ ਟੋਰਾਂਟੋ ਪ੍ਰੋਵਿੰਸ ਦਾ ਹੌਟਸਪੌਟ ਬਣਿਆ ਹੋਇਆ ਹੈ, ਪੀਲ ਰੀਜਨ ਵਿੱਚ ਕੋਵਿਡ-19 ਦੇ 289 ਮਾਮਲੇ ਹਨ ਤੇ ਯੌਰਕ ਰੀਜਨ ਵਿੱਚ 117 ਤੇ ਓਟਵਾ ਵਿੱਚ 80 ਮਾਮਲੇ ਪਾਏ ਗਏ ਹਨ| ਟੋਰਾਂਟੋ ਦੀ ਮੈਡੀਕਲ ਆਫੀਸਰ ਡਾæ ਐਲੀਨ ਡੀ ਵਿੱਲਾ ਨੇ ਆਖਿਆ ਕਿ ਇਸੇ ਲਈ ਉਹ ਲੋਕਾਂ ਨੂੰ ਘੱਟ ਤੋਂ ਘੱਟ ਇੱਕ ਦੂਜੇ ਦੇ ਸੰਪਰਕ ਵਿੱਚ ਆਉਣ ਲਈ ਆਖ ਰਹੀ ਹੈ| ਜਿੰਨਾਂ ਅਸੀਂ ਇੱਕ ਦੂਜੇ ਦੇ ਸੰਪਰਕ ਵਿੱਚ ਘੱਟ ਆਵਾਂਗੇ ਓਨਾ ਹੀ ਅਸੀਂ ਇਸ ਵਾਇਰਸ ਨੂੰ ਫੈਲਣ ਦਾ ਘੱਟ ਮੌਕਾ ਦੇਵਾਂਗੇ|