ਹਿਸਾਰ, 17 ਅਕਤੂਬਰ (ਪੋਸਟ ਬਿਊਰੋ)- ਹਰਿਆਣਾ ਦੇ ਫਤਿਹਾਬਾਦ ਜ਼ਿਲੇ ਦੀ ਜਾਖਲ ਨਗਰ ਪਾਲਿਕਾ ਚੇਅਰਪਰਸਨ ਸੀਮਾ ਗੋਇਲ ਦੇ ਦਫਤਰ ਵਿੱਚਉਨ੍ਹਾਂ ਦੇ ਸਹੁਰੇ ਨੌਹਰਚੰਦ ਨੇ ਕੱਲ੍ਹ ਸਵੇਰੇ ਫਾਹਾ ਲਾ ਕੇ ਖ਼ੁਦਕੁਸ਼ੀ ਕਰ ਲਈ। ਨੌਹਰਚੰਦ ਚੇਅਰਪਰਸਨ ਸੀਮਾ ਗੋਇਲ ਦੀ ਪ੍ਰਤੀਨਿਧਤਾ ਕਰ ਰਹੇ ਸਨ।
ਸ਼੍ਰੀਮਤੀ ਗੋਇਲ ਵਿਰੁੱਧ ਕੱਲ੍ਹ ਕੌਂਸਲਰਾਂ ਨੇ ਬੇਭਰੋਸਗੀ ਮਤਾ ਪੇਸ਼ ਕਰਨਾ ਸੀ ਪਰ ਇਸ ਤੋਂ ਕੁਝ ਸਮਾਂ ਪਹਿਲਾਂ ਉਨ੍ਹਾਂ ਦੇ ਸਹੁਰੇ ਨੌਹਰਚੰਦ ਨੇ ਪ੍ਰਧਾਨ ਦੇ ਦਫ਼ਤਰ ਵਿੱਚ ਫਾਹਾ ਲਾ ਕੇ ਖ਼ੁਦਕੁਸ਼ੀ ਕਰ ਲਈ ਹੈ। ਇਸ ਕਾਰਨ ਕੌਂਸਲਰਾਂ ਨੇ ਕੱਲ੍ਹ ਹੋਣ ਵਾਲੀ ਬੈਠਕ ਰੱਦ ਕਰ ਦਿੱਤੀ।ਜਾਖਲ ਨਗਰ ਪਾਲਿਕਾ ਵਿੱਚ ਕੁੱਲ 13 ਕੌਂਸਲਰ ਹਨ, ਜਿਨ੍ਹਾਂ ਵਿੱਚੋਂ ਨੌਂ ਸ਼੍ਰੀਮਤੀ ਗੋਇਲ ਦੇ ਵਿਰੁੱਧ ਹਨ। ਇਨ੍ਹਾਂ ਦਾ ਦੋਸ਼ ਹੈ ਕਿ ਬੀਤੇ ਡੇਢ ਸਾਲ ਤੋਂ ਪਾਲਿਕਾ ਪ੍ਰਧਾਨ ਉਨ੍ਹਾਂ ਦੀ ਅਣਦੇਖੀ ਕਰ ਰਹੀ ਹੈ ਤੇਉਨ੍ਹਾਂ ਦੇ ਖੇਤਰ ਦੇ ਵਿਕਾਸ ਕੰਮਾਂ 'ਤੇ ਧਿਆਨ ਨਹੀਂ ਦਿੱਤਾ ਜਾ ਰਿਹਾ।ਇਸ ਕਰ ਕੇ ਗੋਇਲ ਵਿਰੁੱਧ ਕੌਂਸਲਰ ਇਹ ਮਤਾ ਲਿਆਉਣਾ ਚਾਹੁੰਦੇ ਸਨ। ਇਸ ਸਿਲਸਿਲੇ ਵਿੱਚਕੱਲ੍ਹ 11 ਵਜੇ ਸਾਰੇ 13 ਕੌਂਸਲਰਾਂ ਦੀ ਬੈਠਕ ਹੋਣੀ ਸੀ, ਪਰ ਇਸ ਤੋਂ ਪਹਿਲਾਂ ਇਹ ਘਟਨਾ ਵਾਪਰ ਗਈ। ਇਸ ਦਾ ਪਤਾ ਲੱਗਦੇ ਸਾਰ ਬੇਭਰੋਸਗੀ ਮਤੇ ਵਾਸਤੇ ਹੋਣ ਵਾਲੀ ਬੈਠਕ ਰੱਦ ਕਰ ਦਿੱਤੀ ਗਈ। ਬੈਠਕ ਲਈ ਪਹੁੰਚੇ ਟੋਹਾਣਾ ਦੇ ਐਸ ਡੀ ਐਮ ਨਵੀਨ ਕੁਮਾਰ ਵੀ ਵਾਪਸ ਚੱਲੇ ਗਏ।