Welcome to Canadian Punjabi Post
Follow us on

05

August 2021
 
ਪੰਜਾਬ

ਪੰਜਾਬ ਤੋਂਦਿੱਲੀ, ਯੂ ਪੀ, ਬਿਹਾਰ ਨੂੰ ਧੜੱਲੇ ਨਾਲ ਚੱਲ ਰਹੀਆਂ ਨੇ ਗ਼ੈਰ ਕਾਨੂੰਨੀ ਬੱਸਾਂ

October 20, 2020 01:51 AM

ਜਲੰਧਰ, 19 ਅਕਤੂਬਰ (ਪੋਸਟ ਬਿਊਰੋ)- ਪਹਿਲਾਂ ਕੋਰੋਨਾ ਆਫ਼ਤ ਦੇ ਕਾਰਨ ਭਾਰਤ ਵਿੱਚ ਰੇਲ ਆਵਾਜਾਈ ਬੰਦ ਸੀ ਤੇ ਅੱਜਕਲ੍ਹ ਇੱਕ ਮਹੀਨੇ ਤੋਂ ਕਿਸਾਨ ਸੰਘਰਸ਼ ਕਾਰਨ ਰੇਲ ਆਵਾਜਾਈ ਠੱਪ ਹੋਣ ਕਰ ਕੇ ਅੰਤਰਰਾਜੀ ਬੱਸ ਸੇਵਾ ਹਾਲੇ ਚੰਗੀ ਤਰ੍ਹਾਂ ਚਾਲੂ ਨਹੀਂ ਹੋਈ, ਪਰ ਕੁਝ ਨਿੱਜੀ ਟਰਾਂਸਪੋਰਟਰ ਪੂਰੇ ਧੜੱਲੇ ਨਾਲ ਪੰਜਾਬ ਦੇ ਵੱਖ-ਵੱਖ ਸ਼ਹਿਰਾਂ ਤੋਂ ਗ਼ੈਰ ਕਾਨੂੰਨੀ ਬੱਸਾਂ ਚਲਾ ਰਹੇ ਹਨ ਤੇ ਮੁੰਹ ਮੰਗਿਆ ਕਿਰਾਇਆ ਵਸੂਲ ਕਰਦੇ ਹਨ। ਏਹੀ ਨਹੀਂ ਦਿੱਲੀ ਤੋਂ ਪੰਜਾਬ ਨੂੰ ਆਉਣ ਵਾਲੀਆਂ ਅਜਿਹੀਆਂ ਗ਼ੈਰ ਕਾਨੂੰਨੀ ਬੱਸਾਂ ਜਦ ਰਾਤ ਸਮੇਂ ਜੀ ਟੀ ਰੋਡ ਉਪਰ ਹਰਿਆਣਾ ਵਿੱਚ ਢਾਬਿਆਂ ਉੱਤੇ ਖੜੋਂਦੀਆਂ ਹਨ ਤਾਂ ਸਵਾਰੀਆਂ ਕੋਲੋਂ ਡੰਡੇ ਦੇ ਜ਼ੋਰ ਨਾਲ ਵਾਧੂ ਪੈਸੇ ਵਸੂਲੇ ਜਾਂਦੇ ਹਨ ਤੇ ਨਾਂਹ-ਨੁੱਕਰ ਕਰਨ ਵਾਲਿਆਂ ਨੂੰ ਕੁਟਾਪਾ ਵੀ ਚਾੜ੍ਹਿਆ ਜਾਂਦਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਜਲੰਧਰ, ਲੁਧਿਆਣਾ ਅਤੇ ਹੋਰ ਕੁਝ ਸ਼ਹਿਰਾਂ ਤੋਂ ਹਰ ਰੋਜ਼ ਸੈਂਕੜੇ ਬੱਸਾਂ ਦਿੱਲੀ, ਉਤਰ ਪ੍ਰਦੇਸ਼ ਤੇ ਬਿਹਾਰ ਆਦਿ ਨੂੰ ਸ਼ਰੇਆਮ ਚਲਦੀਆਂ ਹਨ।
