ਓਨਟਾਰੀਓ, 22 ਅਕਤੂਬਰ (ਪੋਸਟ ਬਿਊਰੋ) : ਯੌਰਕ ਰੀਜਨਲ ਪੁਲਿਸ ਦਾ ਕਹਿਣਾ ਹੈ ਕਿ ਜੁਲਾਈ ਮਹੀਨੇ ਤੋਂ ਲਾਪਤਾ ਹੈਲਨ ਸੀਡੋ, ਜਿਸ ਨੂੰ ਮ੍ਰਿਤਕ ਮੰਨਿਆ ਜਾ ਰਿਹਾ ਹੈ, ਦੀ ਗੱਡੀ ਉਨ੍ਹਾਂ ਨੂੰ ਲੱਭ ਗਈ ਹੈ|
ਉਸ ਦੇ ਪਤੀ 61 ਸਾਲਾ ਜੌਹਨ ਸੀਡੋ ਨੂੰ ਸਤੰਬਰ ਵਿੱਚ ਗ੍ਰਿਫਤਾਰ ਕੀਤਾ ਗਿਆ ਸੀ ਤੇ ਉਸ ਉੱਤੇ ਸੈਕਿੰਡ ਡਿਗਰੀ ਮਰਡਰ ਦੇ ਦੋਸ਼ ਲਾਏ ਗਏ ਸਨ| ਪੁਲਿਸ ਨੂੰ ਹੈਲਨ ਦੀ ਗੱਡੀ ਪਿਛਲੇ ਹਫਤੇ ਮਿਲ ਗਈ ਸੀ| ਹੰਟਸਵਿੱਲ ਦੇ ਨੌਰਥਈਸਟ ਦੀ ਖਦਾਨ ਵਿੱਚ ਕੁੱਝ ਸ਼ਿਕਾਰੀਆਂ ਨੂੰ ਇਹ ਸੜੀ ਹੋਈ ਕਾਰ ਮਿਲੀ|
ਕਾਰ ਪੂਰੀ ਤਰ੍ਹਾਂ ਸੜੀ ਹੋਈ ਸੀ| ਜਾਂਚਕਾਰ ਕਿਸੇ ਵੀ ਅਜਿਹੇ ਸ਼ਖਸ ਨਾਲ ਗੱਲ ਕਰਨੀ ਚਾਹੁੰਦੇ ਸਨ ਜਿਸ ਨੇ ਇਸ ਗੱਡੀ ਨੂੰ ਵੇਖਿਆ ਹੋਵੇ ਜਾਂ ਫਿਰ ਅਗਸਤ ਤੇ ਸਤੰਬਰ ਦਰਮਿਆਨ ਇਸ ਇਲਾਕੇ ਵਿੱਚ ਅੱਗ ਵੇਖੀ ਹੋਵੇ| ਜੌਹਨ ਸੀਡੋ ਨੂੰ ਵੀਰਵਾਰ ਦੁਪਹਿਰ ਨੂੰ ਵਾਇਆ ਵੀਡੀਓ ਲਿੰਕ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ|