ਨਵੀਂ ਦਿੱਲੀ, 16 ਅਕਤੂਬਰ (ਪੋਸਟ ਬਿਊਰੋ)- ਸੋਸ਼ਲ ਮੀਡੀਆ ਪਲੇਟਫਾਰਮ ਫੇਸਬੁੱਕ ਉੱਤੇ ਇਕਤਰਫਾ ਹੋਣ ਦੇ ਦੋਸ਼ ਭਾਰਤ `ਚ ਕਈ ਵਾਰ ਲੱਗੇ ਹਨ। ਇਸ ਬਾਰੇ ਕਾਂਗਰਸ ਬੁਲਾਰੇ ਰਣਦੀਪ ਸਿੰਘ ਸੁਰਜੇਵਾਲਾ ਨੇ ਇੱਕ ਨਵਾਂ ਟਵੀਟ ਕੀਤਾ ਹੈ, ਜਿਸ ਵਿੱਚ ਉਨ੍ਹਾਂ ਨੇ ਕਾਂਗਰਸ ਦੀ ਸੀਨੀਅਰ ਨੇਤਾ ਅਤੇ ਸਾਬਕਾ ਲੋਕ ਸਭਾ ਸਪੀਕਰ ਮੀਰਾ ਕੁਮਾਰ ਦੇ ਅਕਾਊਂਟ ਨੂੰ ਬਲਾਕ ਕਰਨ `ਤੇ ਇਤਰਾਜ਼ ਪ੍ਰਗਟ ਕੀਤਾ ਹੋਇਆ ਹੈ।
ਸੁਰਜੇਵਾਲਾ ਨੇ ਆਪਣੇ ਟਵੀਟ `ਚ ਲਿਖਿਆ: ਅਸੀਂ ਦੇਖਿਆ ਹੈ ਕਿ ਫੇਸਬੁੱਕ ਇੰਡੀਆ ਦੀ ਲੀਡਰਸ਼ਿਪ ਨੇ ਮੋਦੀ ਸਰਕਾਰ ਦੇ ਏਜੰਡੇ ਤਹਿਤ ਕਿਵੇਂ ਸਮਝੌਤਾ ਕੀਤਾ ਸੀ। ਅੱਜ ਸਾਬਕਾ ਸਪੀਕਰ ਤੇ ਕਾਂਗਰਸ ਦੇ ਪ੍ਰਮੁੱਖ ਨੇਤਾ ਦੇ ਅਕਾਊਂਟ ਨੂੰ ਬਲਾਕ ਕਰਨ ਤੋਂ ਸਾਬਤ ਹੁੰਦਾ ਹੈ ਕਿ ਵਿਰੋਧੀ ਧਿਰ ਦੇ ਨੇਤਾਵਾਂ ਦੀ ਆਵਾਜ਼ ਨੂੰ ਦਬਾਉਣ ਲਈ ਘਟੀਆ ਰਣਨੀਤੀ ਕੀਤੀ ਜਾ ਰਹੀ ਹੈ। ਇਸ ਬਾਰੇ ਖੁਦ ਮੀਰਾ ਕੁਮਾਰ ਨੇ ਵੀ ਟਵੀਟ ਕੀਤਾ ਹੈ, ਜਿਸ ਵਿੱਚ ਉਨ੍ਹਾ ਨੇ ਆਪਣੇ ਫੇਸਬੁੱਕ ਪੇਜ ਦਾ ਸਕਰੀਨਸ਼ਾਟ ਸ਼ੇਅਰ ਕੀਤਾ ਹੈ। ਮੀਰਾ ਕੁਮਾਰ ਦੇ ਪੇਜ `ਤੇ ਫੇਸਬੁੱਕ ਵੱਲੋਂ ਲਿਖਿਆ ਗਿਆ ਹੈ ਕਿ ਤੁਹਾਡਾ ਪੇਜ ਸਾਡੇ ਕਮਿਊਨਿਟੀ ਸਟੈਂਡਰਡ ਦੀ ਪਾਲਣ ਨਹੀਂ ਕਰਦਾ, ਇਸ ਲਈ ਇਹ ਅਨਪਬਲਿਸ਼ ਹੈ। ਵਰਨਣ ਯੋਗ ਹੈਕਿ ਮੀਰਾ ਕੁਮਾਰ ਬਿਹਾਰ ਦੀ ਰਾਜਨੀਤੀ ਵਿੱਚ ਖਾਸਾ ਅਸਰ ਰੱਖਦੀ ਹੈ, ਇਸ ਲਈ ਇਸ ਵਕਤ ਹੋਏ ਐਕਸ਼ਨ ਨੂੰ ਉਨ੍ਹਾਂ ਨੇ ਮੁੱਦਾ ਬਣਾ ਲਿਆ ਹੈ। ਮੀਰਾ ਕੁਮਾਰ ਨੇ ਆਪਣੇ ਟਵੀਟ `ਚ ਲਿਖਿਆ ਕਿ ਫੇਸਬੁੱਕ ਪੇਜ ਬਲਾਕ ਕੀਤਾ ਗਿਆ ਹੈ। ਆਖਿਰ ਕਿਉਂ? ਲੋਕਤੰਤਰ `ਤੇ ਸੱਟ। ਇਹ ਸਿਰਫ ਇਤਫਾਕ ਨਹੀਂ ਹੋ ਸਕਦਾ ਕਿ ਬਿਹਾਰ ਵਿਧਾਨਸਭਾ ਚੋਣਾਂ ਤੋਂ ਪਹਿਲਾਂ ਫੇਸਬੁੱਕ ਮੇਰੇ ਪੇਜ ਨੂੰ ਬਲਾਕ ਕਰਦਾ ਹੈ। ਇਸ ਨਾਲ ਇੱਕ ਵਿਵਾਦ ਛਿੜ ਗਿਆ ਹੈ।