ਦੂਸਰੇ ਪਾਸੇ ਦਿੱਲੀ ਦੇ ਕਸ਼ਮੀਰੀ ਗੇਟ ਤੇ ਚਾਂਦਨੀ ਚੌਕ ਕੋਲੋਂ ਲੁਧਿਆਣਾ ਅਤੇ ਜਲੰਧਰ ਲਈ ਰੋਜ਼ ਗ਼ੈਰ ਕਾਨੂੰਨੀ ਬੱਸਾਂ ਚੱਲਦੀਆਂ ਹਨ। ਜਲੰਧਰ ਦੇ ਬੱਸ ਅੱਡੇ ਲਾਗੇ ਓਵਰ ਬ੍ਰਿਜ ਉੱਤੇ ਗੜ੍ਹਾ ਰੋਡ, ਮੈਡੀਕਲ ਕਾਲਜ ਦੇ ਮੂੁਹਰਲੇ ਖ਼ਾਲੀ ਮੈਦਾਨ ਤੋਂ ਅਤੇ ਸ਼ਾਮ 9 ਵਜੇ ਤੋਂ ਬਾਅਦ ਪੀ ਏ ਪੀ ਪੁਲ ਹੇਠੋਂ ਸ਼ਰੇਆਮ ਟਿਕਟਾਂ ਕੱਟ ਕੇ ਅਤੇ ਸਾਮਾਨ ਲੱਦਣ ਦੇ ਕਈ ਘੰਟੇ ਬਾਅਦ ਇਹ ਬੱਸਾਂ ਬਿਨਾਂ ਨਾਗਾ ਰੋਜ਼ ਜਾਂਦੀਆਂ ਹਨ। ਲੁਧਿਆਣਾ `ਚ ਫੋਕਲ ਪੁਆਇੰਟ, ਸ਼ੇਰਪੁਰ, ਚੀਮਾ ਚੌਕ, ਮੁੱਖ ਬੱਸ ਅੱਡੇ ਲਾਗੇ ਅਤੇ ਗਿਆਸਪੁਰਾ ਆਦਿ ਥਾਵਾਂ ਤੋਂ ਰੋਜ਼ ਨਾਜਾਇਜ਼ ਬੱਸਾਂ ਜਾਂਦੀਆਂ ਹਨ। ਪਤਾ ਲੱਗਾ ਹੈ ਕਿ ਇਨ੍ਹਾਂ ਗ਼ੈਰ ਕਾਨੂੰਨੀ ਬੱਸਾਂ ਲਈ ਸਵਾਰੀਆਂ ਦੀ ਬੁਕਿੰਗ ਵਾਸਤੇ ਬੱਸਾਂ ਵਾਲਿਆਂ ਨੇ ਠੇਕੇਦਾਰ ਰੱਖੇ ਹੋਏ ਹਨ। ਇਹ ਬੱਸਾਂ ਵਾਲੇ ਦਿੱਲੀ ਜਾਣ ਤੇ ਆਉਣ ਲਈ 950 ਰੁਪਏ ਕਿਰਾਇਆ ਵਸੂਲਦੇ ਹਨ ਤੇ ਉਤਰ ਪ੍ਰਦੇਸ਼ ਤੇ ਬਿਹਾਰ ਲਈ ਕਿਰਾਇਆ 1500 ਤੋਂ 2000 ਰੁਪਏ ਹੈ, ਪਰ ਮਹੀਨਿਆਂ ਤੋਂ ਇਹ ਨਾਜਾਇਜ਼ ਧੰਦਾ ਚੱਲ ਰਿਹਾ ਹੈ ਪ੍ਰਸ਼ਾਸਨ ਪੂਰੀ ਤਰ੍ਹਾਂ ਸੁੱਤਾ ਹੋਇਆ ਹੈ।
ਪਰਸੋਂ ਤੜਕੇ 3.30 ਵਜੇ ਦੇ ਕਰੀਬ ਇੱਕ ਡਬਲ ਡੈਕਰ ਬੱਸ ਦਿੱਲੀ ਦੇ ਕਸ਼ਮੀਰੀ ਗੇਟ ਤੋਂ ਸਵਾਰੀਆਂ ਲੈ ਕੇ ਲੁਧਿਆਣਾ ਅਤੇ ਜਲੰਧਰ ਲਈ ਚੱਲੀ। ਇਸ ਵਿੱਚ ਸਵਾਰ ਲੋਕਾਂ ਨੇ ਦੱਸਿਆ ਕਿ ਉਨ੍ਹਾਂ ਤੋਂ ਪ੍ਰਤੀ ਸਵਾਰੀ 950 ਵਸੂਲੇ ਗਏ ਤੇ ਉਥੇ ਖੜੀ ਏ ਸੀ ਬੱਸ ਵਿੱਚ ਲਿਜਾਣ ਦਾ ਭਰੋਸਾ ਦੇ ਕੇ ਤੋਰਨ ਦੇ ਵਕਤ ਇੱਕ ਬਗ਼ੈਰ ਏ ਸੀ ਪੁਰਾਣੀ ਬੱਸ ਵਿੱਚ ਬਿੱਠਾ ਦਿੱਤਾ। ਗ਼ੈਰ ਕਾਨੂੰਨੀ ਹੋਣ ਕਾਰਨ ਇਹ ਬੱਸ ਹਰਿਆਣਾ ਦੇ ਪੇਂਡੂ ਖੇਤਰਾਂ ਵਿੱਚੋਂ ਹੁੰਦੀ ਹੋਈ 9 ਘੰਟੇ ਬਾਅਦ ਅੰਬਾਲੇ ਪੁੱਜੀ। ਜਲੰਧਰ ਦੀ ਇੱਕ ਸਵਾਰੀ ਨੇ ਦੱਸਿਆ ਕਿ ਕਰਨਾਲ ਲੰਘ ਕੇ ਬੱਸ ਇੱਕ ਸ਼ੁੱਧ ਵੈਸ਼ਨੋ ਢਾਬੇ ਵਾਲੀ ਥਾਂ ਖੜੀ ਕੀਤੀ ਤਾਂ ਢਾਬੇ ਵਾਲਿਆਂ 40 ਰੁਪਏ ਥਾਲੀ ਦਾ ਹੋਕਾ ਦਿੱਤਾ। ਬੱਸ `ਚ 50 ਤੋਂ ਵਧੇਰੇ ਸਵਾਰੀਆਂ ਵਿੱਚ ਡੇਢ ਦਰਜਨ ਦੇ ਕਰੀਬ ਪੰਜਾਬੀ ਤੇ ਦਰਜਨ ਔਰਤਾਂ ਅਤੇ ਬਹੁਤੇ ਪ੍ਰਵਾਸੀ ਮਜ਼ਦੂਰ ਸਨ। ਜਦ ਖਾਣਾ ਖਾਣ ਵਾਲਿਆਂ ਨੇ ਪੈਸੇ ਦੇਣੇ ਸ਼ੁਰੂ ਕੀਤੇ ਤਾਂ ਢਾਬੇ ਵਾਲਿਆਂ ਕਿਹਾ ਕਿ 340 ਰੁਪਏ ਪ੍ਰਤੀ ਪਲੇਟ ਦਿਉ। ਇੱਕ ਪੰਜਾਬੀ ਬਜ਼ੁਰਗ ਨੇ ਜਦ ਸਵਾਲ ਕੀਤਾ ਤਾਂ ਉਸ ਦਾ ਕੁਟਾਪਾ ਚਾੜ੍ਹ ਦਿੱਤਾ ਤੇ ਢਾਬੇ ਵਾਲਿਆਂ ਦੇ ਬੰਦੇ ਰਾਡਾਂ, ਖੁਰਚਣੇ ਤੇ ਹੋਰ ਹਥਿਆਰ ਲੈ ਕੇ ਸਭ ਦੇ ਦੁਵਾਲੇ ਆ ਖੜੋਤੇ ਅਤੇ ਸਭ ਨੂੰ ਪੈਸੇ ਦੇਣ ਲਈ ਮਜ਼ਬੂਰ ਕੀਤਾ ਅਤੇ ਔਰਤਾਂ ਨੂੰ ਵੀ ਬੁਰਾ ਭਲਾ ਬੋਲਿਆ। ਬੱਸ `ਚ ਸਵਾਰ ਲੋਕਾਂ ਨੇ ਦੱਸਿਆ ਕਿ ਬੱਸ ਦੇ ਡਰਾਈਵਰ ਅਤੇ ਕੰਡਕਟਰ ਤੋਂ ਇਲਾਵਾ 3-4 ਹੋਰ ਵੀ ਨਾਲ ਸਨ ਤੇ ਉਹ ਵੀ ਢਾਬੇ ਵਾਲਿਆਂ ਨਾਲ ਮਿਲੇ ਹੋਏ ਨਜ਼ਰ ਆ ਰਹੇ ਸਨ। ਸਵਾਰੀਆਂ ਨੂੰ ਹੋਰ ਪ੍ਰੇਸ਼ਾਨੀ ਤੇ ਹੈਰਾਨਗੀ ਇਹ ਹੋਈ ਕਿ ਪੈਸੇ ਜਲੰਧਰ ਤੱਕ ਦੇ ਵਸੂਲੇ ਸਨ, ਪਰ ਉਨ੍ਹਾਂ ਨੂੰ ਲੁਧਿਆਣਾ ਬਾਈਪਾਸ ਉਤੇ ਉਤਾਰ ਕੇ ਬੱਸ ਭਜਾ ਕੇ ਲੈ ਗਏ। ਸਵਾਰੀਆਂ ਨੇ ਦੱਸਿਆ ਕਿ ਬੱਸ ਉਪਰ ਨਾ ਕੋਈ ਕੰਪਨੀ ਦਾ ਨਾਂਅ ਲਿਖਿਆ ਸੀ ਤੇ ਨਾ ਹੀ ਪੂਰਾ ਰਜਿਸਟਰਡ ਨੰਬਰ, ਸਿਰਫ ਏ ਸੀ ਵੀਡੀਓ ਕੋਚ ਲਿਖਿਆ ਸੀ।

