ਟੋਰਾਂਟੋ, 22 ਅਕਤੂਬਰ (ਪੋਸਟ ਬਿਊਰੋ) : ਟੋਰਾਂਟੋ ਪੁਲਿਸ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਤਿੰਨ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ ਜਿਨ੍ਹਾਂ ਉੱਤੇ ਨਸੇæ ਰੱਖਣ ਤੇ ਫਰਾਡ ਨਾਲ ਸਬੰਧਤ ਦੋਸ਼ ਲਾਏ ਗਏ ਹਨ|
ਇਨ੍ਹਾਂ ਤਿੰਨਾਂ ਨੂੰ ਉਸ ਸਮੇਂ ਗ੍ਰਿਫਤਾਰ ਕੀਤਾ ਗਿਆ ਜਦੋਂ ਪੁਲਿਸ ਨੇ ਇਹ ਜਾਂਚਣ ਲਈ ਗੱਡੀ ਰੋਕੀ ਕਿ ਡਰਾਈਵਰ ਨੇ ਕਿਤੇ ਨਸ਼ਾ ਤਾਂ ਨਹੀਂ ਕੀਤਾ ਹੋਇਆ| ਪੁਲਿਸ ਨੇ ਸੋਮਵਾਰ ਨੂੰ ਸ਼ਾਮੀਂ 7:00 ਵਜੇ ਫੋਰਟ ਯੌਰਕ ਬੋਲੀਵੀਆਰਡ ਤੇ ਟੈਲੀਗ੍ਰਾਮ ਮਿਊਜ਼ ਨੇੜੇ ਇਸ ਕਾਰ ਨੂੰ ਰੋਕਿਆ| ਉਨ੍ਹਾਂ ਨੂੰ ਕਾਰ ਵਿੱਚ ਤਿੰਨ ਵਿਅਕਤੀ ਮਿਲੇ ਤੇ ਇਸ ਦੇ ਨਾਲ ਹੀ ਗੱਡੀ ਵਿੱਚੋਂ ਵੱਡੀ ਮਾਤਰਾ ਵਿੱਚ ਮੈਰੀਯੁਆਨਾ ਤੇ ਪੈਸੇ ਵੀ ਬਰਾਮਦ ਹੋਏ| ਪੁਲਿਸ ਨੂੰ ਲੀਗਲ ਦਸਤਾਵੇਜ਼ਾਂ ਦੀ ਸੋਧੀ ਹੋਈ ਨਕਲ ਵੀ ਮਿਲੀ|
ਪੁਲਿਸ ਨੇ ਦੱਸਿਆ ਕਿ ਨਕਲੀ ਦਸਤਾਵੇਜ਼ਾਂ ਦੀ ਵਰਤੋਂ ਲੋਕਾਂ ਨਾਲ 40,000 ਡਾਲਰ ਦੀ ਠੱਗੀ ਮਾਰਨ ਲਈ ਕੀਤੀ ਗਈ| ਸਟੇਨਰ ਦੀ 43 ਸਾਲਾ ਬ੍ਰੈਂਡੀ ਕਿੰਘਨ ਨੂੰ ਕਈ ਚਾਰਜਿਜ਼ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਤੇ ਇਸ ਵਿੱਚ ਧੋਖਾਧੜੀ ਦੇ ਨੌ ਮਾਮਲੇ ਤੇ ਪਛਾਣ ਚੋਰੀ ਕਰਨ ਦੇ ਛੇ ਮਾਮਲੇ ਸ਼ਾਮਲ ਹਨ| ਗੱਡੀ ਵਿੱਚ ਸਵਾਰ ਦੋ ਹੋਰ ਵਿਅਕਤੀਆਂ ਨੂੰ ਨਸ਼ਿਆਂ ਨਾਲ ਸਬੰਧਤ ਕਈ ਹੋਰ ਚਾਰਜਿਜ਼ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ|
ਵਾਟਰਲੂ ਦੇ 31 ਸਾਲਾ ਆਬਦੀਰਹਿਮਾਨ ਤੇ ਸਾਰਨੀਆ ਦੇ 22 ਸਾਲਾ ਜ਼ੈਕਰੀ ਸ਼ੀਅਰਡ ਨੂੰ 5000 ਡਾਲਰ ਤੋਂ ਵੱਧ ਦੇ ਜੁਰਮ ਕਰਕੇ ਕੀਤੀ ਗਈ ਕਮਾਈ, 30 ਗ੍ਰਾਮ ਤੋਂ ਵੱਧ ਦੀ ਮੈਰੀਯੁਆਨਾ ਸਮਗਲਿੰਗ ਦੇ ਇਰਾਦੇ ਨਾਲ ਕੋਲ ਰੱਖਣ ਲਈ ਚਾਰਜ ਕੀਤਾ ਗਿਆ ਹੈ| ਸ਼ੀਅਰਡ ਉੱਤੇ ਗੈਰਕਾਨੂੰਨੀ ਚੀਜ਼ਾਂ ਕੋਲ ਰੱਖਣ ਤੇ ਪ੍ਰੋਬੇਸ਼ਨ ਦੀਆਂ ਸ਼ਰਤਾਂ ਪੂਰੀਆਂ ਨਾ ਕਰਨ ਵਰਗੇ ਦੋਸ਼ ਵੀ ਲਾਏ ਗਏ ਹਨ| ਪੁਲਿਸ ਨੇ ਦੱਸਿਆ ਕਿ ਇਸ ਮਾਮਲੇ ਦੀ ਜਾਂਚ ਚੱਲ ਰਹੀ ਹੈ|