ਕੈਲਗਰੀ, 20 ਅਕਤੂਬਰ (ਪੋਸਟ ਬਿਊਰੋ) : ਅਲਬਰਟਾ ਹੈਲਥ ਦਾ ਕਹਿਣਾ ਹੈ ਕਿ ਪ੍ਰੋਵਿੰਸ ਵਿੱਚ ਕੋਵਿਡ-19 ਦੇ 49 ਮਾਮਲੇ ਇੱਕ ਵਿਆਹ ਦੇ ਜਸ਼ਨਾਂ ਨਾਲ ਹੀ ਜੁੜੇ ਹੋਏ ਨਿਕਲੇ|
ਅਕਤੂਬਰ ਦੇ ਸ਼ੁਰੂ ਵਿੱਚ ਹੋਏ ਇਸ ਈਵੈਂਟ ਵਿੱਚ ਵੱਡੀ ਗਿਣਤੀ ਅਲਬਰਟਾ ਵਾਸੀਆਂ ਨੇ ਹਿੱਸਾ ਲਿਆ| ਇਹ ਖੁਲਾਸਾ ਅਲਬਰਟਾ ਹੈਲਥ ਦੇ ਬੁਲਾਰੇ ਟੌਮ ਮੈਕਮਿਲਨ ਨੇ ਕੀਤਾ| ਸਾਰੇ 49 ਕੇਸ ਐਕਟਿਵ ਹੀ ਪਾਏ ਗਏ ਹਨ ਤੇ ਇਸ ਸਬੰਧ ਵਿੱਚ ਕਾਂਟੈਕਟ ਟਰੇਸਿੰਗ ਵੀ ਪੂਰੇ ਜ਼ੋਰਾਂ ਸ਼ੋਰਾਂ ਨਾਲ ਚੱਲ ਰਹੀ ਹੈ| ਮੈਕਮਿਲਨ ਨੇ ਆਖਿਆ ਕਿ ਅਜੇ ਤੱਕ ਇਹ ਸਪਸ਼ਟ ਨਹੀਂ ਹੋ ਸਕਿਆ ਕਿ ਕਿਸ ਕਾਰਨ ਐਨੇ ਸਾਰੇ ਲੋਕ ਇੱਕਠਿਆਂ ਕੋਵਿਡ-19 ਦਾ ਸ਼ਿਕਾਰ ਹੋਏ|
ਉਨ੍ਹਾਂ ਆਖਿਆ ਕਿ ਕਿਸੇ ਵੀ ਲਾਂਗ ਟਰਮ ਕੇਅਰ ਫੈਸਿਲਿਟੀ ਨਾਲ ਵੀ ਇਸ ਮਾਮਲੇ ਦਾ ਕੋਈ ਲੈਣਾ ਦੇਣਾ ਨਹੀਂ ਹੈ ਤੇ ਨਾ ਹੀ ਇਸ ਮਾਮਲੇ ਨਾਲ ਜੁੜਿਆ ਕੋਈ ਵਿਅਕਤੀ ਹਸਪਤਾਲ ਹੀ ਗਿਆ| ਉਨ੍ਹਾਂ ਇਹ ਗੱਲ ਜ਼ੋਰ ਦੇ ਕੇ ਆਖੀ ਕਿ ਸੋਸ਼ਲ ਇੱਕਠ ਅਜਿਹੀਆਂ ਆਊਟਬ੍ਰੇਕਸ ਦਾ ਸਰੋਤ ਹੋ ਸਕਦੇ ਹਨ| ਮੈਕਮਿਲਨ ਨੇ ਆਖਿਆ ਕਿ ਸੋਸ਼ਲ ਇੱਕਠਾਂ ਨਾਲ ਸਬੰਧਤ ਕਈ ਆਊਟਬ੍ਰੇਕ ਪਿੱਛੇ ਜਿਹੇ ਸਾਹਮਣੇ ਆਏ ਹਨ| ਇਹ ਅਲਬਰਟਾ ਵਾਸੀਆਂ ਲਈ ਵੱਡੀ ਚੁਣੌਤੀ ਹੈ ਕਿ ਵਾਇਰਸ ਅਜੇ ਖਤਮ ਨਹੀਂ ਹੋਇਆ ਤੇ ਕਿਸੇ ਵੀ ਸੋਸ਼ਲ ਇੱਕਠ ਵਿੱਚ ਇਸ ਤਰ੍ਹਾਂ ਦਾ ਐਕਸਪੋਜ਼ਰ ਹੋ ਸਕਦਾ ਹੈ|
ਉਨ੍ਹਾਂ ਆਖਿਆ ਕਿ ਜੇ ਲੋਕਾਂ ਨੂੰ ਕਿਸੇ ਤਰ੍ਹਾਂ ਦੇ ਲੱਛਣ ਨਜ਼ਰ ਆਉਂਦੇ ਹਨ ਤਾਂ ਉਹ ਇਸ ਤਰ੍ਹਾਂ ਦੇ ਇੱਕਠ ਵਿੱਚ ਜਾਣ ਤੋਂ ਬਚਣ|