 
Have something to say? Post your comment
ਹੋਰ ਪੰਜਾਬ ਖ਼ਬਰਾਂ
ਚੋਰੀ ਦੀਆਂ ਚਾਲੀ ਵਾਰਦਾਤਾਂ ਕਰਨ ਵਾਲੇ ਗੈਂਗ ਦੇ 7 ਦੋਸ਼ੀ ਗ੍ਰਿਫਤਾਰ
ਬੇਅਦਬੀ ਕੇਸ ਵਿੱਚ ਡੇਰਾ ਪ੍ਰੇਮੀਆਂ ਨੂੰ ਚਲਾਣ ਦੀਆਂ ਕਾਪੀਆਂ ਦਿਤੀਆਂ
ਸੁਮੇਧ ਸੈਣੀ ਦੇ ਖਿਲਾਫ ਇਕ ਕੇਸ ਵਿੱਚ ਐਕਸੀਐਨ ਸਮੇਤ ਸੱਤ ਜਣੇ ਨਾਮਜ਼ਦ
ਆਮ ਆਦਮੀ ਪਾਰਟੀ ਦੇ ਵਿਧਾਇਕ ਅਮਨ ਅਰੋੜਾ ਆਪਣਾ ਇਨਕਮ ਟੈਕਸ ਖੁਦ ਭਰਨਗੇ
ਚੋਣਾਂ ਦਾ ਚੱਕਾ ਰਿੜ੍ਹਿਆ: ਬਾਦਲ ਅਕਾਲੀ ਦਲ ਵੱਲੋਂ ਸਰਕਾਰ ਬਣਨ ਉੱਤੇ 400 ਯੂਨਿਟ ਮੁਫਤ ਬਿਜਲੀ ਦੇਣ ਦਾ ਵਾਅਦਾ
ਪੰਜਾਬ ਦੇ ਖਜ਼ਾਨਾ ਮੰਤਰੀ ਦੇ ਐਲਾਨਾਂ ਨੂੰ ਖਜ਼ਾਨਾ ਵਿਭਾਗ ਨੇ ਹੀ ਨਹੀਂ ਮੰਨਿਆ
ਸੁਮੇਧ ਸਿੰਘ ਸੈਣੀ ਨੂੰ ਰਾਹਤ: ਕੋਟਕਪੂਰਾ ਗੋਲ਼ੀ ਕਾਂਡ ਕੇਸ ਵਿੱਚ ਹਾਈ ਕੋਰਟ ਵੱਲੋਂ ਅਗਾਊਂ ਜ਼ਮਾਨਤ ਪ੍ਰਵਾਨ
ਰਣਜੀਤ ਸਾਗਰ ਡੈਮ ’ਚ ਭਾਰਤੀ ਫੌਜ ਦਾ ਹੈਲੀਕਾਪਟਰ ਡਿੱਗਣ ਨਾਲ ਦੋਵੇਂ ਪਾਇਲਟ ਲਾਪਤਾ
ਰਿਲਾਇੰਸ ਆਊਟਲੈਟ ਬੰਦ ਹੋਣ ਨਾਲ ਪੰਜ ਹਜ਼ਾਰ ਤੋਂ ਵੱਧ ਨੌਕਰੀਆਂ ਉਤੇ ਖਤਰੇ ਦਾ ਪਰਛਾਵਾਂ
ਪੰਜਾਬੀ ਯੂਨੀਵਰਸਿਟੀ ਵਿੱਚ ਫੇਕ ਬਿਲਿੰਗ ਕਰਨ ਦੇ ਕੇਸ ਵਿੱਚ ਸੱਤ ਜਣੇ ਨਾਮਜ਼ਦ