ਬੈਂਕਾਕ, 16 ਅਕਤੂਬਰ (ਪੋਸਟ ਬਿਊਰੋ)- ਵਿਦਿਆਰਥੀਆਂ ਦੀ ਅਗਵਾਈ ਵਿੱਚ ਸ਼ੁਰੂ ਹੋਏ ਵਿਖਾਵਿਆਂ ਤੋਂ ਬਾਅਦ ਥਾਈਲੈਂਡ ਦੀ ਰਾਜਧਾਨੀ ਬੈਂਕਾਕ `ਚ ਐਮਰਜੈਂਸੀ ਲਾਗੂ ਕਰ ਦਿੱਤੀ ਗਈ ਹੈ। ਵਿਖਾਵਾਕਾਰੀਆਂ ਨੇ ਇਸ ਦੌਰਾਨ ਸ਼ਾਹੀ ਕਾਫਲੇ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਅਤੇ ਪੁਲਸ ਨਾਲ ਝੜਪ ਹੁੰਦੀ ਰਹਿ ਗਈ।
ਐਮਰਜੈਂਸੀ ਦੇ ਐਲਾਨ ਤੋਂ ਬਾਅਦ ਦੰਗਾ ਰੋਕੂ ਪੁਲਸ ਨੇ ਪ੍ਰਧਾਨ ਮੰਤਰੀ ਦੇ ਦਫ਼ਤਰ ਦੇ ਬਾਹਰ ਰਾਤ ਭਰ ਡੇਰਾ ਲਾਈ ਰੱਖਿਆ ਅਤੇ ਲੋਕਤੰਤਰ ਸਮਰਥਕ ਵਿਖਾਵਾਕਾਰੀਆਂ ਦੇ ਗਰੁੱਪ ਨੂੰ ਕੱਲ੍ਹ ਤੜਕੇ ਭੱਜਾ ਦਿੱਤਾ। ਵਿਖਾਵਾਕਾਰੀ ਪ੍ਰਧਾਨ ਮੰਤਰੀ ਪ੍ਰਯੁਤ ਚਾਨ ਓਚਾ ਦੇ ਅਸਤੀਫੇ, ਸੰਵਿਧਾਨਕ ਬਦਲਾਅ ਅਤੇ ਰਾਜਤੰਤਰ `ਚ ਸੁਧਾਰ ਦੀ ਮੰਗ ਕਰ ਰਹੇ ਹਨ। ਉਨ੍ਹਾ ਦੇ ਕਈ ਚੋਟੀ ਦੇ ਨੇਤਾਵਾਂ ਨੂੰ ਹਿਰਾਸਤ `ਚ ਲਿਆ ਗਿਆ ਹੈ। ਐਮਰਜੈਂਸੀ ਦੇ ਐਲਾਨ `ਚ ਕਿਹਾ ਗਿਆ ਹੈ ਕਿ ਇਸ ਦੀ ਲੋੜ ਇਸ ਲਈ ਪਈ ਕਿ ਸਾਜ਼ਿਸ਼ਕਾਰਾਂ ਦੇ ਕੁਝ ਗਰੁੱਪ ਵੱਖ-ਵੱਖ ਤਰੀਕਿਆਂ ਅਤੇ ਸਾਧਨਾਂ ਨਾਲ ਸ਼ਾਹੀ ਕਾਫਲੇ `ਚ ਰੁਕਾਵਟ ਪਾਉਣ ਸਮੇਤ ਕਿਸੇ ਅਣਸੁਖਾਵੀਂ ਘਟਨਾ ਵਰਤਾਉਣ ਦੀ ਤਾਕ ਵਿਚ ਹਨ। ਇਹ ਵਿਖਾਵਾ ਫੌਜੀ ਤਾਨਾਸ਼ਾਹੀ ਦੇ ਖ਼ਿਲਾਫ਼ 1973 ਵਿੱਚ ਵਿਦਿਆਰਥੀਆਂ ਦੀ ਅਗਵਾਈ `ਚ ਹੋਏ ਅੰਦੋਲਨ ਦੀ ਵਰ੍ਹੇਗੰਢ ਮੌਕੇ ਹੋਇਆ ਹੈ।