ਟੋਕੀਓ, 21 ਅਕਤੂਬਰ (ਪੋਸਟ ਬਿਊਰੋ)- ਸਾਈਬਰ ਹਮਲਿਆਂ ਦੇ ਲਈ ਰੂਸੀ ਖੁਫੀਆ ਅਫਸਰਾਂ ਨੂੰ ਦੋਸ਼ੀ ਕਰਾਰ ਦੇਣ ਦੇ ਬਾਅਦ ਵਿਵਾਦ ਵਧ ਗਿਆ ਹੈ। ਅਮਰੀਕਾ ਪਿੱਛੋਂ ਬ੍ਰਿਟੇਨ ਅਤੇ ਜਾਪਾਨ ਨੇ ਵੀ ਰੂਸ ਨੂੰ ਸਾਵਧਾਨ ਕੀਤਾ ਹੈ।
ਜਾਪਾਨ ਨੇ 2021 ਵਿੱਚ ਹੋਣ ਵਾਲੀਆਂ ਉਲੰਪਿਕ ਖੇਡਾਂ ਵਿੱਚ ਚੌਕਸੀ ਵਰਤਣ ਲਈ ਸਰਗਰਮੀ ਵਧਾ ਦਿੱਤੀ ਅਤੇਕਿਹਾ ਹੈ ਕਿ ਉਹ ਅਗਲੇ ਸਾਲ ਹੋ ਰਹੀਆਂ ਉਲੰਪਿਕ ਖੇਡਾਂ ਵਿੱਚ ਸਾਈਬਰ ਹਮਲਿਆਂ ਤੋਂ ਬਚਣ ਦੇ ਸਾਰੇ ਜ਼ਰੂਰੀ ਪ੍ਰਬੰਧ ਕਰ ਰਿਹਾ ਹੈ। ਅੰਤਰ ਰਾਸ਼ਟਰੀ ਉਲੰਪਿਕ ਕਮੇਟੀ ਨੇ ਵੀ ਕਿਹਾ ਹੈ ਕਿ ਸਾਈਬਰ ਸੁਰੱਖਿਆ ਸਾਡੀਆਂ ਮੁੱਖ ਪਹਿਲ ਵਿੱਚ ਹੈ। ਵਰਨਣ ਯੋਗ ਹੈ ਕਿ ਸੰਸਾਰ ਭਰ ਵਿੱਚ ਸਾਈਬਰ ਹਮਲੇ ਅਤੇ ਹੈਕਿੰਗ ਦੇ ਕੇਸਾਂ ਵਿੱਚ ਨਿਆਂ ਵਿਭਾਗ ਨੇ ਛੇ ਰੂਸੀ ਖੁਫੀਆ ਅਫਸਰਾਂ ਬਾਰੇ ਕਿਹਾ ਹੈ ਕਿ ਰੂਸੀ ਫੌਜ ਦੀ ਖੁਫੀਆ ਏਜੰਸੀ ਜੀ ਆਰ ਯੂ ਦੇ ਯੂਨਿਟ 7445 ਨੇ ਇਹ ਹਮਲੇ ਕੀਤੇ ਹਨ ਅਤੇ ਇਸ ਦੇ ਛੇ ਅਧਿਕਾਰੀ ਸਿੱਧੇ ਤੌਰ `ਤੇ ਜ਼ਿੰਮੇਵਾਰ ਹਨ। ਰੂਸੀ ਹੈਕਰਾਂ ਦੀ ਇਸੇ ਟੀਮ ਨੇ 2015 ਤੋਂ 2019 ਵਿਚਾਲੇ ਕਈ ਸੰਵੇਦਨਸ਼ੀਲ ਥਾਵਾਂ `ਤੇ ਸਾਈਬਰ ਹਮਲੇ ਕੀਤੇ ਹਨ।
ਇਹ ਵੀ ਕਿਹਾ ਜਾ ਰਿਹਾ ਹੈ ਕਿ ਕੈਮੀਕਲ ਹਥਿਆਰਾਂ ਦੇ ਪਾਬੰਦੀਸ਼ੁਦਾ ਖੇਤਰ ਵਿੱਚ ਸਾਈਬਰ ਹਮਲੇ ਕਰ ਕੇ ਰੂਸ ਨੇ ਘੁੱਸਪੈਠ ਦਾ ਯਤਨ ਕੀਤਾ ਸੀ। ਇਹੀ ਨਹੀਂ, ਰੂਸ ਉੱਤੇ ਅਰਬਾਂ ਡਾਲਰ ਦੇ ਨੁਕਸਾਨ ਅਤੇ ਪੈਨਸਿਲਵੇਨੀਆ ਵਿੱਚ ਸਿਹਤ ਨੈਟਵਰਕ ਦੇ ਨਾਲ ਫਰਾਂਸ ਦੀ ਚੋਣ ਵਿੱਚ ਵੀ ਵਿਘਨ ਪਾਉਣ ਦੇ ਦੋਸ਼ ਹਨ। ਸਾਲ 2016 ਵਿੱਚ ਵੀ ਅਮਰੀਕੀ ਰਾਸ਼ਟਰਪਤੀ ਦੀ ਚੋਣ ਤੋਂ ਇੱਕ ਹਫਤਾ ਪਹਿਲਾਂ ਇਸ ਖੁਫੀਆ ਗਰੁੱਪ ਨੇ ਡੈਮੋਕ੍ਰੇਟਿਕ ਪਾਰਟੀ ਦੇ ਈ-ਮੇਲ ਇੰਟਰਨੈਟ `ਤੇ ਹਮਲੇ ਕੀਤੇ ਸਨ। ਓਦੋਂ ਇਹ ਸਾਈਬਰ ਹਮਲੇ ਸਭ ਤੋਂਵੱਧ ਖਤਰਨਾਕ ਅਤੇ ਨੁਕਸਾਨਦੇਹ ਮੰਨੇ ਗਏ ਸਨ। ਯਾਹੂ ਨੂੰ ਵੀ ਰੂਸ ਨੇ ਆਪਣਾ ਨਿਸ਼ਾਨਾ ਬਣਾਇਆ ਸੀ ਅਤੇ ਇਨ੍ਹਾਂ ਹੈਕਰਾਂ ਨੇ 2018 ਵਿੱਚ ਦੱਖਣੀ ਕੋਰੀਆ ਵਿੱਚ ਹੋਈਆਂ ਵਿੰਟਰ ਓਲੰਪਿਕ ਖੇਡਾਂ ਵਿੱਚ ਵੀ ਸਾਫਟਵੇਅਰ `ਤੇ ਹਮਲਾ ਕਰ ਕੇ ਡਾਟਾ ਨੂੰ ਨੁਕਸਾਨ ਪੁਚਾਇਆ ਸੀ।
ਦੂਸਰੇ ਪਾਸੇ ਮਾਸਕੋ ਵਿੱਚ ਰੂਸ ਦੀ ਸਰਕਾਰ ਦੇ ਇੱਕ ਬੁਲਾਰੇ ਦਿਮਿਤ੍ਰੀ ਪੇਸਕੋਵ ਨੇ ਇਨ੍ਹਾਂ ਸਾਰੇ ਕਿਸਮ ਦੇ ਦੋਸ਼ਾਂ ਤੋਂ ਇਨਕਾਰ ਕਰਦੇ ਹੋਏ ਕਿਹਾ ਕਿ ਇਹ ਸਿਰਫ ਰੂਸੀ ਫੋਬੀਆ ਹੈ।